އިންޑިއާއިން ދިވެހިރާއްޖެއަށް މުހިންމު މުދާ އެކްސްޕޯޓް ކުރުމަށް އިތުރު ދެ ބަނދަރެއް ބޭނުން ކުރުމުގެ ހުއްދަ ދޭން އެ ގައުމުން ނިންމައިފިއެވެ.
އިންޑިއާ ސަރުކާރުގެ ގެޒެޓުގައި އެ ގައުމުގެ ފޮރިން މިނިސްޓްރީގެ ޑިރެކްޓާ ޖެނެރަލް ސަންތޯޝް ކުމާރް ޗަރަންގް ސޮއިކޮށް ޝާއިއު ކޮށްފައިވާ ލިއުމުގައި ބުނެފައިވަނީ 2024-25 ވަނަ މާލީ އަހަރު ދިވެހިރާއްޖެއަށް މުހިންމު މުދާ އެކްސްޕޯޓް ކުރުމަށް ކަންޑްލާ އަދި ވިޝާކަޕަޓްނަމް ކަނޑުގެ ބަނދަރުތައް ބޭނުން ކުރަން ހުއްދަ ދޭން ނިންމާފައިވާ ކަމަށެވެ.
https://x.com/HCIMaldives/status/1819020190623121760
މިއީ މި އަހަރުގެ އޭޕްރިލް 15ވަނަ ދުވަހު ނެރެފައިވާ އިއުލާނުގައި ލިސްޓުކޮށްފައިވާ ހަތަރު ބަނދަރަށް އިތުރު ކުރި ބަނދަރުތަކެކެވެ.
އޭޕްރީލް މަހު އިންޑިއާގެ ޑިރެކްޓަރޭޓް ޖެނެރަލް އޮފް ފޮރިން ޓްރޭޑް ވަނީ ރާއްޖެއަށް ޒަރޫރީތަކެތި އެކްސްޕޯޓުކުރުމުގައި ފިޔަވަޅުތަކެއް އެޅިކަން ހާމަކޮށްފައެވެ. އެގޮތުން އިންޑިއާއިން ދީފައި އޮންނަ ޚާއްސަ ހުއްދައެއްގެ ދަށުން އެ ގައުމުން އެތެރެކުރާ ޒަރޫރީ ތަކެތި ރާއްޖެއަށް ވަކި ބަނދަރުތަކަކުން ފޮނުވޭ ގޮތަށް ހެދިއެވެ.
އެގޮތުން، އިންޑިއާއިން އޭރު ނިންމާފައިވަނީ އެ ގައުމުން އެކްސްޕޯޓުކުރުން މަނާކުރި ނަމަވެސް ޚާއްސަ ހުއްދައެއްގެ ދަށުން ރާއްޖެއަށް ދޫކުރާ ޒަރޫރީ ތަކެތި އޭގެ ފަހުން އެކްސްޕޯޓުކުރެވޭނީ ހަތަރު ކަސްޓަމްސް ސްޓޭޝަނެއް މެދުވެރިކޮށް އެކަނި ކަމަށެވެ. އެއީ:
މުންޑްރާ ސީ ޕޯޓު
ޓުޓިކޮރިން ސީ ޕޯޓު
ނާވާ ޝީވާ ސީ ޕޯޓު (ޖޭއެންޕީޓީ)
އައިސީޑީ ޓަގްލަކަބާޑް
ފިޔާ، އަލުވި، ބިސް، ހަނޑޫ، އަދި ހަކުރު ހިމެނޭހެން ނުވަ ބާވަތެއްގެ ޒަރޫރީ ތަކެތި އެކްސްޕޯޓުކުރުން އިންޑިއާއިން އޮތީ މަނާކޮށްފައެވެ. އެކަމަކު، އެ ގައުމުގެ ސަރުކާރުން ގެންގުޅޭ 'ނެއިބާހުޑް ފަސްޓް' ޕޮލިސީގެ ދަށުން އެ ތަކެތި ރާއްޖެއަށް އެކްސްޕޯޓުކުރުމުގެ ހުއްދައެއް ވަނީ ދީފައެވެ.