މާލީ އިދާރާތަކުގެ ބޯޑަށް ސިޔާސީ މީހުން އައްޔަނުކުރެވޭ ގޮތަށް ގެނައި ބަދަލަކީ މާލީ ދާއިރާއަށް ހަމަ ސީދާ ސިޔާސީ ނުފޫޒު ފޯރުވުމަށްޓަކައި ގެނައި ބަދަލެއް ކަމަށް މިދިޔަ އެމްޑީޕީ ސަރުކާރުގެ ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެއެވެ.
މިދިޔަ ބުރާސްފަތި ދުވަހު ބޭންކުތަކާއި އިންޝުއަރެންސް ޚިދުމަތްދޭ ކުންފުނިތަކާއި މާލީ ކުންފުނިތަކުގެ ބޯޑަށް ސިޔާސީ މީހުން އައްޔަންކުރެވޭ ގޮތަށް ބޭންކްތަކާއި އިންޝުއަރެންސް ކުންފުނިތައް އަދި މާލީ ކުންފުނިތަކުގެ ކޯޕަރޭޓް ގަވަނެންސް ގަވާއިދަށް މަރުކަޒީ ބޭންކު، އެމްއެމްއޭއިން ވަނީ އިސްލާހު ގެނައުމަށް ފަހު ގެޒެޓުކޮށްފައެވެ.
މި ބަދަލާ ގުޅިގެން "ސަން"އާ ވާހަކަދައްކަވަމުން އަމީރު ވިދާޅުވީ، އެ ބަދަލަކީ ރާއްޖޭގެ މާލީ ދާއިރާއަށް މިހާތަނަށް އަލަށް ގެނެވުނު ބަދަލެއް ކަމަށެވެ. އަދި، އެ ކަމަކީ ވަރަށް ބޮޑަށް ކަންބޮޑުވާ ކަމެއް ކަމަށް ވެސް އަމީރު ވިދާޅުވިއެވެ.
މާލީ އިދާރާތަކާއި އެމްއެމްއޭގެ އިތުރުން އެހެނިހެން ބޭންކުތަކަކީ ވަރަށް މިނިވަންކޮށް ހިންގަންޖެހޭ ތަންތަން. ސަރުކާރުގެ ބަޖެޓަށް ބަރޯސާވެގެން ހިންގަންޖެހޭ ތަންތަނެއް ނޫން. މި ގެނައި ބަދަލަކީ މާލީ އިދާރާތަކުގެ މައްޗަށް މި ސަރުކާރުން ނުފޫޒު ފޯރުވުމަށްޓަކައި ގެނައި ބަދަލެއް ކަމަށް ބެލެވެނީ، ކުރީގެ ފިނޭންސް މިނިސްޓަރު އިބްރާހިމް އަމީރު
އަމީރު ވިދާޅުވީ، މި ގެނައި ބަދަލާ އެކު ބޭންކް އޮފް މޯލްޑިވްސް (ބީއެމްއެލް)އަށް ވެސް ބޮޑު ގޮންޖެހުމަކަށް ވާނެ ކަމަށެވެ. ބަދަލާ އެކު ސިޔާސީ ނުފޫޒު ބޭންކަށް ވެސް ވަންނާނެ ކަމަށް އަމީރު ތުހުމަތުކުރެއްވިއެވެ.
މި ބަދަލަކީ ބައިނަލްއަގުވާމީ ރޭޓިން އެޖެންސީތަކުން ވެސް ގޯސް ބަދަލެއްގެ ގޮތުގައި ނަގާނެ ކަމެއް ކަމަށް ވިދާޅުވެ، އަމީރު ވަނީ ކަންބޮޑުވުން ފާޅުކުރައްވާފައެވެ. އެ އެޖެންސީތަކުން އެންމެ މުހިންމު ކަމެއްގެ ގޮތުގައި ބަލާނީ އެ އިދާރާއަކީ ނުވަތަ ބޭންކުތަކަކީ ޕޮލިޓިކަލް އިންޑިޕެންޑެންޓް ތަނަކަށްވުން ކަމަށް އަމީރު ފާހަގަކުރެއްވިއެވެ.
ސަރުކާރުން ގެނައި ބަދަލަކީ ގޯސް ބަދަލެއްކަން ފާހަގަކުރައްވާ އަމީރު ވިދާޅުވީ، މާލީ އެހެން އިދާރާތަކުގެ ބޯޑަށް އައްޔަނުކުރަންޖެހޭނީ ސިޔާސީ މީހުންގެ ބަދަލުގައި ކަމަށް ގާބިލު މީހުން ކަމަށެވެ. އެގޮތުން، މިދިޔަ ސަރުކާރުން ވެސް ކަންކޮށްފައިވާނީ އެފަދައިން ކަމަށް އަމީރު ވިދާޅުވިއެވެ.
އެގޮތުން، މާލީ އިދާރާތަކަށް ނުވަތަ ބޭންކުތަކަށް އެއްވެސް ސިޔާސީ ނުފޫޒެއް ފޯރުވާފައެއް ނޯންނާނެ ކަމަށް އަމީރު ވިދާޅުވިއެވެ.
މި ބަދަލު ގެނައުމުގެ ކުރިން ގަވާއިދުގައި އޮންނަނީ ކެބިނެޓު މިނިސްޓަރުންނާއި މިނިވަން މުއައްސަސާތަކުގެ ވެރިން އަދި ސިޔާސީ ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުންގެ އިތުރުން ސަރުކާރުގެ އެއްވެސް މިނިސްޓްރީއެއްގެ އެއްވެސް މަގާމަކަށް ރައީސް އައްޔަނުކުރައްވާފައި ހުންނަވާ ބޭފުޅަކަށް ބޭންކުތަކާއި އިންޝުއަރެންސް ކުންފުނިތަކުގެ ބޯޑު މެންބަރުކަން ނުކުރެއްވޭނެ ކަމަށެވެ.
މީގެ އިތުރުން، އެމްއެމްއޭގެ އޮނިގަނޑަށް ވެސް ވަނީ މި ފަހުން ބަދަލެއް ގެނެސްފައެވެ. އެ ބަދަލަކީ މަނިޓަރީ ޕޮލިސީ ރިސާޗް އެންޑް ސްޓެޓިސްޓިކްސް ދާއިރާއާއި، ފައިނޭންޝަން ސްޓެބިލިޓީ ދާއިރާއާއި، ބޭންކިން އޮޕަރެޝަންސް ދާއިރާއާއި، ކޯޕަރޭޓް ސާވިސްގެ އިތުރުން ފައިނޭންޝަލް ސެކްޓާ ޑިވަލޮޕްމަންޓް ދާއިރާއިން ކޮންމެ ދާއިރާއަކަށް މެނޭޖިން ޑިރެކްޓަރަކު އައްޔަނުކުރުމެވެ.
އެމްއެމްއޭއިން ވަނީ އެ މަގާމުތަކަށް ކުރިމަތިލުމަށް ހުޅުވައިލައިފައެވެ.
މި ކަމާ ގުޅިގެން އަމީރު ވިދާޅުވީ، ބޭންކުން މުސާރަ ދީގެން އެ މަގާމުތަކަށް ރަނގަޅު ކޮލިޓީ ބޭފުޅުން ނަގައިގެން މަސައްކަތްކުރުމަކީ އޭގެ ނަތީޖާ ރަނގަޅުވެދާނެ ކަމެއް ކަމަށެވެ. އެހެންނަމަވެސް، އެ ކަމަށް ވެސް ސިޔާސީ ނުފޫޒު ވަނުމުގެ ޖާގަ ދީފިނަމަ ނުކުންނާނެ ނަތީޖާ ވެސް ގޯސްވާނެ ކަމަށް އޭނާ ވިދާޅުވިއެވެ.
އެމްއެމްއޭގެ އޮނިގަނޑަށް ގެނައި ބަދަލާ އެކު ސަރުކާރު ކޯލިޝަންގައި ހިމެނޭ މޯލްޑިވްސް ނެޝަނަލް ޕާޓީ (އެންއެންޕީ)ން ވެސް ވަނީ ކަންބޮޑުވުން ފާޅުކޮށްފައެވެ.