އަހަރުގެ މިހާތަނަށް 104 މިލިއަން ރުފިޔާގެ މަސްތުވާތަކެތި އަތުލައިގެންފައިވާ ކަމަށް ފުލުހުން މިއަދު ބުނެފިއެވެ.
ހޯމް މިނިސްޓްރީން މިއަދު ބޭއްވި 'ހޯމް ޓީމް' ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް ސުޕްރިޓެންޑެންޓް އޮފް ޕޮލިސް އަހުމަދު ނާފިޒް ވިދާޅުވީ، މިހާތަނަށް އަތުލައިގަތް މަސްތުވާތަކެތީގެ ބަރުދަނުގައި 19،220 ގްރާމް ހުންނާނެ ކަމަށެވެ. އަދި އެއީ ގާތްގަނޑަކަށް 19 ކިލޯގެ މަސްތުވާތަކެތި ކަމަށް އޭނާ ވިދާޅުވިއެވެ.
"އޭގެ މަގުމަތީ އަގަށް ބަލާކަމުގައި ވަނީނަމަ 104،550،509 ރުފިޔާގެ ވެލިއު އެބަހުރި،" ނާފިޒް ވިދާޅުވިއެވެ.
މި ބައްދަލުވުމުގައި ނާފިޒް ވަނީ މިދިޔަ އޭޕްރިލް މަހު ފުލުހުން ކުރިއަށް ގެންދިޔަ މަސްތުވާތަކެތީގެ އޮޕަރޭޝަންތަކުގެ ތަފްސީލް ހިއްސާކުރައްވައިފައެވެ. މިދިޔަ މަހު ފުލުހުން ވަނީ 12 އޮޕަރޭޝަނެއް ހިންގައިފައެވެ. އެގޮތުން މިދިޔަ މަހު ފުލުހުންގެ ބެލުމުގެ ދަށަށް ގެންގޮސްފައިވަނީ:
- މަސްތުވާތަކެއްޗާއެކު 70 ދިވެހިން
- މަސްތުވާތަކެއްޗާއެކު ހަތް ބިދޭސީން
- މަސްތުގެ ހާލުގައި ތިބި ފަސް ދިވެހިން
- މަސްތުގެ ހާލުގައި ތިބި ހަ ބިދޭސީން
މި އަަހަރުގެ މިހާތަނަށް 56 އޮޕަރޭޝަން ކުރިއަށް ގެންގޮސްފައިވާކަމަށް ނާފިޒް ވިދާޅުވިއެވެ. އެގޮތުން މަސްތުވާތަކެއްޗާއެކު ފުލުހުންގެ ބެލުމުގެ ދަަށަށް މިއަހަރުގެ މިހާތަނަށް 260 ދިވެހިން އަދި 16 ބިދޭސީން ގެންގޮސްފައިވެއެވެ. ހަމައެއާއެކު މަސްތުގެ ހާލުގައި ތިބި 61 ދިވެހިން އަދި 55 ބިދޭސީން މިއަހަރުގެ މިހާތަނަށް ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
މި އޮޕަރޭޝަންތައް ހިންގިއިރު މިދިޔަ މަހު ދެ ޑްރަގް ކާޓަލް އަތުލައިގެންފައިވާ ކަމަށާއި މިއަހަރުގެ މިހާތަނަށް 5 ޑްރަގް ކާޓަލް އަތުލައިގެންފައިވާ ކަމަށް ވެސް ނާފިޒް ވިދާޅުވިއެވެ.