ސްކޭމްގެ މައްސަލަތަކުގައި ބޭންކު އެކައުންޓުތަކުގައި ދައުރުވާ ފައިސާ ކޯޓު އަމުރަކާ ނުލާ، ފުލުހުންނަށް ހުއްޓުވޭގޮތަށް ޖިނާއީ އިޖުރާއަތުގެ ގާނޫނަށް މިއަދު އިސްލާހެއް ހުށަހަޅައިފިއެވެ.
މަޖިލީހުގެ މިއަދުގެ ޖަލްސާއަށް މި ބިލު ވަނީ ތައާރަފުކޮށްފައެވެ. މި އިސްލާހު ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ)އެވެ.
މި އިސްލާހު ހުށަހެޅުމުގެ ބޭނުމެއްގެ ގޮތުގައި ފާހަގަކޮށްފައިވަނީ، މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި މިދިޔަ މަހުގެ 31 ގައި ފުލުހުން އެދުމާ ގުޅިގެންނެވެ. އެގޮތުން، ސްކޭމްގެ މައްސަލަތަކުގައި ފައިސާގެ މުއާމަލާތްތައް ހުއްޓުވުމަށް ގާނޫނީ ހައްލެއް ބޭނުންވާކަމަށް އެ ކޮމިޓީގައި ފުލުހުން ބުނެފައިވެއެވެ.
އެ ކޮމިޓީގައި ފުލުހުން ބުނެފައިވަނީ މި ކަމަކީ އަވަސްގޮތަކަށް ހައްލެއް ނުގެނެވިއްޖެނަމަ ރައްޔިތުންނާއި ގައުމަށް އިންތިހާއަށް ގެއްލުން ލިބިދާނެ ކަމެއް ކަމަށެވެ.
މި އިސްލާހު ހުށަހަޅާފައިވަނީ ޖިނާއީ އިޖުރާއަތުގެ ގާނޫނުގެ 73 ވަނަ މާއްދާގެ (ހ) އަށެވެ. އެ މާއްދާގައިވަނީ އެކައުންޓުގައިވާ ފައިސާ ހިފެހެއްޓުމާއި އެ ފައިސާއިން މުއާމަލާތްކުރުން ހުއްޓުވުމެވެ.
މިހާރު އޮންނަ ގޮތުން ނަމަ ޖިނާއީ ބޮޑު ކުށެއް ފާހަގަވާކަމަށްވާނަމަ އެ އެކައުންޓުގައިވާ ފައިސާ، ވަކި މުއްދަތަކަށް ހިފެހެއްޓުމަށް އަމުރެއް ނެރެވޭނީ ކޯޓު އަމުރަކަށް ނުވަތަ ގާނޫނު ތަންފީޒުކުރާ އިދާރާއަކަމަށެވެ.
ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ): އޭނާ ވަނީ ފުލުހުންނަށް ބޭންކް އެކައުންޓުތަކުން ފައިސާ ހިފަހައްޓަން އަމުރު ނެރެވޭ އިސްލާހެއް ހުށަހަޅުއްވާފައި -- ފޮޓޯ/ މަޖިލިސް
އެހެންނަމަވެސް، އެ އިސްލާހާ އެކު ސްކޭމްގެ މައްސަލަތަކުގައި އެކައުންޓްގައިވާ ފައިސާ ހިފެހެއްޓުމަށް ނުވަތަ އެ ފައިސާއިން މުއާމަލާތްކުރުން ހުއްޓުވުމުގެ އަމުރެއް ދިވެހި ފުލުހުންގެ ޚިދުމަތަށް ނެރެވިދާނެކަން ބަޔާންކޮށްފައިވެއެވެ. އަދި، އެފަދަ އަމުރެއް ނެރެން ވާނީ ސަބް އިންސްޕެކްޓާ އޮފް ޕޮލިސް ރޭންކުން ފެށިގެން މަތީ ރޭންކެއްގެ އޮފިސަރެއް ކަމަށް އިސްލާހުގައިވެއެވެ.
ހަމައެއާއެކު އެކައުންޓު ހިފެހެއްޓުމުގެ އަމުރު ލަސްނުކޮށް އެކައުންޓް ހުޅުވާފައިވާ ބޭންކު ނުވަތަ އިދާރާއަށާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)އަށް އަންގަންވާނެ ކަމަށް އިސްލާހުގައި ބުނެފައިވެއެވެ.
އެ ދުވަހު މިނިވަން މުއައްސަސާތަކާ ބެހޭ ކޮމިޓީގައި ފުލުހުން ވަނީ މިދިޔަ އަހަރު އޮޅުވާލައިގެން ފައިސާ ހޯދުމުގެ 1،661 މައްސަލައެއް ފުލުހަށް ރިޕޯޓުކޮށްފައިވާ ކަމަށާއި އެ ސްކޭމްތަކުން 20 މިލިއަން ރުފިޔާ ގެއްލިފައިވާ ކަމަށް ބުނެފައެވެ. އަދި، މި އަހަރުގެ ޖެނުއަރީން ޖުލައިގެ ނިޔަލަށް 1302 ސްކޭމްގެ މައްސަލަ ހުށަހަޅާފައިވެއެވެ.
ފުލުހުން ބުނި ގޮތުގައި އެންމެ ގިނައީ މާކެޓު ޕްލޭސްގައި ތަފާތު އެކި ވިޔަފާރިތަކުގެ ނަމުގައި ސްކޭމްކޮށްގެން ހުށަހަޅާ މައްސަލަތަކެވެ. އެގޮތުން، މި އަހަރު އެފަދަ 55 މައްސަލައެއް ހުށަހަޅައިފައިވާއިރު އެ މުއްދަތުގައި 13.9 މިލިއަން ރުފިޔާ ގެއްލިފައިވާ ކަމަށް ފުލުހުން ބުންޏެވެ.
ހަމައެއާ އެކު ސްކޭމްގެ މައްސަލައިގައި މިހާތަނަށް 156 މައްސަލައެއްގައި ދައުވާކޮށްދޭން އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށް ވެސް ފުލުހުން ބުންޏެވެ. އޭގެ ތެރެއިން ގިނަ މައްސަލައިގެ ޝަރީއަތްތައް ކޯޓުގައި މިހާރު ފަށާފައިވާ ކަމަށް ވެސް ބުނެފައިވެއެވެ.