ދިވެހިރާއްޖޭގެ ވެރިކަމުގެ އާ އޮނިގަނޑެއް އެކުލަވައިލުމުގެ މަސައްކަތްކުރަން ފަށަން ދަ ޑިމޮކްރެޓްސްގެ ނެޝަނަލް އެސެމްބްލީން ރޭ ނިންމައިފިއެވެ.
އެ ޕާޓީއަށް ނިސްބަތްވާ އުނގޫފާރު ދާއިރާގެ ކުރީގެ މެންބަރު މުހައްމަދު ވަހީދު (ވައްޑޭ) ވަނީ ދިވެހިރާއްޖޭގެ ވެރިކަން ހިންގުމުގެ އާ އޮނިގަނޑެއްގެ ސައްލާ ހިންގަން ފަށަން ގޮވައިލާ އެ ޕާޓީގެ ނެޝަނަލް އެސެމްބްލީއަށް ގަރާރެއް ހުށަހަޅުއްވާފައެވެ.
އެ ގަރާރުގައި ބުނެފައިވާ ގޮތުގައި ދިވެހި ރައްޔިތުންގެ އެތައް ހިންމަތަކާއި މިންނަތަކުން، އަދި އެތައް ބައެއްގެ ގުރުބާނީއަކުން ހޯދުނު ފެހި ގާނޫނުއަސާސީގައި ކަނޑައަޅާފައިވާ ދައުލަތުގެ ބާރު ރައްޔިތުންގެ ކިބައިގައި އޮތްކަމާ މެދު ސުވާލު އުފެދޭ ކަމަށެވެ. އަދި، އެ ރިޔާސީ ބާރުވެރިކަން މާ ބޮޑުވެ، މާ މަތިވެރިވެގެން ގޮސްފިކަމަށް ގަބޫލުކުރެވޭ ކަމަށް ބުނެފައިވެއެވެ.
ގާނޫނުއަސާސީގައި އިން ވަކިކުރެވިފައިވާ ތިން ބާރުގެ އިންތައް ނެތިވެ ގޮސް، ވެރިކަން ހިންގުމުގެ ބާރުގެ ހައްދެއް ނެތް ނުފޫޒާއި ވަސީލަތްތަކުގެ ބޭނުންހިފައި، ގާނޫނު ހެދުމުގެ ބާރު، ވެރިކަން ހިންގުމުގެ ބާރުގެ ދަށަށް މަހާލެވޭ ސަގާފަތަކަށް ފުރޮޅި، އެކަން ތަކުރާރުވުމުގެ އާދައެއް އަށަގަނެފައިވާ ކަމަށް ވެސް ގަރާރުގައި ވަނީ ބުނެފައިވެއެވެ.
ދަ ޑިމޮކްރެޓްސްގެ ލީޑާޝިޕްގެ ބޭފުޅުން: ބައެއް ބޭފުޅުން ވަނީ މި ފަހުން އެނބުރި އެމްޑީޕީއަށް ވަޑައިގެންފައި -- ފޮޓޯ/ ޑިމޮކްރެޓްސް
ދެ ބާރު އެކުވެ، އެކަތިގަނޑަކަށްވުމުން ވާ ގޮންޖެހުންތައް ގަރާރުގައި ވަނީ ބަޔާންކޮށްފައެވެ. އެގޮތުން:
- އެ ދެ ބައިމީހުންގެ ސިއްރު ޑީލްތަކުން ޝަރުއީ ނިޒާމަށް ބާރު ހިންގުން.
- މިނިވަން މުއައްސަސާތަކުގެ މިނިވަންކަން ކަނޑުވާލުން.
- އިހުގެ އައްޔަނުކުރެވޭ ކަމިޝަނަރުންގެ ހާލަތަށް އެ މުއައްސަސާތަކުގެ ކަމިޝަނަރުންގެ ވަޒީފާގެ ޔަގީންކަން ވެރިކަން ހިންގާ ފަރާތުގެ މުށަށް ނަގާފައިވާކަން.
- ޓެކުހުންނާއި އެހެނިހެން ގޮތްގޮތުން ލިބޭ އާމްދަނީ ހޭދަކުރުމުގައި ވެރިންގެ ސިޔާސީ އިސްރާފާއި ކޮރަޕްޝަން އާންމުވުން.
- އާމްދަނީ ދެކޮޅުނުޖެއްސި ނަގާ ދަރަނި އިންތިހާއަށް ބޮޑުވެ، ގައުމުގެ ސިޔާދަތަށް ނުރައްކާ މިންވަރަށް ނުރައަކަށް ވެފައިވުން.
ރައްޔިތުންގެ މެދުގައި އިންސާފާއި އަދުލުވެރިކަމުގެ ރޮނގުން ވެރިކަން ހިންގުމުގެ ސިފަ ނެތިގެން ގޮސްފައިވާކަން ފާހަގަކޮށް ގަރާރުގައި ބުނެފައިވަނީ ދައުލަތުގެ ޚިދުމަތްތަކާއި، ދައުލަތުން ހަމަހަމަކަމާ އެކު ފޯރުވައިދޭން ޖެހޭ ފުރުސަތުތައް ފޯރުވައިދިނުމުގައި ތަފާތުކުރުން އިންތިހާއަށް ގޮސްފައިވާ ކަމަށެވެ.
އަދި ކޮންމެ ފަސް އަހަރަކުން ފަސް އަހަރަކުން ބާއްވާ ރިޔާސީ އިންތިޚާބުތަކުގައި ރައްޔިތުން ނުކުމެ، އެއިރަކު ހުންނަ ވެރިއަކު ބަދަލުކުރުމަށް އެ ނެރޭ ނަތީޖާތަކަށް ރިއާޔަތްކުރާއިރު، ދިވެހިރާއްޖޭގެ ވެރިކަމުގެ އޮނިގަނޑަށް ބޮޑެތި ބަދަލުތަކެއް އަންނާންޖެހޭ ކަމަށް މި ޕާޓީއަށް ގަބޫލުކުރެވޭ، ޑިމޮކްރެޓްސްގެ ގަރާރު
އެހެންކަމުން އެ ޕާޓީގެ އެތެރޭގެ އަދި ބޭރުގެ މަޝްވަރާ ވެސް ހިމެނޭގޮތަށް، ފުޅާ ދާއިރާއެއްގައި މަޝްވަރާއާއި ބަހުސްކުރުމަށް ފަހު، ރާއްޖޭގެ ވެރިކަމުގެ އާ އޮނިގަނޑުގެ ސިޔާސަތު ކަރުދާހެއް އެކުލަވާލުމުގެ މަސައްކަތް ކުރަން ފެށުމަށް ޑިމޮކްރެޓްސްގެ ނެޝަނަލް އެސެމްބްލީން ވަނީ އިގުރާރުވެފައެވެ.
ފާހަގަކޮށްލެވޭ ގޮތުގައި ޑިމޮކްރެޓްސް އުފެދިގެން އައީ ވެސް ރާއްޖޭގެ ވެރިކަން ހިނގަމުންދާ ގޮތާ މެދު ހިތްހަމަނުޖެހި އުފެދުނު ޚިޔާލުތަފާތުވުންތަކެއްގެ ތެރެއިންނެވެ. މިދިޔަ އެމްޑީޕީ ސަރުކާރުގައި އޭރު ރައީސް އިބްރާހީމް މުހައްމަދު ޞާލިހާއި، ކުރީގެ ރައީސް މުހައްމަދު ނަޝީދާއި ދެމެދު އުފެދުނު ޚިޔާލުތަފާތުވުންތަކެއްގެ ތެރެއިން ޕާޓީ ބައިބައިވެގެންނެވެ.
އޭރު 19 ވަނަ ރައްޔިތުންގެ މަޖިލީހުގައި ސުޕަ މެޖޯރިޓީ އޮތް އެމްޑީޕީގެ ތެރެއިން ނަޝީދަށް ތާއީދުކުރައްވާ މެންބަރުންތަކެއް ޕާޓީން ވަކިވެވަޑައިގެން ޑިމޮކްރެޓްސް އުފެއްދީއެވެ. އޭރު ރާއްޖޭގެ ވެރިކަމުގެ ނިޒާމު ބަދަލުކުރުމަށް ޑިމޮކްރެޓްސްއިން ވަރަށް ބޮޑަށް ވަކާލާތުކުރިއެވެ.
ޑިމޮކްރެޓްސްއިން އެދުނު ގޮތަށް ނިޒާމީ ވޯޓެއް ނަގަން އޭރު 19 ވަނަ މަޖިލީހުގައި ތިއްބެވި އެމްޑީޕީގެ މެންބަރުންގެ ތާއީދާ ވެސް އެކު ފާސް ވެސް ކުރިއެވެ.