ދެ ގައުމުގެ ގުޅުން ބިނާވާނީ ދެ ގައުމުން ވެސް ބޭނުންވާ ކަންކަމުގެ މައްޗަށް ކަމަށް އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު މިއަދު ވިދާޅުވެއްޖެއެވެ.
ޖައިޝަންކަރު މި ފަދައިން ވިދާޅުވީ، މި ވަގުތު ރާއްޖެއަށް ކުރައްވާ ރަސްމީ ދަތުރުފުޅުގައި މިއަދު ރައީސް އޮފީހުގައި ބޭއްވި ރަސްމިއްޔާތުގައެވެ.
އެ ރަސްމިއްޔާތަކީ އިންޑިއާގެ އެގްޒިމް ބޭންކުން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ގާއިމުކޮށްފައިވާ ފެނާއި ނަރުދަމާ ނިޒާމްގެ މަސައްކަތްތައް ނިންމައި އިންޑިއާ ސަރުކާރުން ރާއްޖޭގެ ސަރުކާރާ ހަވާލުކުރުމަށް ބޭއްވި ރަސްމިއްޔާތެކެވެ.
އިންޑިއާ ސަރުކާރުގެ ފަރާތުން އެ މަޝްރޫއުތަކުގެ މަސައްކަތް ނިންމާ ރަސްމީކޮށް ހަވާލުކޮށްދެއްވުމަށް ފަހު ޖައިޝަންކަރު ވިދާޅުވީ، ރާއްޖެއާއި އިންޑިއާއާ ދެމެދު އޮންނަ ގުޅުމުގެ މައިގަނޑު އަސާސަކީ ދެ ގައުމުން ވެސް ބޭނުންވާ ކަންތައްތައް ކަމަށެވެ.
އޭގެ ތެރޭގައި، ސިއްހީ ދާއިރާއާއި، ތައުލީމާއި، އުމްރާނީ ތަރައްގީއާއި، ދިފާއީ ކަންކަމާއި، މެރިޓައިމް، ދަނޑުވެރިކަމުގެ ދާއިރާގެ އިތުރުން ބޭންކިން އަދި މޫސުމަށް އަންނަ ބަދަލުތަކަށް ބޭނުންވާ އެހީތެރިކަން ފޯރުކޮށްދިނުން ވެސް ހިމެނޭ ކަމަށް އޭނާ ވިދާޅުވިއެވެ.
މި ލިސްޓު އިތުރަށް ފުޅާކޮށް، އަޅުގަނޑުމެންގެ ޕާޓްނާޝިޕްގެ ބޭނުން ހިފައި، އަޅުގަނޑުމެންގެ ރައްޔިތުން ބޭނުންވާ ކަންތައްތައް ހަގީގަތަކަށް ހެދުމަކީ، އަޅުގަނޑުމެން އިސްކަންދީގެން ކުރާ މަސައްކަތެއް، އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު
އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު: މިއަދު ރައީސް އޮފީހުގައި އޮތް ރަސްމިއްޔާތުގައި އޭނާ ވިދާޅުވީ ދެ ގައުމުގެ ގުޅުން ބިނާވާނީ ދެ ގައުމުން ބޭނުންވާ ކަންކަމުގެ މައްޗަށް ކަމަށް -- ފޮޓޯ/ ރައީސް އޮފީސް
ހަމައެއާ އެކު ދެ ގައުމުގެ ދެމެދުގައި އޮތް ތަރައްގީގެ ޕާޓްނާޝިޕަކީ ދިވެހި ރައްޔިތުންނާއި ދިވެހި ސަރުކާރުގެ ބޭނުންތަކަށް އިސްކަންދޭ ކަންތައްތަކުގެ މައްޗަށް ބިނާވެފައިވާ ޕާޓްނާޝިޕެއްކަމަށް އޭނާ ވިދާޅުވިއެވެ. އެ ގޮތުން، ހިލޭ އެހީއާއި، ލޯނާއި، ބަޖެޓް ސަޕޯޓުގެ އިތުރުން އެކި ދާއިރާތަކުން ޓްރެއިނިން ދިނުން އޭގެ ތެރޭގައި ހިމެނޭ ކަމަށް ޖައިޝަންކަރު ވިދާޅުވިއެވެ.
ހަމައެއާ އެކު މިއަދު ނިންމާ ހަވާލުކުރި ޕްރޮޖެކްޓުތަކުގެ ސަބަބުން 28،000 ދިވެހި ރައްޔިތުންނަށް ފައިދާތަކެއް ލިބޭނެ ކަމަށް ގަބޫލުކުރައްވާ ކަމަށް ޖައިޝަންކަރު ވިދާޅުވިއެވެ. އަދި، އެ ޕްރޮޖެކްޓާ އެކު އެންމެ ފަހުގެ ޓެކްނޮލޮޖީގެ އެހީގައި ސާފު ބޯފެން ފޯރުކޮށްދޭނެ ކަމަށް ވެސް އޭނާ ވިދާޅުވިއެވެ.
ވާހަކަ ނިންމަވާލައްވަމުން ޖައިޝަންކަރު ވިދާޅުވީ، ރާއްޖެއަށް އެންމެ އެހީތެރިކަން ބޭނުންވާ ދާއިރާތައް އޮޅުންފިލުއްވާނެ ކަމަށެވެ. އަދި، އެ ކަމަށް ބޭނުންވާ އެހީތެރިކަން އިންޑިއާ ސަރުކާރުގެ ފަރާތުން ފޯރުކޮށްދެއްވާނެ ކަމަށް އޭނާ ވިދާޅުވިއެވެ.
ރައީސް ޑރ. މުހައްމަދު މުއިއްޒުގެ ޒައާމަތުގައި ދެ ގައުމު ގުޅިގެން ކުރެވޭ މަސައްކަތްތަކުން ދެ ގައުމުގެ ދެމެދުގައި އިތުރަށް ގުޅުން ބަދަހިވާނެ ކަމަށް އުންމީދުކުރައްވާ ކަމަށް ޖައިޝަންކަރު ވިދާޅުވިއެވެ. މިއަދުގެ ރަސްމިއްޔާތުގައި ރައީސް މުއިއްޒާއި، ރައީސް އޮފީހުގެ އިސްވެރިންނާއި، ކެބިނެޓުގެ ވަޒީރުންގެ އިތުރުން އިންޑިއާ ސަފީރު މުނު މަހާވަރު ވެސް ވަނީ ބައިވެރިވެވަޑައިގެންފައެވެ.