ފާއިތުވީ ދެ ދުވަސްތެރޭ ތިން މާރާމާރީއެއް ހިނގިއިރު، އޭގެން އެއްވެސް މައްސަލައެއްގައި އަދި މިހާތަނަށް މީހަކު ހައްޔަރުކޮށްފައި ނުވާ ކަމަށް ފުލުހުން މިއަދު ބުނެފިއެވެ.
އެއީ އައްޑޫސިޓީގައި ހުކުރު ދުވަހުގެ ހެނދުނު ހިންގި މާރާމާރީއަކާއި، އެ ރޭ ދަންވަރު ހުޅުމާލޭގައި ހިންގި މާރާމާރީއެއްގެ އިތުރުން މާލޭގެ ގެއަކަށް ވަދެ އިއްޔެ ހިންގި މާރާމާރީއެއްގެ މައްސަލައެވެ.
އެކަމާ ގުޅިގެން "ސަން" އިން ސުވާލުކުރުމުން ފުލުހުން ބުނީ މިހާތަނަށް އެ ތިން މާރާމާރީގެ މައްސަލައިގައި ވެސް އެއްވެސް މީހަކު ހައްޔަރުކޮށްފައި ނުވާ ކަމަށެވެ.
އައްޑޫ ސިޓީ ހިތަދޫގައި މީހަކަށް އަނިޔާކޮށްފައިވާ ކަމަށް ހުކުރު ދުވަހުގެ ހެނދުނުގެ ވަގުތެއްގައި ރިޕޯޓު ކޮށްފައިވެއެވެ. ފުލުހުން ބުނީ އަނިޔާކޮށްފައި ވަނީ ދިވެހި ފިރިހެނަކަށް ކަމަށެވެ. އަދި އެ މީހާއަށް އައްޑޫ އިކުއެޓޯރިއަލް ހޮސްޕިޓަލުގައި ފަރުވާދިނުމަށްފަހު އެ ދުވަހު ވަނީ ދޫކޮށްލާފައެވެ.
ނަމަވެސް އެ މީހާއަށް ލިބިފައިވާ އަނިޔާގެ ތަފުސީލެއް ހާމަކޮށްފައިނުވެއެވެ. އަދި މާރާމާރީ ހިނގަން މެދުވެރިވި ސަބަބެއް ވެސް ހާމަކޮށްފައެއް ނުވެއެވެ.
އެ ހާދިސާއާ ގުޅިގެން ސޯޝަލް މީޑިއާގައި ދައުރުކުރަމުންދާ ޕޯސްޓެއްގައި ވަނީ ބުރާސްފަތި ދުވަހުގެ ރޭ ހިތަދޫގެ ގެޔަކަށް މޫނު ނިވާކޮށްގެން ތިބި ބަޔަކު ވަދެ، މީހަކަށް އަނިޔާކޮށްފައިވާ ކަމަށް ބުނެފައެެވެ. އަދި އަނިޔާ ލިބުނު މީހާގެ ފޮޓޯތަކެއް ކަމަށް ބުނެ ހިއްސާކޮށްފައިވާ ފޮޓޯތަކުން، އެ މީހާ ޒަޚަމްވެފައިވާ މަންޒަރާއި އެމްބިއުލާންސަށް އަރުވައިގެން ގެންދާ މަންޒަރު ފެނެއެވެ.
ހުކުރު ދުވަހުގެ ރޭ ދަންވަރު 3:50 ހާއިރު ހުޅުމާލޭގައި މާރާމާރީއެއް ހިންގި މައްސަލައެއް ވެސް ފުލުހުންނަށް ރިޕޯޓުކުރިއެވެ. އެ މާރާމާރީގައި ބިދޭސީ ފިރިހެނަކަށް އަނިޔާވި ކަމަށާއި އޭނާއަށް ފަރުވާ ދިނުމަށް ހުޅުމާލެ ހޮސްޕިޓަލަށް ގެންގޮސްފައިވާ ކަަމަށް ފުލުހުން ބުނެފައިވެއެވެ.
އެ ހާދިސާގައި އަނިޔާވި ބިދޭސީ މީހާގެ ހާލާ ގުޅޭގޮތުން 'ސަން' އިން ސުވާލު ކުރުމުން ހުޅުމާލެ ހޮސްޕިޓަލްގެ އޮފިޝަލަކު ވިދާޅުވީ، އެ މީހާގެ ބޮލަށް ލިބިފައި ހުރި އަނިޔާތަކުގެ ސަބަބުން ނިއުރޯ ސާޖަންއަކަށް ދެއްކުމަށް އިއްޔެ ހެނދުނު އައިޖީއެމްއެޗަށް ބަދަލުކޮށްފައިވާ ކަމަށެވެ.
ހަމައެއާއެކު އިއްޔެ މާލޭގެ ގެއަކަށް ވަދެ ބަޔަކު މާރާމާރީއެއް ހިންގި މައްސަލައެއް ވެސް ފެންމަތިވިއެވެ. އެ މާރާމާރީއާ ގުޅިގެން އަނިޔާވި ފިރިހެނަކަށް ފަރުވާ ދޭން އައިޖީއެމްއެޗަށް ގެންދިޔަ ކަމަށް ފުލުހުން ވަނީ ބުނެފައެވެ.
މި ފަހަކަށް އައިސް މީހުން ރަހީނުކުރުމާއި، މާރާމާރީގެ އިތުރުން ވައްކަމާއި ފޭރުމުގެ މައްސަލަތަކުގެ ރިޕޯޓު ވަރަށް ބޮޑަށް އިތުރުވެ، އެ ކަމުގެ ކަންބޮޑުވުން އާންމުން އަންނަނީ ފާޅުކުރަމުންނެވެ.