ބިދޭސީ މަސައްކަތްތެރިން ރާއްޖެ ގެނައުމަށްޓަކައި، ސަރުކާރަށް ދައްކަންޖެހޭ ފީ ބޮޑު ކުރެވޭގޮތަށް ވަޒީފާއާ ބެހޭ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.
ސަރުކާރުގެ ފަރާތުން މި ބިލު މަޖިލީހަށް ހުށަހަޅުއްވާފައިވަނީ ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދެވެ.
އެ ބިލު ދިރާސާކޮށް މަސައްކަތް ނިންމި ގޮތުގެ ރިޕޯޓު، ސަލާމަތީ ޚިދުމަތްތަކާ ބެހޭ ކޮމިޓީ 241 ކޮމިޓީން ވަނީ މިއަދުގެ ޖަލްސާއަށް ހުށަހަޅާފައެވެ. މި ބިލު ފާސްކުރަން ވޯޓު ދީފައިވަނީ 65 މެންބަރުންނެވެ. އެ ބިލާ ދެކޮޅަށް އެމްޑީޕީގެ 10 މެންބަރުން ވަނީ ވޯޓުދީފައެވެ.
ބިދޭސީ މަސައްކަތްތެރިންގެ ފީ ބޮޑު ކުރުމަށް ދެކޮޅު ހައްދަވައި މާމިގިލީ ދާއިރާގެ މެންބަރު ގާސިމް އިބްރާހީމް ވަނީ މީގެ ކުރިން މާލިއްޔަތު ކޮމިޓީގައި ނުރުހުން ފާޅު ކުރައްވާފައެވެ. މިއަދު ނެގި ވޯޓުގައި ގާސިމް ބައިވެރިވެވަޑައިގެންފައެއް ވެސް ނުވެއެވެ.
މަޖިލީހުގެ ޖަލްސާއެއްގައި މާމިގިލީ ދާއިރާގެ މެންބަރު ގާސިމް އިބްރާހީމް ވާހަކަދައްކަވަނީ -- ފޮޓޯ/ މަޖިލިސް
އޭރު ގާސިމް ވަނީ ބިދޭސީންގެ އަތުން ނަގާ ކޯޓާ ފީ ބޮޑުކުރުމާ ވެސް ދެކޮޅު ހައްދަވައި، އެ އަދަދު ބޮޑުކޮށްގެން ނުވާނެ ކަމަށް ވިދާޅުވެފައެވެ.
ގާނޫނުގައި ބަޔާންކޮށްފައި އޮންނަ ގޮތުން ބިދޭސީ މަސައްކަތްތެރިން ވޯކް ޕާމިޓުގެ ގޮތުގައި 350 ރުފިޔާ ދައްކަންޖެހެއެވެ. އަދި، ކޯޓާ ފީގެ ގޮތުގައި އަހަރަކު 2،000 ރުފިޔާ ދައްކަންޖެހެއެވެ.
ސަރުކާރުގެ ފަރާތުން ވަޒީފާއާބެހޭ ގާނޫނަށް ހުށަހެޅި އިސްލާހުގެ ދަށުން ކޮންމެ 18 މަސް ދުވަހަކުން އެއްފަހަރު އެ އަދަދު ބަދަލުކުރުމުގެ އިޚުތިޔާރު ސަރުކާރަށް ލިބެއެވެ. އެ ބިލުގައި ބުނެފައިވާ ގޮތުގައި މުރާޖާ ކުރުމަށް ފަހު، ކަނޑައެޅުނު އަަދަދު 30 ޕަސަންޓަށް ވުރެ އިތުރުވެގެން ނުވާނެއެވެ.
ހަމައެއާއެކު އެ އިސްލާހުގައިވަނީ، އިހުމާލުވާ މީހުންގެ މައުލޫމާތު އާންމު ކުރުމާއި އެ މީހުން 50،000 ރުފިޔާއިން ޖޫރިމަނާކުރުން ހިމަނާފައެވެ. އެއާ އެކު އިހުމާލުވާ ފަރާތްތަކުން ބިދޭސީން ގެނައުމުގެ ޚިދުމަތްތައް ވަކި މުއްދަތަކަށް ދިނުން ހުއްޓާލެވޭނެ ކަމަށް ވެސް ބަޔާންކޮށްފައިވެއެވެ.
ބިދޭސީންނާ މެދު ވެވޭ އިހުމާލެއްގެ ގޮތުގައި ބަލައި ކަންކަމުގެ ތެރޭގައި ހިމަނާފައިވަނީ މުސާރަ ނުދިނުމާއި، ބިދޭސީ މަސައްކަތްތެރިޔާ ގެންނަ ވަޒީފާ ނޫން އެހެން ވަޒީފާއެއް އަދާ ކުރުވުމެވެ. އަދި، ވަޒީފާ ދޭ ފަރާތުން ފޯރުކޮށްދޭން ޖެހޭ އަސާސީ ކަންކަން ފުރިހަމަ ނުކުރުމާއި ބިދޭސީން ރާއްޖެ ގެނައުމުގައި އެ މީހުން ލައްވާ ގާނޫނާ ޚިލާފު އަމަލުތައް ހިންގުމެވެ.
އެމްޑީޕީ ޕީޖީން ބޭއްވި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރު ވާހަކަދައްކަވަނީ --- ސަން ފޮޓޯ/ ނާއިޝް ނާހިދު
ފާހަގަކޮށްލެވޭ ގޮތުގައި ބިދޭސީން ބައިލައްކަ ރުފިޔާއިން ޖޫރިމަނާ ކުރެވޭ ގޮތަށް އޮތުމުން އިދިކޮޅު އެމްޑީޕީގެ ޕާލިމެންޓްރީ ގުރޫޕްގައި ހިމެނިވަޑައިގަންނަވާ މެންބަރުން ވަނީ ކަންބޮޑުވުން ފާޅުކުރައްވާފައެވެ.
ހަމައެއާ އެކު އެއް ގައުމަކުން ބިދޭސީން ގެނެވޭނެ އަދަދު ކަނޑައެޅުމުގެ ބާރު ސަރުކާރުގެ ވަޒީރުންގެ މަޖިލީހަށް ލިބޭ ގޮތަށް ވެސް މި އިސްލާހުގައިވެއެވެ.
މިހާރު ގާނޫނު އޮންނަ ގޮތުން އެއް ގައުމަކުން އެންމެ ގިނަވެގެން ގެނެވޭނީ 100،000 މަސައްކަތްތެރިންނެވެ.
އިސްލާހުގައިވަނީ، ވަޒީފާ އަދާކުރުމަށްޓަކައި ރާއްޖެއަށް ބިދޭސީން ގެނެވޭނެ އަދަދާއި ދާއިރާތަކުގެ އިތުރުން އެއް ގައުމަކުން އެންމެ ގިނައިން ބިދޭސީން ގެނެވޭނެ އަދަދު ކަނޑައަޅާނީ ސަރުކާރުގެ ވަޒީރުންގެ މަޖިލީހުގެ ލަފާގެ މަތިން ކަމަށެވެ.
އަދި، އެ އަދަދުތައް ކަނޑައަޅަން ވާނީ ބިދޭސީން ވަޒީފާ އަދާކުރުމުގެ ސަބަބުން ރާއްޖޭގެ ވަޒީފާގެ ބާޒާރަށް ކުރާނެ އަސަރު ދެނެގަތުމަށްޓަކައި ހަދާ އެސެސްމަންޓަކަށް ފަހު ވަޒީރުންގެ މަޖިލީހުގެ ލަފާގެ މަތިން ކަމަށް ވެސް އިސްލާހުގައިވެއެވެ.
މި އެސެސްމަންޓުގައި ރާއްޖޭގެ ވަޒީފާގެ ބާޒާރުގައި ހުރި ގޮންޖެހުންތަކާއި މުހިންމު ދާއިރާތަކަށް ބިދޭސީން ބޭނުންވާ މިންވަރު ކަނޑައަޅަން ވަނީ ހިމަނާފައެވެ. އަދި، ބިދޭސީން ވަޒީފާ އަދާކުރަމުންދާ މިންވަރާ، ގަވައިފާ ޚިލާފަށް މަސައްކަތްކުރާ ބިދޭސީންގެ މިންވަރު އެ އެސެސްމަންޓުގައި ދެނެގަތުމަށް ވަނީ ހިމަނާފައެވެ.
ހުރަވީ ބިލްޑިންގް ތަޅާލުމުގެ މަސައްކަތް ކުރިއަށްދަނީ: ބިދޭސީ މަސައްކަތްތެރިންގެ ފީތައް ބޮޑުކުރެވޭ ގޮތަށް މަޖިލީހުން ވަނީ ފާސްކޮށްފައި -- ސަން ފޮޓޯ/ މުހައްމަދު ހައްޔާން
އެސެސްމަންޓަށް ފަހު ވަޒީރުންގެ މަޖިލީހުން ގޮތެއް ކަނޑައެޅުމުގައި ބަލަންޖެހޭ ކަންކަން ވެސް މި އިސްލާހުގައި ބަޔާންކޮށްފައިވެއެވެ. އެ ގޮތުން:
- ގައުމުގެ އިގުތިސާދީ ނުވަތަ އިޖުތިމާއީ ތަރައްގީއަށް މުހިންމު ސިނާއަތެއް ނުވަތަ ވިޔަފާރިއެއް ނުވަތަ ފަންނެއް ކުރިއެރުވުމަށް ކޮންމެހެން މުހިންމު ވަޒީފާތަކަށް އެކަށީގެންވާ އަދަދަކަށް، ކަމުގެ ހުނަރު ލިބިފައިވާ މަސައްކަތްތެރިން ލިބެން ނެތުން ނުވަތަ ލިބޭ މިންވަރު މަދުވުން.
- ވަކި ދާއިރާއެއްގެ ވަޒީފާއަށް ބިދޭސީން ނެގުމުގެ ސަބަބުން އެ ދާއިރާއެއްގައި އިލްމާއި ހުނަރު އިތުރުވުމުގެ ފުރުސަތު އޮތް މިންވަރު.
- ވަކި ދާއިރާއެއްގެ ވަޒީފާއަށް އެއްވެސް ފަރާތެއް ނުލިބިއްޖެނަމަ ނުވަތަ ލިބޭ މިންވަރު މަދުވެއްޖެނަމަ އެ ދާއިރާއެއްގެ ތަރައްގީއަށް ކުރާނެ ނޭދެވޭ އަސަރު.
- ވަކި ދާއިރާއެއްގައި ބިދޭސީ މަސައްކަތްތެރިން ހިމެނުމުގެ ސަބަބުން ނުވަތަ އެފަދަ މަސައްކަތްތެރިންގެ އަދަދު އިތުރުވުމުގެ ސަބަބުން ދާޚިލީ އަދި ގައުމީ ސަލާމަތަށް އަސަރުކޮށްފާނެ މިންވަރު.
- ރާއްޖޭގެ ވަޒީފާގެ ބާޒާރަށް ކޮށްފާނެ އަސަރު ދެނެގަތުމަށް ރިއާޔަތްކުރުން.
ހަމައެއާ އެކު ކަނޑައަޅާ އަދަދަށް ވުރެ އިތުރަށް ބިދޭސީން އުޅޭނަމަ އެ އަދަދަށް ހިފެހެއްޓުމަށްޓަކައި އަޅަން ޖެހޭ ފިޔަވަޅުތަކާއި އެކަން ކޮށް ނިންމަން ޖެހޭ މުއްދަތު ވެސް ގަވާއިދުގައި ބަޔާން ކުރަން ޖެހޭނެ ކަމަށް އިސްލާހުގައި ބުނެފައިވެއެވެ.
ނަމަވެސް، އެ މުއްދަތު ކަނޑައަޅަން ވާނީ އެކަށީގެންވާ ނޯޓިސް މުއްދަތެއް ދިނުމަށް ފަހުގައި ކަމަށް އިސްލާހުގައި ބަޔާންކޮށްފައިވެއެވެ. އަދި، އެ މުއްދަތު 36 މަސް ދުވަހަށް ވުރެ އިތުރުވެގެން ނުވާނެއެވެ.