އަންނަ ހުކުރު ދުވަހު އިންޑިއާގެ ޚާރިޖީ ވަޒީރު ސުބްރަމާނިއަމް ޖައިޝަންކަރު ރާއްޖެ ވަޑައިގަތުމުން އައްސަވަންވީ ނިމިދިޔަ އެމްޑީޕީ ސަރުކާރާއި އިންޑިއާ ސަރުކާރު ގުޅިގެން ވިއްކާލި ރާއްޖޭގެ ކަނޑުގެ ވާހަކަ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
މިރޭ ބޭއްވި އެމްޑީޕީގެ ގައުމީ މަޖިލީހުގައި ވާހަކަ ދައްކަވަމުން ޝާހިދު ވިދާޅުވީ، މި ސަރުކާރުން ރިޔާސީ އިންތިޚާބުގެ ކެމްޕެއިންތެރޭ އެންމެ ގަދައަށް ދެއްކި އެއް ވާހަކައަކީ އޭރު ވެރިކަންކުރި އެމްޑީޕީން އިންޑިއާ ސަރުކާރާ ގުޅިގެން ރާއްޖޭގެ ކަނޑުން ބައެއް ވިއްކާލި ވާހަކަ ކަމަށެވެ.
"އަޅުގަނޑު އެދެން މިއަދުގެ ސަރުކާރުން އެންމެ ކަމަކަށް. އެއީ އެބޭފުޅުން ވެރިކަމަށް ވަޑައިގަންނަވަންވެގެން ވާހަކަފުޅު ދައްކަވާ މަގުމަތީގައި އުޅުއްވި އިރު، ޕެނަލްތައް ބާއްވައިގެން ވާހަކަދެއްކި އިރުގައި ވިދާޅުވީ، އެމްޑީޕީގެ ސަރުކާރުން ރާއްޖޭގެ ކަނޑު ވިއްކާލީއޭ. އިންޑިއާ ބައިވެރިވެގެންނޭ. ޚާރިޖީ ވަޒީރު އެ ވަޑައިގަންނަވަނީ ހުކުރު ދުވަހު. ޚާރިޖީ ވަޒީރު އަރިހުގައި އިތުރު ލާރިއަށް އެދޭއިރު، އަދި އައްސަވާލައްވަން ވާނެ (އެމްޑީޕީ ސަރުކާރާ) ބައިވެރިވެގެން ވިއްކާލި ކަނޑު ކޮބައިހެއްޔޭ،" ޝާހިދު ވިދާޅުވިއެވެ.
އޭނާ ވިދާޅުވީ، މި ސަރުކާރުން އިންޑިއާގެ ޚާރިޖީ ވަޒީރަށް ހޫނު މަރުހަބާއެއް ދަންނަވާނެ ކަމަށް އުންމީދު ކުރައްވާ ކަމަށެވެ. އަދި ރާއްޖެއާ އިންޑިއާގެ ހީނަރުވެފައިވާ ގުޅުން ރަނގަޅުކުރަން މަސައްކަތް ކުރާނެ ކަމަށް ވެސް އުންމީދު ކުރައްވާކަމަށް ކަމަށާއި ރާއްޖެއަށް މިވަގުތު ބޭނުންވާ އިތުރު އެހީތައް އިންޑިއާއިން ފޯރުކޮށްދޭނެ ކަމަށް ވެސް އުންމީދު ކުރައްވާ ކަމަށް އޭނާ ވިދާޅުވިއެވެ.
މި ސަރުކާރުން ވެރިކަމާ ހަވާލުވީ، ބޭރުގެ ގައުމުތަކާ ގުޅިގެން މަސައްކަތް ކުރަން ބޭނުންނުވާކަމަށް ބުނަމުންކަން ފާހަގަކޮށް ޝާހިދު ވިދާޅުވީ ސަރުކާރަށް ނުވަ މަސް ވީއިރު، ގިނަ ގައުމުތަކަކަށް ދަތުރުކޮށްގެން ވެސް "ބޮޑު ލާރިއެއް" ދިއްކޮށްލާނެ ގައުމަކަށް ވީ އިންޑިއާ ކަމަށެވެ.
"50 މިލިއަން ޑޮލަރުގެ ބޮންޑު ރޯލްއޯވާ ކޮށްދޭން، މޯދީ ހުވާކުރެއްވި ދަރުބާރަށް ވަޑައިގެން ދިވެހި ސަރުކާރުގެ ފަރާތުން އެދިވަޑައިގަތީމައި އެކަން ކޮށްދެއްވައިފި،" ޝާހިދު ވިދާޅުވިއެވެ.
މީގެ އިތުރުން، އިންޑިއާ ފަތުރުވެރިންގެ އަދަދު 43 ޕަސަންޓު ދަށަށްގޮސް ލިބޭ ގެއްލުމަކީ މި ސަރުކާރުގެ ގޮތެއް ނެތްކަމުން ލިބޭ ގެއްލުންކަން ހަނދާންކުރަން ޖެހޭކަމަށް ވެސް ޝާހިދު ވިދާޅުވިއެވެ.
"އޭގެ ސަބަބުން ރިސޯޓުތައް ފަޅުވެ، ރިސޯޓުތަކުގެ އޮކިއުޕެންސީ މިދިޔަ ދުވަސްތަކުގައި މި ވަނީ އިންތިހާއަށް ދަށަށް ގޮސްފައި،" ޝާހިދު ވިދާޅުވިއެވެ.
މި ސަރުކާރުން ވެރިކަމާ ހަވާލުވީ މައިގަނޑު ދެ ވައުދަކާ އެކުއެވެ. އެއީ ރާއްޖޭގައި ގާއިމުވެ ތިބި އިންޑިއާ ސިފައިން އަނބުރާ ގައުމަށް ފޮނުވާލުމާއި ދެކުނުން ކަނޑުގެ ބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް)އިން ނިންމި ނިންމުން އިސްތިއުނާފު ކުރުމެވެ.
ދިވެހިރާއްޖެއާއި މޮރިޝަސްއާ ދެމެދު ފުށުއަރާ ކަނޑުގެ އިމުގެ މައްސަލަ 58 އަހަރު ފަހުން، އިޓްލޮސްއިން ނިންމީ ރާއްޖެއިން އެދުނު ގޮތަށެވެ. އިޓްލޮސްއިން މިދިޔަ އަހަރުގެ އޭޕްރީލް 28ގައި ހުކުމް ކުރުމާ އެކު އޭރު އިދިކޮޅުގައި ތިބި ޕީޕީއެމް/ޕީއެންސީން ވަނީ ވަރަށް ބޮޑަށް ނުރުހުން ފާޅުކޮށްފައެވެ. އަދި، ކަނޑުން ބައެއް "ވިއްކައިލީ" ކަމަށް ތުހުމަތުކޮށް، އިޓްލޮސްގެ ނިންމުން އިސްތިއުނާފު ކުރަން ޖެހޭ ކަމަށް ތަކުރާރުކޮށް ގޮވައިލިއެވެ.
މި މައްސަލައިގައި އިޓްލޮސްއިން ނިންމި ނިންމުން ބަދަލުކުރުމަށް އިސްތިއުނާފަށް ހުށަހެޅުމަށްޓަކައި ބޭރުގެ އެކްސްޕާޓުންނާ ހަވާލުކޮށްފައިވާ ކަމަށް، މީގެ ކުރިން ރައީސް އޮފީހުން ވަނީ ބުނެފައެވެ.