"ޕާޓީ ތެރޭގައި ތި މައްސަލަ ވަރަށް ގޯސް، ހެސްކިޔާފައި ހާޑު"
ޕީއެންސީގައި އުޅުއްވާ ރައްޓެހި ރަހުމަތްތެރި ބޭފުޅެއް ގާތުގައި އެހީމާ ވާހަކަ ފެއްޓެވީ މިހެންނެވެ. ވާހަކަދެއްކެވީ ދެ ފަޅިއަށް އިރުއިރުކޮޅާ ބައްލަވަމުންނެވެ. ކިރިޔަަކިރިޔާ އިވޭ ވަރަށް މަޑުމަޑުންނެވެ.
ވަގު ފޯމުތަކުގެ މައްސަލަ އޮތީ ކެކިފައެވެ. ""އޭ، އަހަރެން މި އޮތީ ޕީއެންސީއަށް ވައްދާފައޭ،" ކިޔައި ފަހަރަކު މީހަކު ޕޯސްޓު ކުރަނީއެވެ. ގުޅަނީއެވެ. ދަންނަ އެންމެން ގާތުގައި ބުނަނީއެވެ. ވަގު ފޯމުތަކެއް ފުރައިފިއެވެ. އެކަން އެންމެން ވެސް ގަބޫލުކުރެއެވެ. ސިއްރުން ވާހަކަދެއްކި 'ބޭފުޅާ'އަށް އެކަން އެނގެން ވެސް އެނގެއެވެ.
ވީގޮތް ޕާޓީ އެންމެންނަށްހެން މިހާރު އެނގެއެވެ. އެއީ، ޕީއެންސީ އެންމެން ދަންނަ ބޮޑު ސިއްރެކެވެ.
"ރައީސް ބޭނުންފުޅުވީ ޕާޓީއަށް މެންބަރުން އިތުރުކުރަން. އެނގިފައި އޮތް ގޮތުން، ޕާޓީގެ ލީޑާޝިޕުގެ ތެރެއިން ދިން ޓާގެޓެއް 75،000 މެންބަރުންނަކީ. އެ ޓާގެޓު އެ ހާސިލުކުރީ. ކުރި ގޮތް މި ފަޅާ އެރީ،" ނުލަފާ ގޮތަކަށް ހޭން ފަށާފައި އޭނާ ވާހަކަ ނިންމާލިއެވެ. އިތުރު މައުލޫމާތެއް ނުދިނެވެ. ދެން އެ ވާހަކަ ނިންމާލީއެވެ.
ޕީއެންސީގެ ލީޑާޝިޕް، ރައީސް މުއިއްޒާ އެކު: އެ ޕާޓީއަށް 'ވަގު ފޯމު' ފުރާކަމުގެ ތުހުމަތު ވަނީ ބޮޑުވެފައި -- ފޮޓޯ/ އެލީޒް
އެތެރެއެތެރެއިން މައުލޫމާތު ލިބޭ ގޮތުން ނަމަ، އެ ކަމާ ހަވާލުވީ ބައެއް މަޖިލީސް މެންބަރުންނާއި ޕާޓީގެ ތެރޭގައި އިސްކޮށް އުޅުއްވި ބައެއް ބޭފުޅުންނެވެ. ޔަގީން ނުވާތީ، ނަމެއް ނުޖަހާނަމެވެ.
އެނގޭ މީހުން ވިދާޅުވާ ގޮތުން ނަމަ ޕީއެންސީއަށް 100،000 ފޯމު ފުރިއެވެ. އޭގެ ތެރެއިން ވަރަށް ބޮޑު ބައެއް އިލެކްޝަންސް ކޮމިޝަން (އީސީ)ން ރިޖެކްޓު ވެސް ކުރިއެވެ. ބައެއް ފޯމުތައް ބަލައިގަނެ، ޕްރޮސެސް ވެސް ކުރީއެވެ. އެނގި ތިބެ ކަމެއް، ނޭނގޭތީ ކަމެއް ނޭނގެއެވެ. އެނގެނީ ގޯހެއް އުޅޭ ކަމެވެ. މައްސަލަ ބަލަން ޖެހޭ ކަމެވެ. ކުށްވެރިވާ ބަޔަކު ތިބި ނަމަ، ބަލައި ފިޔަވަޅު އަޅަން ޖެހޭނެ ކަމެވެ.
އަނެއްކާ، މައްސަލަ އެހާ ހޫނުވެފައި އޮއްވައި ޕީއެންސީއަށް އަނބުރާލީ އެމްޑީޕީގެ އެންމެ ގަދަ އަނގައެވެ. ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ)އަކީ އެމްޑީޕީގައި މި ވަގުތު ހުންނެވި އެންމެ މަގުބޫލު މެންބަރެވެ. މަޖާ ބޭފުޅެކެވެ. މަޖިލީހުގައި ވެސް އެ ބޭފުޅާ ވާހަކަދައްކަވާއިރުގައި އަޑުއަހާ ހިތްވެއެވެ. ދޫ ވެސް ފަރިތައީއެވެ. ވާހަކަދައްކަވަން ވެސް ދަންނަނީއެވެ.
އެކަމަކު، ސަރުކާރަށް އެ ވަރަށް ފާޑު ވިދާޅުވި ފިއްޓޭ އިއްޔެ ހެނދުނު އޮތީ ޕީއެންސީގެ ރަޖިސްޓްރީއަށް ބަދަލުކޮށްފައެވެ. އޭނާއަށް ހިލަމެއް ވެސް ނުވެއެވެ. ވަގަށެވެ. ފިއްޓޭ އެކަންޏެއް ނޫނެވެ. ކުރިން އެމްޑީޕީގެ ގައުމީ މަޖިލީހުގެ މެންބަރުން ވެސް ވައްދައިގެން އެ ޕާޓީން ނުރުހުން ފާޅުކުރިއެވެ.
"މެންބަރަކަށް މިހެން ވީމާ ދެން ކޮބާ އާދައިގެ މީހަކަށް ވާނެ ގޮތަކީ،" ފިއްޓޭ އުފެއްދެވި ސުވާލަކީ މިއީއެވެ.
"ވައިކަރަދޫ ވަރަށް ގިނަ މީހުން އެއްފަހަރާ ވައްދާފައި މި އޮތީ. ދެން އެ އެންމެންގެ އެއްޗެހި [މައުލޫމާތު] މިހާރު ހޯދަން މި އުޅެނީ، ގާތްގަނޑަކަށް މި އޮތީ އޭރު [ރިޔާސީ އިންތިޚާބުގައި] އެމްޑީޕީ ކެމްޕޭނުގައި އުޅުނު އެންމެން އެއްކޮށް ބަދަލުކޮށްފައި،"
އެ މީހުން ވެއްދީއިރު ފިއްޓޭ ވެސް ވެއްދީއެވެ. އޭނާ ތުހުމަތުކުރައްވަނީ އެ ގޮތަށެވެ.
މި ވަރު ވީއިރު އީސީ ކޮބާ؟
ފޯމެއް ފުރާއިރަށް ވަގުތުން ޕާޓީ ބަދަލެއް ނުވެއެވެ. ވަގު ފޯމުތަކެއްގެ މައްސަލަ މި ރާއްޖޭގައި ޖެހުނީއަކީ އަލަކަށް ވެސް ނޫނެވެ. ކުރިން ވެސް މި ކަންތައްގަނޑު ބޮޑުވެގެން އިލެކްޝަންސް ކޮމިޝަން (އީސީ)ން އޮތީ ފިޔަވަޅުތަކެއް އަޅައިފައެވެ. މިހާރު ފޯމެއް ލިބޭއިރަށް އެ މީހެއްގެ ފޯނަށް މެސެޖު އަންނާނެއެވެ. އެއީ، ސައްހަ ނޫން ފޯމެއް ނޫން ނަމަ، އޮންލައިންކޮށް ރިޕޯޓު ކުރެވޭނެއެވެ.
އެކަމަކު، އެއީ އަދި ފުދޭ ވަރު ނޫންކަން ސާބިތުކޮށްދީފިއެވެ. ފިއްޓޭ ޕީއެންސީއަށް ވެއްދީ އެ ހުރިހާ ކަމެއް އެހެން އޮއްވައެވެ. ސުވާލަކީ ވަގަށް އެ ގޮތަށް ނޭނގި ވައްދާފައި ކިތައް މީހުން އެބަތިބި ހެއްޔެވެ؟ އަދިވެސް ނޭނގި ވެސް ތިބޭނެއެވެ.
އަމުދުން ފިއްޓޭއަކީ މަޖިލީސް މެންބަރެކެވެ. ގާނޫނުއަސާސީއަށް މި ފަހުން ގެނައި އިސްލާހާ އެކު، މެންބަރަކު އިންތިޚާބުވި ޕާޓީން ވަކިވެއްޖެ ނަމަ ގޮނޑި ވެސް ގެއްލޭނެއެވެ. އެހެންވީމާ، މިއީ އާދައިގެ ވެސް ކަމެއް ނޫނެވެ. އީސީއަށް މަޑުމަޑުން ތިބެވޭނެ ވަރުގެ މައްސަލައެއް ނޫނެވެ.
މައްސަލަ ފެންމަތިވުމުން އީސީން ވަނީ ކުއްލި ބައްދަލުވުމެއް ބާއްވައި ފިއްޓޭ އަލުން އެމްޑީޕީއަށް ބަދަލުކޮށްފައެވެ. އެކަން ކޮށްފައި އޮތީ ކަނޑައެޅިގެން ފިއްޓޭއަށް ވެސް ނޭނގި، އޭނާގެ އެއްވެސް ބައިވެރިވުމެއް ނެތި، ވަގު ފޯމެއް ބޭނުންކޮށްގެން ކަމަށްވާތީއެވެ. އެކަން އީސީއަށް ޔަގީންވީމައެވެ.
"ފިއްޓޭގެ ގޮނޑި ގެއްލެންޖެހޭ އެއްވެސް ހާލަތެއް ނެތް. ފިއްޓޭ [އަމިއްލައަށް] ޕާޓީ ބަދަލުކުރީއެއް ނޫނެއްނޫންތޯ،" މި މައްސަލަ ފެންމަތިވުމުން އީސީގެ މެންބަރު ހަސަން ޒަކަރިއްޔާ ފިއްޓޭގެ ގޮނޑި ނުގެއްލޭނެކަން ޔަގީންކޮށްދިނެވެ.
އީސީން ކުރިން ބުނި ގޮތުގައި އެ ކޮމިޝަނުން މިހާރު ވަނީ މައްސަލައަށް ހައްލެއް ހޯދާފައެވެ. އެއީ، އީފާސް މެދުވެރިކޮށް ޕާޓީ ބަދަލުކުރެވޭ ގޮތަށް އުސޫލު ބަދަލުކުރުމެވެ. އީސީގެ އަމާޒަކީ ދެ މަސް ތެރޭ އުސޫލު ބަދަލުކުރުމެވެ. ވެގެންވަންޏާ އެއަށްވުރެ ވެސް އަވަހަށެވެ. އެ މަސައްކަތް ކުރިއަށްދާ ކަމަށް އީސީން ބުންޏެވެ.
ޕީއެންސީ ހަނު
މަޖިލީހުގެ މެންބަރަކު ވަގަށް ޕީއެންސީއަށް ވެއްދުމަކީ ޕީއެންސީން ޖަވާބުދޭން ޖޭހެނެ ކަމެކެވެ. ފޯމުގައި، މިއީ ސައްހަ އެއްޗެކޭ ކިޔާފައި ދެ ހެކިވެރިން ސޮއި ވެސް ކުރެއެވެ. އެހެންވީމާ، ޕީއެންސީއަށް މި ކުރާ ހަޑިހުތުރު ބޮޑު ތުހުމަތަށް އެ ޕާޓީން ޖަވާބުދޭން ޖެހޭނެއެވެ.
ވެރިކަމާ ނޮވެމްބަރު 17، 2023 ގައި ޕީއެންސީން ހަވާލުވީއިރު އެ ޕާޓީގައި ތިބީ 3،800 އެއްހައި މެންބަރުންނެވެ.
އެކަމަކު، ވެރިކަމަށް އަހަރުވީއިރު އެ މީހުން ވަނީ 75،000 އަށްވުރެ ގިނަ މެންބަރުން ސޮއިކުރި ކަމަށް ބުނެފައެވެ. ފަހުން ވަނީ 100،000 މެންބަރުން ހަމަކުރަން ވެސް އަމާޒު ހިފާފައެވެ. އެއީ ރާއްޖޭގައި ރިކޯޑު އަދަދެކެވެ. އެންމެ ގިނަ ދުވަސްވީ، މިހާތަނަށް އެންމެ ބޮޑު އެމްޑީޕީގައި ވެސް އަދިވެސް ތިބީ 50،000 އެއްހައި މެންބަރުންނެވެ.
އެ ކަމާ އަމިއްލައަށް ހަވާލުވީ ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއިލެވެ. ފޯމުތައް ފުރުމުގައި އިސްކޮށް އުޅުނީ އޭނާ ކަމަށް އަމިއްލައަށް އޮތީ ވިދާޅުވެފައެވެ. ވަގު އެއްވެސް ފޯމެއް ނޯންނާނެ ކަމަށެވެ. ވަގު ފޯމޭ ކިޔައިގެން ހައްދަވަނީ ވެސް "100 ޕަސެންޓު ދޮގެއް" ކަމަށް އޭނާ އޮތީ އަމިއްލައަށް ވިދާޅުވެފައެވެ.
އެކަމަކު، މި މައްސަލަ ފެންމަތިވެގެން ރިޕޯޓަށް ކޮމެންޓެއް ހޯދަން ގުޅުމުން ޖަވާބެއް ނުދިނެވެ. ފޯނެއް ނުނަންގަވައެވެ. މެސެޖަށް ވެސް ޖަވާބެއް ނުދެއްވައެވެ. ފަހުން އެކްސްގައި، ޕީއެންސީއަށް މެންބަރުން ވައްދާފައިވާނީ ރައްޔިތުން ގާތަށް ގޮސްގެން ރައްޔިތުން އެދިގެން ކަމަށް ޕޯސްޓުކޮށްފައި އޮތެވެ.
ޕީއެންސީގެ ހިނގާލުމެއްގައި ރައީސް މުއިއްޒު: އެ ޕާޓީއަށް ކުރާ ތުހުމަތުތަކާ ގުޅިގެން ރަސްމީކޮށް އެއްވެސް އެއްޗެއް ނުބުނޭ -- ސަން ފޮޓޯ/ މޫސާ ނަދީމް
ސީނިއާ ޑެޕިއުޓީ ޕީޖީ ލީޑަރު އިބްރާހިމް ޝުޖާއު ވެސް އެކްސްގައި ތުހުމަތުތައް ދޮގުކުރިއެވެ. ވިދާޅުވެފައި އޮތީ، އެއީ އެމްޑީޕީން ރާވައިގެން، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ޕީއެންއެފުން ވާގިވެރިވެގެން ކޮށްފައި އޮތް ކަމެއް ކަމަށެވެ. ހަގީގީ ސުވާލަށް، ތުހުމަތަށް ޖަވާބުދެއްވުމުގެ ބަދަލުގައި އޮތީ، ދެން ހުރި ޕާޓީތަކުގެ ބޮލުގައި އެ ތުހުމަތު އަޅުވައިފައެވެ.
ރަސްމީ ބަހެއް ޕީއެންސީގެ ނެތެވެ. ބަޔާނެއް ވެސް ނެތެވެ. ދޮގެކޭ ވެސް ރަސްމީކޮށް ޕާޓީން ނުބުނެއެވެ.
މިއީ ކުޑަކުޑަ މައްސަލައެއް ނޫނެވެ. ފޯނު ނުނަންގަވާ، ޖަވާބު ނުދެއްވާ ތިއްބެވޭނެ މައްސަލައެއް ނޫނެވެ. ޕީއެންސީން ރަސްމީކޮށް ޖަވާބުދާރީވާން ޖެހޭނެއެވެ. ނޫނިއްޔާ، މިއީ ރައީސް ޑރ. މުހައްމަދު މުއިއްޒަށް ލިބިވަޑައިގަންނަވާނޭ ވަރަށް ބޮޑު ހުތުރެކެވެ. އަމުދުން، ހިތާއި ރޫހުން އެދިގެން ޕީއެންސީއަށް ސޮއިކޮށްގެން ތިބި މީހުންނަށް ވެސް ލަދެކެވެ.
ފޯމުތަކުގެ ބޮޑު އޮޑިޓެއް ކުރަން ޖެހޭނެއެވެ. ޕާޓީތަކުގެ ދަފުތަރުގައި ތިބި މެންބަރުންގެ ސައްހަކަން އަލުންބަލުން ކަށަވަރުކުރަން ޖެހޭނެއެވެ. ވަގު އެންމެ ފޯމެއް އޮތަސް، އެ މައްސަލަ ބަލަން ޖެހޭނެއެވެ. ވީގޮތް ރައްޔިތުންނަށް ސާފުވާން ޖެހޭނެއެވެ. އަމުދުން، މިއީ ތެދޭ، ޒިންމާވާނަމޭ ކިޔައި ފޯމުގައި ސޮއިކުރި ހެކިވެރިންނަށް ދައުވާ ވެސް ކުރަން ވާނެއެވެ. މިއީ ކުޑަކުޑަ ކަމެއް ނޫނެވެ. ފުޅާ ތަހުގީގެއް ހިންގަން ޖެހޭނެއެވެ. ހާމަކަން ބޮޑު ޝަރީއަތެއް ހިންގެންވާނެއެވެ. ކަމުގެ ދެފުށް ސާފުވާން ޖެހޭނެއެވެ.
އެންމެ 3،000 މެންބަރުން ވިޔަސް 75،000 ވިޔަސް، 100،000 ވިޔަސް ކަނޑަން ވާނީ ވާވަރުގެ ފޮންޏެވެ. ނޫނިއްޔާ ގޮވާނީ އަތަށެވެ. މި ފަހަރު މިވީ އެހެންނެވެ.