ދިވެހި ފުލުހުންގެ ޚިދުމަތާއެކު ކުރާ މަސައްކަތުން ދިވެހިރާއްޖޭގެ ޖިނާއި އަދުލުގެ ނިޒާމަށް ކުރެވޭ އިތުބާރު މިހާރަށްވުރެ ބޮޑުކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ޕްރޮސެކިއުޓާ ޖެނެރަލް (ޕީޖީ) އައްބާސް ޝަރީފް މިއަދު ވިދާޅުވެއްޖެއެވެ.
އައްބާސް މިހެން ވިދާޅުވެފައިވަނީ މިއަދު ޕޮލިސް ކޮމިޝަނަރު (ސީޕީ) އަލީ ޝުޖާއުއާއެކު ފުލުހުންގެ ޚިދުމަތުގެ މައި އޮފީހުގައި ބޭއްވެވި ބައްދަލު ކުރެއްވުމަށްފަހު އެކްސްގައި ކުރެއްވި ޕޯސްޓެއްގައެވެ. އެ ޕޯސްޓުގައި އައްބާސްވަނީ، އޭނާ ހަވާލުވެ ވަޑައިގަތް މަސައްކަތުގެ އެންމެ މުހިންމު އެއް ބައިވެރިޔަކީ ފުލުހުންގެ ޚިދުމަތްކަން ފާހަގަ ކުރައްވައިފައެވެ.
މި ބައްދަލުކުރެއްވުމުގައި ސީޕީ ވަނީ އައު ޕްރޮސިކިއުޓާ ޖެނެރަލަށް މަރުޙަބާ ދަންނަވައި، ދެ މުއައްސަސާގެ ދެމެދުގައި އޮތް ގާތް ގުޅުން ދަމަހައްޓަވާނެކަމަށް ވިދާޅުވެފައެވެ.
ޖިނާއީ ތަޙުގީގުތައް މިހާރަށްވުރެ އަވަސްކޮށް ކުރިއަށްގެންދިއުމަށް ޕީޖީ އޮފީހުން ވެދެވެން އޮތް އެންމެ ފުޅާ ދާއިރާއެއްގައި އެހީތެރިކަން ދެއްވާނެ ކަމަށް އައްބާސް ވަނީ މިބައްދަލުވުމުގައި ވިދާޅުވެފައެވެ. އަދި މައްސަލަތަކުގެ ތަޙުޤީޤު ނިމުމަށްފަހު، ދަޢުވާކުރުން މިހާރަށް ވުރެ އަވަސްކުރުމުގެ ތަޞައްވުރު ގެންގުޅުއްވާކަމަށް ވެސް އޭނާ ވިދާޅުވެފައިވެއެވެ.
ދިވެހި ފުލުހުންގެ ޚިދުމަތަކީ ޕްރޮސިކިއުޓާ ޖެނެރަލްގެ މަސައްކަތުގެ އެންމެ މުހިންމު ބައިވެރިޔާއެވެ. އެގޮތުން ޕީޖީ އޮފީހަށް ހުށަހެޅޭ މައްސަލަތަކުގެ 90 އިންސައްތައަށްވުރެ ގިނަ މައްސަލައަކީ ފުލުހުން ތަޙުގީގުކޮށް ހުށަހަޅާ މައްސަލަތަކެވެ.
ރައީސް ޑރ. މުޙައްމަދު މުޢިއްޒު، ޕީޖީ ކަމުގެ މަގާމަށް އައްބާސް އައްޔަން ކުރެއްވީ މިދިޔަ ބުދަ ދުވަހުގައެވެ.