އިންޑިއާގެ މުމްބާއީގެ ކަނޑުގެ ސިފައިންގެ ސްޕީޑްބޯޓެއް ކޮންޓްރޯލް ނުވެ، މީހުން އުފުލާ ފެރީއެއްގައި ޖެހި 13 މީހުން މަރުވެއްޖެއެވެ.
މަރުވި މީހުންގެ ތެރޭގައި ކަނޑުގެ ސިފައިންގެ ތިން މީހަކުވެސް ހިމެނެއެވެ. އެ ހާދިސާގައި ކަނޑުވި 100 އަށް ވުރެ ގިނަ މީހުން ސަލާމަތްކޮށްފައިވާ ކަމަށް މަހާރާޝްތުރާ ސްޓޭޓްގެ ޗީފް މިނިސްޓަރު ދޭވެންދްރާ ފަދްނަވިސް ވިދާޅުވިއެވެ.
އެ ހާދިސާގެ އޮންލައިންކޮށް ފޫޓޭޖްތަކުން ފެންނަ ގޮތުގައި ސްޕީޑްބޯޓު ފެރީގައި ޖެހުމުގެ ކުރިން ވަނީ ފެރީގެ ވަށައިގެން އެނބުރިފައެވެ. އޭގެފަހުން ބޯޓު ފެރީގައި ޖެހި ފެރީ ބަންޑުން ޖެހިތަން ވަނީ ފެނިފައެވެ.
އިންޑިއާ ކަނޑުގެ ސިފައިން ބުނި ގޮތުގައި ސްޕީޑް ބޯޓުގެ އިންޖީނަށް ވަނީ މައްސަލައެއް ދިމާވެފައެވެ.
ހާދިސާ ހިނގިއިރު، އަމިއްލަ ފަރާތަކުން ހިންގާ އެ ފެރީ ދަތުރުކުރަމުން ދިޔައީ ފަތުރުވެރިންގެ މަގުބޫލު މަންޒިލެއް ކަމަށްވާ އެލިފަންޓާ ކޭވްސްއަށް ކަމަށް ބީބީސީން ރިޕޯޓުކުރެއެވެ.
ހާދިސާއާ ގުޅިގެން އިންޑިއާގެ ބޮޑު ވަޒީރު ނަރެންދްރާ މޯދީ ވަނީ މަރުވި މީހުންގެ އާއިލާތަކަށް ތައުޒިއާ ކިޔުއްވައި، ޒަޚަމްވި މީހުންނަށް އަވަސް ޝިފާއެއް ދެއްވުން އެދިވަޑައިގެންފައެވެ.