ރިޔާސީ ދައުރު ފެށޭ ދުވަސް ކުރިން ވެސް އޮތް ގޮތަށް ނޮވެމްބަރު 11 އަށް ބަދަލުކުރަން ގާނޫނުއަސާސީއަށް އިސްލާހެއް ހުށަހަޅުއްވާނެ ކަމަށް ބަންޑާރަނައިބު އަހުމަދު އުޝާމް މިއަދު ވިދާޅުވެއްޖެއެވެ.
ރާއްޖޭގެ ދެވަނަ ޖުމްހޫރިއްޔާ ގާއިމް ކުރެވުނީ 11 ނޮވެމްބަރު 1968 ގައެވެ. ކޮންމެ ފަސް އަހަރަކުން މި ދުވަހަކީ ޖުމްހޫރިއްޔާގެ ދައުރު ހަމަވާ އަހަރެވެ.
އެކަމަކު، 2013 ވަނަ އަހަރު ބޭއްވި ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބާތިލް ކުރުމުން، އެ އަހަރުގެ ނޮވެމްބަރު 11 އަށް އާ ރައީސަކު އިންތިޚާބު ނުކުރެވި، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހުވާކުރެއްވީ އެ އަހަރުގެ ނޮވެމްބަރު 17 ގައެވެ.
އޭގެ ފަހުން ވެރިކަމުގެ ދައުރު ގުނަމުން އަންނަނީ ނޮވެމްބަރު 17 އިން ފެށިގެންނެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ބަންޑާރަނައިބު އަހުމަދު އުޝާމް ވިދާޅުވީ، ސަރުކާރުގެ ފަރާތުން ގާނޫނުއަސާސީއަށް ބައެއް އިސްލާހުތައް ހުށަހަޅަން ގަސްތުކުރާ ކަމަށެވެ. އޭގެ ތެރޭގައި ހިމެނޭ އެއް ކަމަކީ ރިޔާސީ ދައުރު ފަށައި ދުވަސް ނޮވެމްބަރު 11 އަށް އަލުން އަނބުރާ ބަދަލު ކުރުމެވެ.
"އެ އިސްލާހަކީ އެ އިސްލާހު ގެނައުމަށްޓަކައި ރިފަރެންޑަމްއަކަށް ދާންޖެހޭނެ ކަހަލަ އިސްލާހެއް ކަމަށްވާތީވެ، މި ކަހަލަ އިސްލާހުތަކަށް ކުޑަކުޑަ ވަގުތުކޮޅެއް ނަގައި،" ބަންޑާރަނައިބު ވިދާޅުވިއެވެ.
މީގެ އިތުރުން، ގާނޫނުއަސާސީގައި ދިވެހިރާއްޖޭގެ ސަރަހައްދު ލިޔަން ވެސް ސަރުކާރުން ވަނީ ނިންމައިފައެވެ.
ބަންޑާރަނައިބު ވިދާޅުވީ، ރާއްޖޭގެ ސަރަހައްދު މިހާރު ލިޔެފައި އޮންނަނީ ގާނޫނެއްގައި ކަމަށެވެ. އެހެންވެ، ގާނޫނުއަސާސީގައި ރާއްޖޭގެ ސަރަހައްދު ލިޔަން ސަރުކާރުން ގަސްތުކުރާ ކަމަށާއި އެ މާއްދާގައި އެ ސަރަހައްދަށް ބަދަލެއް އަންނަ ނަމަ އަމަލުކުރަންޖެހޭނެ ގޮތް ވެސް ލިޔާނެ ކަމަށް އޭނާ ވިދާޅުވިއެވެ.
ސަރުކާރުން ދެން ހުށަހަޅަނީ ރައްޔިތުންގެ މަޖިލީސް މެންބަރުންގެ އަދަދު ލިމިޓުކުރާށެވެ. އެ އިސްލާހާ އެކު މަޖިލީސް މެންބަރުންގެ ރިކޯލް ވޯޓު ނަގަންޖެހޭ ހާލަތެއްގައި އަމަލުކުރާނެ ގޮތެއް ވެސް ގާނޫނުއަސާސީގައި ލިޔުމާ މެދު ދިރާސާ ކުރަމުންދާ ކަމަށް ބަންޑާރަނައިބު ވިދާޅުވިއެވެ.
ފާހަގަކޮށްލެވޭ ގޮތުގައި ކުރީގެ ރައީސް އިބްރާހިމް މުހައްމަދު ޞާލިޙް ވެސް ވަނީ ރިޔާސީ ދައުރު ފެށޭ ދުވަސް ނޮވެމްބަރު 11 އަށް ބަދަލުކުރައްވާނެކަމަށް ކުރިން ވިދާޅުވެފައެވެ. އެކަމަކު، އޭރު ރިޔާސީ ދައުރު ފަށައި ދުވަސް ބަދަލު ނުކުރެވުނީ ގާނޫނުއަސާސީއަށް ބަދަލު ގެންނަންޖެހޭތީއެވެ.
އެހެންވެ، ރައީސް ޑރ. މުހައްމަދު މުއިއްޒު ވެސް ވެރިކަމުގެ ހުވައިކުރެއްވީ މިދިޔަ ނޮވެމްބަރު 17 ގައެވެ.