މާލޭގެ މަގެއް މައްޗަށް މިއަދު ކުލަފާޓާތަކެއް ވެއްޓި، އެ ސަރަހައްދުގައި ޕާކުކޮށްފައި ހުރި ސައިކަލުތަކަށް ވެސް ކުލަ ބުރައިގެންގޮސްފިއެވެ.
ކޯރުކެނޑި ހިނގުމުގައި ހިނގި އެ ހާދިސާއާ ގުޅޭ ގޮތުން މައުލޫމާތު ދެމުން މަންޒަރު ދުށް މީހަކު "ސަން"އަށް ބުނީ، ކުލަފާޓާތައް ވެއްޓުނީ ޕިކަޕަކުން ބާލަން އުޅުމުގެ ތެރޭގައި ކަމަށެވެ.
އެ މަގުގެ ކަންމަތީގައި ކުލަ ވިއްކާ ކަންސައި ޕެއިންޓް މޯލްޑިވްސް ޝޯރޫމް ހުންނައިރު، މަންޒަރު ދުށް މީހާ ބުނި ގޮތުގައި އެއީ އެ ފިހާރައަށް ގެންދިޔަ ކުލަފާޓާތަކެކެވެ.
ކޯރުކެނޑި ހިނގުމުގައި ކުލަލެވިފައި: ކުލަ ސާފުކުރުމުގެ މަސައްކަތް ބަޔަކު އަންނަނީ ކުރަމުން
އެ ހާދިސާގެ ވީޑިއޯތަކުން، ފުލުހުން އެ ސަރަހައްދުގައި ހަރަކާތްތެރިވާ މަންޒަރު ފެނެއެވެ. އަދި މަގުމައްޗަށް އެޅިފައިވާ ކުލައާއި ސައިކަލުތަކުގައި ހުރި ކުލަ ސާފުކުރުމުގެ މަސައްކަތް ބަޔަކު ކުރާ މަންޒަރު ފެނެއެވެ.
މީގެ ކުރިން ވެސް ކޯރުކެނޑި ހިނގުމުގައި މިފަދަ ހާދިސާއެއް ހިނގައިފައިވެއެވެ.
ބޮޑުތަކުރުފާނު މަގުން ސިނަމާލޭ ބުރިޖަށް އަރާ ސަރަހައްދަށް ވެސް މިދިޔަ މަހު ޕިކަޕަކުން ކުލަފާޓާތަކެއް ވެއްޓި، މަގުމަތި ހަޑިވެފައިވެއެވެ.
އެ ދުވަހު ފުލުހުން ޓްރެފިކް ކޮންޓްރޯލްކޮށް، ކުލަ ސާފުކުރީ އެމްއެމްއެންޑީއެފުންނެވެ.