ހުޅުމާލޭ ފުރަތަމަ ފިޔަވަހިން ދެވަނަ ފިޔަވައްސަށް ދާ ބުރިޖު ކައިރީ ކާރަކާއި ސައިކަލެއް ޖެހި ހިނގި އެކްސިޑެންޓެއްގައި ސައިކަލު ދުއްވަން އިން މީހާއަށް ޒަޚަމުތަކެއް ވެއްޖެއެވެ.
މި ފަހުން މާލޭ ސަރަހައްދުގައި އެކްސިޑެންޓުތައް އަންނަނީ އިތުރުވަމުންނެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހި ގުޅުވައިދޭ ބުރިޖު ކައިރީ ކާރަކާއި ސައިކަލެއް ޖެހި އެކްސިޑެންޓެއް ހިނގާފައިވާ ކަމަށް މިއަދު ރިޕޯޓުކޮށްފައިވާ ކަމަށެވެ.
މި އެކްސިޑެންޓުގައި ސައިކަލު ދުއްވި މީހާގެ ގައިގެ ބައެއް ތަންތަން ހަން މަށައިގެން ގޮސްފައިވާ ކަމަށް ފުލުހުން ބުންޏެވެ. ނަމަވެސް، އިތުރު އަނިޔާއެއް ލިބުނު ކަމަކަށް ނުބުނެއެވެ.
މި އެކްސިޑެންޓާ ގުޅިގެން ބަލަންޖެހޭ ކަންކަން ފުލުހުން އަންނަނީ ބަލަމުންނެވެ.
ފާއިތުވި ހަފުތާއެއްހާ ދުވަހުގެ ތެރޭގައި މާލެއާއި ހުޅުމާލޭގައި ނުރައްކާތެރި އެކްސިޑެންޓުތައް ހިނގައިފައިވެއެވެ. ބައެއް އެކްސިޑެންޓުތަކުގައި މީހުންގެ ފުރާނަ ވެސް ގެއްލުނެވެ. އެހެންވެ، ފުލުހުން ވަނީ އާންމު މިންވަރަށް ވުރެ އިތުރަށް މަގުތަކުގައި ހަރަކާތްތެރިވާން ފަށައިފައެވެ.
އެގޮތުން، ހުޅުމާލެ އަދި މާލޭގައި ވެސް އާންމުކޮށް ބާރުބޮޑުވާ ގަޑިތަކުގައި ގިނަ އަދަދެއްގެ ޓްރެފިކް ފުލުހުން މަގުމަތީގައި ހަރަކާތްތެރިވެއެވެ.
ހަމައެއާއެކު ސިނަމާލެ ބްރިޖު ޕެޓްރޯލް ކުރަން މި ހަފުތާ ތެރޭ ސައިކަލު ބޭނުންކުރަން ފަށާނެ ކަމަށް ވެސް ފުލުހުން ބުންޏެވެ. އޭގެ ސަބަބުން އެކްސިޑެންޓެއް ހިނގި ނަމަވެސް އެ ސީނަށް ފުލުހުންނަށް ވީހާ ވެސް އަވަހަށް ދެވޭނެ ކަމަށް ފުލުހުން ބުންޏެވެ.
މި އަހަރުގެ މިހާތަނަށް ފުލުހަށް 1،933 އެކްސިޑެންޓު ރިޕޯޓުކޮށްފައިވާ ކަމަށް ތަފާސްހިސާބުން ދައްކާއިރު، ކޮންމެ މަހަކު ވެސް 200އަށް ވުރެ ގިނަ އެކްސިޑެންޓު ރިޕޯޓުކޮށްފައިވެއެވެ.