މި ސަރުކާރުން އަންނަނީ މިދިޔަ އެމްޑީޕީގެ ސަރުކާރުން ވެސް ހެދި ގޯސްތައް ތަކުރާރުކުރަމުން ކަމަށް ދަ ޑިމޮކްރެޓްސްއަށް ނިސްބަތްވާ ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު މިއަދު ވިދާޅުވެއްޖެއެވެ.
އިލްޔާސް މި ފަދައިން ވިދާޅުވީ، ރާއްޖޭގެ އިގުތިސޯދީ އަދި މާލީ ހާލަތާ ގުޅޭގޮތުން ހުރި ކަންބޮޑުވުންތައް ހިއްސާކުރެއްވުމަށް ޑިމޮކްރެޓްސްއިން މިއަދު ބޭއްވި ނޫސްވެރިންގެ ބައްދަލުވުމުގައެވެ.
މިދިޔަ އެމްޑީޕީ ސަރުކާރު ފެށުނުއިރު އެ ޕާޓީގައި ހުންނެވި އިލްޔާސް ވިދާޅުވީ، 2018 ވަނަ އަހަރު އެމްޑީޕީން ވެރިކަމަށް އައީ ކުރީގެ ޕީޕީއެމްގެ ވެރިކަން ނިމުނުއިރު އޮތް ރާއްޖޭގެ ދަރަނި ރީސްޓްރަކްޗާކުރަން ނިންމައިގެން ކަމަށެވެ. އެހެންނަމަވެސް، އެކަން އެމްޑީޕީ ސަރުކާރުން ވެސް ކޮށްފައިނުވާ ކަމަށް އިލްޔާސް ވިދާޅުވިއެވެ.
އިއްޔެ ކުރީގެ ފިނޭންސް މިނިސްޓަރު ވިދާޅުވެއްޖެ މާލީ އިސްލާހުތައް ގެންނަން ވަރަށް ލަސްވެއްޖެއޭ. ތެދުފުޅެއް. މާ ލަސްވެއްޖެ. 2018 ގައި އަޅުގަނޑުމެން އެކަން ކުރަން އައިސް ފިނޭންސް މިނިސްޓްރީއާ ހަވާލުވި ބޭފުޅާ އެއީ. އެ ގަޑީގައި ވެސް ނުކުރެއްވި، އިލްޔާސް ލަބީބް
އިލްޔާސް ވިދާޅުވީ، ދެން މި ސަރުކާރުން ވެރިކަމަށް އައީ ރިޔާސީ އިންތިޚާބުގެ ކެމްޕޭނު ދުވަސްވަރު، އެމްޑީޕީ ސަރުކާރުން އިތުރުވި ދަރަނިތައް ރިފައިނޭންސް ކުރާނެ ކަމަށް ބުނަމުން ކަމަށެވެ. އެހެންނަމަވެސް, އެއްވެސް ފިޔަވަޅެއް އަޅާތަން ނުފެންނަ ކަމަށް އިލްޔާސް ވިދާޅުވިއެވެ.
އޭނާ ވިދާޅުވީ ދަރަނި ރިފައިނޭންސް ކޮށްގެން ވެސް އެކަން ވާން ނެތް ކަމަށެވެ. އެއީ، ދަރަނި ދެއްކުމަށްޓަކައި ދަރަނި ނަގާނީ އެއަށްވުރެ ބޮޑު އިންޓަރެސްޓު ރޭޓެއްގައިކަމުން ކަމަށް އިލްޔާސް ފާހަގަކުރެއްވިއެވެ.
މި ސަރުކާރުން ވެސް މި ކަންތައްތައް ހައްލުކުރާކަށް މަސައްކަތްކުރާތަނެއް އަޅުގަނޑުމެންނަކަށް ނުފެނޭ. ހަމަ އޭގެ ބަދަލުގައި މިދިޔަ ސަރުކާރުން ކުރި ގޮތަށް ޚަރަދު މައްޗަށް ޚަރަދު ބޮޑުވަމުން ވަމުން ދާތަން މި ފެންނަނީ، އިލްޔާސް ލަބީބް
އިލްޔާސް ލަބީބް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަނީ: އޭނާ ވިދާޅުވީ އެމްޑީޕީ ސަރުކާރުން ހެދި ގޯސް މިސަރުކާރުން އަންނަނީ ތަކުރާރު ކުރަމުންދާ ކަމަށް -- ސަން ފޮޓޯ/ އަމަން ލަތީފް
އިލްޔާސް ވިދާޅުވީ، ބަޖެޓުގައި މި އަހަރުގެ އާމްދަނީއަކީ 34 ބިލިއަން ރުފިޔާކަމަށް އަންދާޒާކޮށްފައި އޮތް ނަމަވެސް ޚަރަދުތައް ހުރީ 49 ބިލިއަން ރުފިޔާގައި ކަމަށެވެ. އެހެންކަމުން މި އަހަރު އެކަނި ޑެފިސިޓްގެ ގޮތުގައި 15 ބިލިއަން ރުފިޔާ އަރާނެ ކަމަށް އިލްޔާސް ވިދާޅުވިއެވެ.
ދެން އިލްޔާސް ފާހަގަކުރެއްވީ ފިނޭންސް މިނިސްޓަރު ޑރ. މުހައްމަދު ޝަފީގް ރައްޔިތުންގެ މަޖިލީހަށް ވަޑައިގެން ދެއްކެވި ވާހަކަތަކެވެ. އެގޮތުން، މިހާރު ދާގޮތަށް ދާނަމަ 57 ބިލިއަނަށް ޚަރަދުތައް އިތުރުވާނެ ކަމަށް ވިދާޅުވި ވިދާޅުވުން އިލްޔާސް ފާހަގަކުރެއްވިއެވެ.
އެކަން އެގޮތަށް ވާނަމަ މި އަހަރު ނިމޭއިރު ދައުލަތުގެ ދަރަނީ 149 ބިލިއަނަށް އަރާނެ ކަމަށް އިލްޔާސް ވިދާޅުވިއެވެ.
އޭނާ ވިދާޅުވީ، ޚަރަދުކުޑަކުރަން ކޮންމެހެން ވެސް އެބަޖެހޭ ކަމަށެވެ. އެހެންނަމަވެސް، އެ ކަންތައް ކުރަނީއޭ ބުނުމުގެ ބަދަލުގައި މިހާރު ވެސް ކުރަންޖެހޭ ކަމަށް އޭނާ ވިދާޅުވިއެވެ. ޚަރަދުކުޑަކުރުމަށްޓަކައި މި ސަރުކާރުން ސިޔާސީ މަގާމުތައް ވެސް މަދުކުރަންޖެހޭ ކަމަށް އިލްޔާސް ވިދާޅުވިއެވެ.
ސަރުކާރު ހިއްސާވާ ކުންފުނިތަކަށް "ހެސްކިޔާފަ" މީހުން ވައްދައި، އެ މުވައްޒަފުންނަށް މުސާރަދޭން ބޮޑެތި ޚަރަދުތައްކުރުން ހުއްޓުވަންޖެހޭ ފަދަ މޭރުމަކުން އިލްޔާސް ވަނީ މި ސަރުކާރަށް ބަހުގެ ހަމަލާތައް ރައްދުކުރައްވާފައެވެ.
ކޮންމެ ދުވަހަކު އަޅުގަނޑުމެން ޚަރަދުކުރަން ފިޔަވަޅުތައް އަޅަމޭ ބުންޏަސް ނުވާނެ، އިލްޔާސް ލަބީބް
ކުރިއަށް އޮތް 2026 ވަނަ އަހަރު ބޭރު ދަރަންޏަށް އެއް ބިލިއަން ޑޮލަރު އެއް ފަހަރާ ދައްކަންޖެހެއެވެ.
ދެހާސް ސައްބީސްވަނަ އަހަރު ދައްކަން ޖެހޭ 500 މިލިއަން ޑޮލަރުގެ ދަރަނީގެ 50 އިންސައްތައަކީ ނިމިދިޔަ ސަރުކާރުން 2021 ވަނަ އަހަރު ހޭދަކުރި ވަރެވެ. މިދިޔަ ސަރުކާރުން 2021 ވަނަ އަހަރު ސުކޫކުގެ ބާކީ ފައިސާ ހޭދަކޮށްފައިވަނީ ކޮވިޑާ ގުޅިގެން އާމްދަނީ ދަށްވެ، ޚަރަދުތައް ހަމަޖެއްސުމަށެވެ.
އެ ސުކޫކުގެ އެއްބައި ހޭދަކޮށްފައިވަނީ ކުރީގެ ޕީޕީއެމްގެ ސަރުކާރުން 2017 ވަނަ އަހަރު ނެގި "ސަނީ ސައިޑު" ބޮންޑަށް ދެއްކުމަށެވެ. އެ ބޮންޑަށް 200 މިލިއަން ޑޮލަރު ދައްކާފައިވެއެވެ.
އެހެންވެ، ސަރުކާރުން ވަނީ ޑޮލަރުން ލިބޭ އާމްދަނީ އިތުރުކުރަން ވެސް ކަންތައްތަކެއް ހިމަނައިފައެވެ. އެއީ، އެއާޕޯޓު ޑިވެލޮޕްމަންޓް ޓެކްސްގެ ރޭޓް މުރާޖާކުރުމާއި ޓެކްސް ބޭސް ބޮޑުކުރުމާއި ސިއްހަތަށް ގެއްލުންވާ ބާވަތްތަކުން ނަގާ ޑިއުޓީ އިތުރުކުރުމާއި ގްރީން ޓެކްސްގެ ރޭޓްތައް މުރާޖާކުރުން އަދި އިގުތިސާދު ސިންދަފާތު ކުރުމެވެ.
ދައުލަތުގެ ދަރަނި މިހާ ބޮޑުވެފައިވާއިރު ދައުލަތަށް ލިބެން ޖެހި، ނުލިބި ވެސް ބޮޑު އަދަދެއް އެބައޮތެވެ. އެގޮތުން، ދައުލަތަށް ލިބެންޖެހޭ 13 ބިލިއަން ރުފިޔާ އެބަހުރި ކަމަށާއި އެ ފައިސާ ހޯއްދަވާނެ ކަމަށް ރައީސް ޑރ. މުޙައްމަދު މުއިއްޒު މީގެ ކުރިން ވިދާޅުވިއެވެ.