ހުޅުމާލެ ފުރަތަމަ ފިޔަވަހީގައި ހިންގި އޮޕަރޭޝަނެއްގެ ދަށުން މިދިޔަ ބުރާސްފަތި ދުވަހުގެ ރޭ ހައްޔަރު ކުރި އަށް މީހުންގެ ބަންދުގެ މުއްދަތު ކޯޓުން ޖަހައިފިއެވެ.
މި މައްސަލަގައި، ހައްޔަރުކޮށްފައިވަނީ ދިވެހި ހަތް ފިރިހެނުންނާއި ދިވެހި އަންހެނެކެވެ.
މިއަދު ފުލުހުން މީޑީއާތަކާއި ހިއްސާކުރި މެސެޖެއްގައި ބުނީ، މި މައްސަލައިގައި ހައްޔަރު ކުރި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރި ކަމަށެވެ. އެގޮތުން އޭގެ ތެރެއިން ހަތް މީހެއްގެ ބަންދަށް ހަފުތާއެއް ދީފައިވާ ކަމަށާއި އެކަކުގެ މައްޗަށް ތިން ދުވަހުގެ މުއްދަތެއް ދީފައިވާ ކަމަށް ފުލުހުން ބުނެއެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
ފާހަގަކޮށްލެވޭ ގޮތުގައި، މަސްތުވާތަކެއްޗާއި ވައްކާމާ ގުޅުން ހުރި މައްސަލަތައް މިހާރު އަންނަނީ އިތުރުވަމުންނެވެ.
ހޯމް މިނިސްޓްރީން މިއަދު ބޭއްވި 'ހޯމް ޓީމް' ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް ސުޕްރިޓެންޑެންޓް އޮފް ޕޮލިސް އަހުމަދު ނާފިޒް ވިދާޅުވީ މި އަަހަރުގެ މިހާތަނަށް 56 ޑުރަގް އޮޕަރޭޝަން ކުރިއަށް ގެންގޮސްފައިވާ ކަމަށެވެ.
މީގެ އިތުރުން މަސްތުވާތަކެއްޗާއެކު ފުލުހުންގެ ބެލުމުގެ ދަަށަށް މިއަހަރުގެ މިހާތަނަށް 260 ދިވެހިންނާއި 16 ބިދޭސީން ގެންގޮސްފައިވާ ކަމަށް މައުލޫމާތު ދީފައިވެއެވެ.