ރާއްޖެއަށް ބިދޭސީން ގެންނަ މީހުންގެ އަތުން ނަގާ އެއްވެސް ފީއެއް ބޮޑުކުރުމުގެ ވިސްނުމެއް ނެތް ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.
ބިދޭސީންނަށް ވަޒީފާދޭ ފަރާތްތަކާ ބައްދަލުކުރައްވައި އިހުސާން ވިދާޅުވީ، ކޯޓާ ފީ ހިމެނޭ ގޮތަށް އެއްވެސް ފީއެއް ބޮޑުކުރުމުގެ ވިސްނުމެއް މިވަގުތު ސަރުކާރުން ނުގެންގުޅޭ ކަމަށެވެ.
އޭނާ އެހެން ވިދާޅުވިއިރު، އިއްޔެ ރައްޔިތުންގެ މަޖިލީހުން ވަނީ ބިދޭސީ މަސައްކަތްތެރިން ރާއްޖެ ގެނައުމަށްޓަކައި، ސަރުކާރަށް ދައްކަންޖެހޭ ފީ ބޮޑު ކުރެވޭގޮތަށް ވަޒީފާއާ ބެހޭ ގާނޫނަށް ހުށަހެޅި އިސްލާހު ފާސްކޮށްފައެވެ.
މިހާރު ވަޒީފާއާ ބެހޭ ގާނޫނުގައި ބަޔާންކޮށްފައި އޮންނަ ގޮތުން ބިދޭސީ މަސައްކަތްތެރިން ވޯކް ޕާމިޓުގެ ގޮތުގައި 350 ރުފިޔާ ދައްކަންޖެހެއެވެ. އަދި ކޯޓާ ފީގެ ގޮތުގައި އަހަރަކު 2،000 ރުފިޔާ ދައްކަންޖެހެއެވެ.
ސަރުކާރުގެ ފަރާތުން ވަޒީފާއާބެހޭ ގާނޫނަށް ހުށަހަޅައި ފާސްކުރި އިސްލާހުގެ ދަށުން ކޮންމެ 18 މަސްދުވަހަކުން އެއްފަހަރު އެ އަދަދު ބަދަލު ކުރުމުގެ އިޚްތިޔާރު ސަރުކާރަށް ލިބެއެވެ. އެ ބިލުގައި ބުނެފައިވާ ގޮތުގައި މުރާޖައާ ކުރުމަށްފަހު، ކަނޑައެޅުނު އަަދަދު 30 އިންސައްތައަށްވުރެ އިތުރުވެގެން ނުވާނެއެވެ.
އެ އިސްލާހާ ދެކޮޅަށް، ވިޔަފާރިވެރިޔާ އަދި މާމިގިލީ ދާއިރާގެ މެންބަރު ގާސިމް އިބްރާހީމާއި އިތުރު ބައެއް މެންބަރުން ނުރުހުން ފާޅުކޮށް، ފީތައް ބޮޑު ނުކުރަން ގޮވާލާފައިވެއެވެ.
ބިދޭސީ މަސައްކަތްތެރިންތަކެއް: ހޯމް މިނިސްޓަރު އިހުސާން ވިދާޅުވީ ކޯޓާ ފީ ހިމެނޭ ގޮތަށް އެއްވެސް ފީއެއް ބޮޑުކުރުމުގެ ވިސްނުން ސަރުކާރުން ނުގެންގުޅޭ ކަމަށް -- ސަން ފޮޓޯ/ މުހައްމަދު ހައްޔާން
ހޯމް މިނިސްޓްރީން އަންނަނީ، ބިދޭސީ މަސައްކަތްތެރިންނަށް ދޫކޮށްފައިވާ ހުއްދަތަކާ ގުޅިގެން، ވަޒީފާދޭ ފަރާތްތަކުން ދައުލަތަށް ދައްކަން ޖެހޭ ފައިސާ ހޯދުމަށް މަސައްކަތްތަކެއް ކުރަމުންނެވެ. އެގޮތުން އެފަދަ ފަރާތްތަކުން ނުދައްކާ ހުރި ފީތަކާއި ޖޫރިމަނާތަކުގެ އަދަދު އެއް ލައްކަ ރުފިޔާއަށްވުރެ އިތުރުވާ 1،026 ކުންފުންޏެއްގެ ނަން ހިމެނޭ ލިސްޓެއް މިދިޔަ މަހުގެ 24ގައި އާންމުކޮށްފައެވެ. އެ ދުވަހު މިނިސްޓްރީން އެންގީ މިމަހުގެ 12ވަނަ ދުވަހުގެ ކުރިން އެ ފައިސާ ދައުލަތަށް ދައްކައި ޚަލާސްކުރުމަށެވެ.
އާންމުކޮށްފައިވާ ލިސްޓުގައި ހިމެނޭ ކުންފުނިތަކުން ދައުލަތަށް ލިބެންޖެހޭ ފައިސާގެ އަދަދު 672 މިލިއަން ރުފިޔާއަށް އަރާއިރު، އޭގެ ތެރެއިން 182 މިލިއަނަށް ވުރެ ގިނަ ފައިސާ މިދިޔަ ބުދަ ދުވަހުގެ ރޭގެ ނިޔަލަށް އެ ލިބިފައިވާ ކަމަށް މިނިސްޓްރީން ބުނެފައިވެއެވެ.
މިއަދު އިހުސާން ވިދާޅުވީ، ބިދޭސީންނަށް ވަޒީފާ ދޭ ފަރާތްތަކުގެ އަތުން ފައިސާ ހޯދުމުގެ ފިޔަވަޅުތައް މީގެ ކުރިން ތަންފީޒު ނުކޮށް އޮތުމަށް ފަހު މިހާރު ގިނަ އަދަދަކަށް ފައިސާ ދައްކަން އެންގުމުން، ވަޒީފާ ދޭ ފަރާތްތަކަށް ދަތިވާނެ ކަން ގަބޫލު ކުރައްވާ ކަމަށެވެ. އެހެންވެ، އެ ފައިސާ އަހަރެއްހާ ދުވަހަށް ބަހާލައިގެން ދެއްކުމުގެ ފުރުސަތު ދޭނެ ކަމަށް އޭނާ ވިދާޅުވިއެވެ.
"މިހެން ދާން ބަލާއިރުގައި ރަނގަޅަށް ވިޔަފާރިކުރައްވަމުން އައި ބޭފުޅުން ފައިނޭންޝަލީ ދިމާވި ކަމަކާ ހެދި މިކަމުގެ ތެރޭގައި ދައްކަން ޖެހޭ ފައިސާ ނުދެއްކި ހުރެދާނެ އެހެންވެއްޖެއްޔާ ހިނގާށޭ އަޅުގަނޑުމެން ސެޓްލްމެންޓަކަށް ދައުލަތާ އެކުގައި އަށް މަސް ދުވަސް، 12 މަސް ދުވަހަށް،" އިހުސާން ވިދާޅުވިއެވެ.
ވަޒީފާ ދޭ ފަރާތްތައް އެފަދަ އެއްބަސްވުމަކަށް އައުމުން އެ ކުންފުނިތަކަށް ފިޔަވަޅު ނާޅާނެ ކަމުގެ ޔަގީންކަން އޭނާ ދެއްވިއެވެ.
ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭ ހައްލު ކުރުމަށް މި ސަރުކާރުން ވަނީ އަމާޒު ހިފައިފައެވެ. އެ މަސައްކަތުގެ ތެރެއިން، ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކޮށް، ގަވާއިދާ ޚިލާފަށް އުޅޭ މީހުން ގަވައިދަށް ފެއްތުމުގެ މަސައްކަތްތައް ވެސް އަންނަނީ ކުރަމުންނެވެ.