ރައީސް ޑރ. މުޙައްމަދު މުއިއްޒު ވެރިކަމަށް ގެންނަން ތާއިދުކުރެއްވި ކުރީގެ ރައީސް އަބްދުﷲ ޔާމޫން އަބްދުލްގައްޔޫމް ސަރުކާރާ ދުރަށް ޖެހިވަޑައިގަތީ އެ މަނިކުފާނުގެ ދަރިފުޅަށް ޓޫރިޒަމް މިނިސްޓަރުކަން ނުދިނުމުން ކަމަށް ޕީއެންސީގެ ޕާލިމަންޓްރީ ގްރޫޕުގެ ސީނިއާ ޑެޕިއުޓީ ލީޑަރު އަދި ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ޝުޖާއު މިއަދު ތުހުމަތުކުރައްވައިފިއެވެ.
ޝުޖާއު އެހެން ވިދާޅުވީ، މިދިޔަ ބުރާސްފަތި ދުވަހުގެ ރޭ ޕީޕަލްސް ނެޝަނަލް ފްރޮންޓް (ޕީއެންއެފް)އިން ބޭއްވި ޖަލްސާއެއްގައި ޔާމީން ރާއްޖޭގެ އިގުތިސާދީ ހާލަތު މިހާރު އޮތް ގޮތާ ގުޅޭ ގޮތުން ކަންބޮޑުވުން ފާޅުކުރައްވައި މި ސަރުކާރަށް ފާޑު ވިދާޅުވި ފަހުންނެވެ. އެ މަނިކުފާނު ވިދާޅުވީ ސަރުކާރާ ދުރަށް ޖެހިވަޑައިގެން އުޅުއްވަނީ އިދިކޮޅު ވީމަ ނޫން ކަމަށާއި އޭގެ މައިގަނޑު ސަބަބަކީ ސަރުކާރުން ހަދަމުންދާ ގޯސްތައް ހަޖަމުނުކުރެވި، ދިފާއު ކުރެވެން ނެތުމުން ކަމަށެވެ.
އެ ވާހަކައާ ގުޅުވައި ޝުޖާއު އެކްސްގައި ކުރެއްވި ޕޯސްޓެއްގައި ވިދާޅުވީ ޔާމީން ޕީއެންސީ ދޫކުރެއްވިއިރު ރައީސްގެ ވެރިކަމަށް ފުރުނީ ހަ ދުވަސް ކަމަށެވެ.
"އެ 6 ދުވަސް ތެރޭ ސަރުކާރުން ހެދީކޮން ގޯހެއް؟ ތިހެން ވިދާޅު ނުވޭ!ޒެއިންއަށް ޓްއަރިޒަމް މިނިސްޓަރުކަން ނުދީގެންނޫންތަ؟،" ޝުޖާއު ސުވާލު އުފެއްދެވިއެވެ.
ޔާމީންގެ އެންމެ އަރިސް ބޭފުޅުންގެ ތެރޭގައި މީގެ ކުރިން ހިމެނިވަޑައިގެންނެވި، ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވެސް މިއަދު އެ މޭރުމުން ޕޯސްޓެއް ކުރެއްވިއެވެ. އޭނާ ވިދާޅުވީ ޔާމީން އެފަދަ ވާހަކަދައްކަވަނީ ރައްޔިތުން ހައްލާލަން ކަމަށާއި އެ މަނިކުފާނު ނޫން އެހެން މީހަކު ވެރިކަން ކުރާ މަންޒަރު ބަލަން 'ލަގޮނޑިއަށް ކެތްނުވާތީ' ކަމަށެވެ.
"ވެރިކަމުގެ ޢިއްޒަތާއި ލައްޒަތަށް އޮތް ދަހިވެތިކަމަކުން. މިކަން ވަކީންބޮޑަށް މިއަދު ރައްޔިތުންނަށް ޔަގީންވަނީ ސިޔާސީ ގޮތުން ފެއިލްވެފައި ތިބި ދެތިން މީހުން ގޮވައިގެން ތިޔަޖަހާ ހަޑިހުތުރު މުޑުދާރު ސަކަރާތުން،" އަބްދުއްރަހީމްގެ ޕޯސްޓުގައިވެއެވެ.
ފާހަގަކޮށްލެވޭ ގޮތުގައި، ޝުޖާއު އެ ތުހުމަތުކުރެއްވިއިރު، މި ސަރުކާރުގެ ޓޫރިޒަމް މިނިސްޓަރަކީ އަބްދުއްރަހީމްގެ ދަރިފުޅު އިބްރާހީމް ފައިސަލެވެ.
ޔާމީން މީގެ ކުރިން އިސްކޮށް ހުންނެވި ޕީޕީއެމް، ޕީއެންސީ ކޯލިޝަންގެ ޓިކެޓް ރައީސް މުއިއްޒަށް ދެއްވަން ޖެހިވަޑައިގަތީ، ވ. އާރަށު ކުއްޔަށް ދިނުމުގެ ކޮރަޕްޝަން ހިންގި ކަމުގެ ދައުވާ ސާބިތުވެ އެ މަނިކުފާނު ޖަލު ހުކުމެއް ތަންފީޒު ކުރައްވަމުން ގެންދެވުމުންނެވެ.
ރައީސް މުއިއްޒު ވެރިކަމަށް އިންތިޚާބުވެ، އޭރުގެ ރައީސް އިބްރާހީމް މުޙައްމަދު ޞާލިޙްގެ ފަރާތުން އެންމެ ފުރަތަމަ އެދިވަޑައިގަތީ ޔާމީން ގެޔަށް ބަދަލުކުރުމަށެވެ. އެއާއެކު ޔާމީންގެ ޖަލު ހުކުމް ތަންފީޒުކުރަން ލުއިތަކެއްދީ ގެއަށް ބަދަލުކުރި އެވެ.
ނަމަވެސް، އެ ވެރިކަން ފެށުނުތާ ހަފުތާއެއް ނުވަނީސް ޔާމީން ކޯލިޝަނުން ވަކިވެވަޑައިގެން ޕީއެންއެފް އުފެއްދެވީއެވެ.