ބޭންކްތަކާއި އިންޝުއަރެންސް ޚިދުމަތްދޭ ކުންފުނިތަކާއި މާލީ ކުންފުނިތަކުގެ ބޯޑަށް ސިޔާސީ މީހުން އައްޔަންކުރެވޭ ގޮތަށް ބޭންކްތަކާއި އިންޝުއަރެންސް ކުންފުނިތައް އަދި މާލީ ކުންފުނިތަކުގެ ކޯޕަރޭޓް ގަވަނެންސް ގަވާއިދަށް އިސްލާހު ގެނެސްފިއެވެ.
އެ ގަވާއިދަށް އިސްލާހު ގެނެސް، މަރުކަޒީ ބޭންކް، އެމްއެމްއޭއިން ގެޒެޓުކޮށްފައިވަނީ މިދިޔަ ބުރާސްފަތި ދުވަހުއެވެ.
ގެޒެޓުކުރުމާ އެކު އަމަލުކުރަން ފަށާ ގޮތަށް ގެނައި އިސްލާހާ އެކު ކެބިނެޓު މިނިސްޓަރުންނާއި މިނިވަން މުއައްސަސާތަކުގެ ވެރިން އަދި ސިޔާސީ ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުން ފިޔަވައި އެހެން ސިޔާސީ މަގާމުތަކުގައި ތިއްބަވާ ބޭފުޅުންނަށް ބޭންކުތަކާއި އިންޝުއަރެންސް ކުންފުނިތައް އަދި މާލީ ޚިދުމަތްދޭ ކުންފުނިތަކުގެ ބޯޑު މެންބަރުކަން ކުރެއްވޭނެއެވެ.
މި ގަވާއިދު ކުރިން އޮތް ގޮތުން، މިހާރު އެ ގަވާއިދުގައި ބަޔާންކުރާ ސިޔާސީ ބޭފުޅުންގެ އިތުރުން، ސަރުކާރުގެ އެއްވެސް މިނިސްޓްރީއެއްގެ އެއްވެސް މަގާމަކަށް ރައީސް އައްޔަންކުރައްވާފައި ހުންނަވާ ބޭފުޅަކަށް ބޭންކްތަކާއި އިންޝުއަރެންސް ކުންފުނިތައް އަދި މާލީ ޚިދުމަތްދޭ ކުންފުނިތަކުގެ ބޯޑު މެންބަރުކަން ނުކުރެއްވޭނެއެވެ.
ފާހަގަކޮށްލެވޭ ގޮތުގައި އެމްއެމްއޭގެ އޮނިގަނޑަށް ބަދަލު ގެނެސް ފަސް މެނޭޖިން ޑިރެކްޓަރުން އައްޔަންކުރާ ގޮތަށް ވެސް ވަނީ ބަދަލު ގެނެސްފައެވެ.
އެހެންވެ، ބުރާސްފަތި ދުވަހު އެމްއެމްއޭއިން ވަނީ ފަސް މެނޭޖިން ޑިރެކްޓަރުންގެ މަގާމަށް ކުރިމަތިލާން ވެސް ހުޅުވާލައިފައެވެ.
އެމްއެމްއޭއިން މެނޭޖިން ޑިރެކްޓަރުން އައްޔަންކުރުމަށް އިއުލާނުކޮށްފައިވާ ފަސް ދާއިރާއަކީ:
- މަނިޓަރީ ޕޮލިސީ، ރިސާޗް އެންޑް ސްޓެޓިސްޓިކްސް
- ފައިނޭންޝަލް ސްޓެބިލިޓީ
- ބޭންކިން އޮޕަރޭޝަންސް
- ކޯޕޮރޭޓް ސާވިސަސް
- ފައިނޭންޝަލް ސެކްޓާ ޑިވަލަޕްމަންޓް
އެ އޮތޯރިޓީން އިއުލާނުކޮށްފައިވާ މި މަގާމުގެ މުއްދަތަކީ ފަސް އަހަރުގެ ދެ ދައުރެކެވެ. އަދި، އިއުލާން ކޮށްފައިވާ ފަސް މަގާމުގެ މުސާރައާ އިނާޔަތްތަކަކީ 50،000 ރުފިޔާއާ 55،000 ރުފިޔާއާ ދެމެދުގެ އަދަދެއް ކަމަށް އެމްއެމްއޭއިން ވަނީ ބުނެފައެވެ.
ފާހަގަކޮށްލެވޭ ގޮތުގައި އެމްއެމްއޭގެ އޮނިގަނޑަށް އެ ގެނައި ބަދަލާ ގުޅިގެން ސަރުކާރު ހިންގާ ކޯލިޝަންގައި ހިމެނޭ އެމްއެންޕީން ވެސް ވަނީ ކަންބޮޑުވުން ފާޅުކޮށްފައެވެ.