ކައުންސިލްތަކުގެ މެންބަރުންގެ ގޮނޑި ހުސްވެއްޖެނަމަ އަހަރަކު ދެފަހަރު ބައި- އިލެކްޝަން ބާއްވާ ގޮތަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި އިސްލާހު ހުށަހަޅާފައި މިވަނީ ކައުންސިލްތަކުގެ މެންބަރުންގެ ގޮނޑި ހުސްވާ ހާލަތްތައް އިތުރުވަމުންދިޔުމުގެ ސަބަބުން، ތަކުރާރުކޮށް ގިނަ އަދަދަކަށް ބައި-އިލެކްޝަންތައް ބާއްވަންޖެހޭތީ، އެ އިންތިޚާބުތައް ގާތްގާތުގައި ނުބާއްވާ ގޮތް ހެދުމަށްޓަކައެވެ.
މި އިސްލާހު ހުށަހަޅާފައި ވަނީ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށާއި ލޯކަލް ކައުންސިލްތަކުގެ އިންތިޚާބުގެ ގާނޫނަށެވެ.
މިއަދުގެ ޖަލްސާގައި އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށްޓަކައި ނެގި ވޯޓުގައި 67 މެންބަރުން ވޯޓު ދެއްވީ އެގޮތަށް އިސްލާހު ގެނައުމަށެވެ. ނަމަވެސް ހަތް މެންބަރުން ވަނީ ދެކޮޅަށް ވޯޓު ދެއްވާފައެވެ.
އަދި ލޯކަލް ކައުންސިލްތަކުގެ އިންތިޚާބުގެ ގާނޫނަށް އިސްލާހު ގެނައުމަށް ނެގި ވޯޓުގައި 67 މެންބަރުން ވޯޓު ދެއްވީ އެގޮތަށް އިސްލާހު ގެނައުމަށެވެ. ނަމަވެސް އަށް މެންބަރުން ވަނީ ދެކޮޅަށް ވޯޓު ދެއްވާފައެވެ.
މިހާރު ގާނޫނުގައި އޮންނަ ގޮތުން ނަމަ ލޯކަލް ކައުންސިލްތަކުގެ ހުސްވާ ގޮނޑިއަށް މެންބަރުން އިންތިޚާބުކުރުމަށް ބާއްވަންޖެހޭ ބައި-އިލެކްޝަންތައް، 60 ދުވަހުގެ ތެރޭގައި ބާއްވަންޖެހެއެވެ.
ނަމަވެސް މި އިސްލާހާއެކު އަންނާނެ ބަދަލަކީ، ކައުންސިލްގެ މެންބަރުންގެ މަގާމު ހުސްވެއްޖެނަމަ، އެ މަގާމު ހުސްވާތާ 14 ދުވަހުގެ ތެރޭގައި ލޯކަލް ގަވަމަންޓް އޮތޯރިޓީ (އެލްޖީއޭ)އިން އިލެކްޝަންސް ކޮމިޝަން (އީސީ)އަށް އަންގައި، 183 ދުވަހުގެ ތެރޭގައި އެ މަގާމަށް މެންބަރަކު އިންތިޚާބުކުރުމަށް ބައި-އިލެކްޝަން ބޭއްވުމެވެ.
ނަމަވެސް މި އިސްލާހު ގެނައުމަށް އިދިކޮޅު އެމްޑީޕީން ދެކޮޅެވެ. އެމްޑީޕީއަށް ނިސްބަތްވާ މެންބަރުން ބުނާ ގޮތުން ނަމަ ކައުންސިލްތައް އެކަށީގެންވާ އަދަދުތަކެއްގެ ގޮތުގައި ބާއްވަންޖެހެއެވެ.
ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު: އޭނާ ވަނީ ބައި އިލެކްޝަންތައް މަދުކުރާ އިސްލާހާ ދެކޮޅު ހައްދަވާފައި -- ފޮޓޯ/ މަޖިލިސް
ލާމަރުކަޒީ ކޮމިޓީން މި އިސްލާހު ދިރާސާކޮށް ހުށަހެޅި ރިޕޯޓަށް ބަހުސްކުރައްވާ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ވިދާޅުވީ މި ސަރުކާރުން އުޅެނީ ކައުންސިލްތަކުގެ އަދަދުތައް މަދުކޮށް ކައުންސިލްތަކުގެ ބާރު ކަނޑުވާލަން ކަމަށެވެ. އަދި ބައި އިލެކްޝަންތައް މަދުކުރަން އެ ޕާޓީއަކަށް ތާއީދެއް ނުކުރެވޭ ކަމަށް މައުރޫފް ވިދާޅުވިއެވެ. އަދި އެއް ފަހަރު އެކަމާ ވިސްނުމަށް ވެސް މައުރޫފް ވަނީ އެދިވަޑައިގެންފައެވެ.
ރާއްޖޭގައި ގާތްގާތުގައި އިންތިޚާބުތައް ބާއްވާތީ އެއީ ޚަރަދު ވެސް ބޮޑުވާ ކަމެއް ކަމަށް އިލެކްޝަންސް ކޮމިޝަނުން ވެސް މީގެ ކުރިން ފާހަގަކޮށްފައިވެއެވެ.
މި މައްސަލައަށް ވެސް އޮތް އެންމެ ރަނގަޅު ހައްލަކީ އިންތިޚާބުތައް އެކުގައި ބޭއްވުން ކަމަށް އީސީގެ ރައީސް ފުއާދު ތައުފީގު މީގެ ކުރިން ވިދާޅުވެފައިވެއެވެ.
ފުއާދު ވިދާޅުވި ގޮތުގައި، އެ މައްސަލައިގެ ހައްލަކަށް ވާނީ އެކި އަހަރު އެކި އިންތިޚާބު ބޭއްވުމުގެ ބަދަލުގައި އިންތިޚާބުތައް އެއްކޮށް ބޭއްވުމެވެ. އެގޮތުން، ލޯކަލް ކައުންސިލްތަކުގެ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުއެކީގައި ބޭއްވުމަކީ ހައްލަކަށް ވެދާނެ ކަމަށް އޭނާ ގަބޫލުކުރައްވައެވެ.