އިސްލާމް އާބާދު (31 ޖަނަވަރީ 2024): ޕާކިސްތާންގެ ކުރީގެ ބޮޑުވަޒީރު އިމްރާން ޚާން 10 އަހަރަށް ޖަލަށްލުމަށް ކުރި ހުކުމް އިސްތިއުނާފު ކުރާނެކަމަށް އޭނާގެ ގާނޫނީ ޓީމުން ބުނެފިއެވެ.
އެޓީމުގެ ވެރިޔާ ގޯހަރު އަލީ ޚާން ވިދާޅުވިގޮތުގައި އިމްރާން ޚާންގެ މައްޗަށް ކޮށްފައިވާ ހުކުމަށް ނުފޫޒުގަދަ ފަރާތްތަކެއްގެ ފިއްތުންތައް ކުރިމަތިވިކަމަށް ބެލެވޭނެ ހެކިތައް އެބަހުއްޓެވެ. އިމްރާންގެ މައްޗަށް ކުށް ސާބިތު ކުރެވޭފަދަ ހެކި ދައުލަތަށް ދެއްކިފައި ނުވާކަމަށްވެސް ގޯހަރު ވިދާޅުވިއެވެ.
އިމްޜާންޚާންގެ މައްޗަށް ހުކުމްކޮށްފައިވަނީ ޕާކިސްތާނުގައި ސިޔާސީގޮތުން ބާރުގަދަ އަސްކަރިއްޔާގެ ފިއްތުންތަކާ ގުޅިގެންކަމަށް އޭނާއަށް ތާއީދުކުރާ ފަރާތްތަކުންނާއި އޭނާގެ ޕާޓީގެ ލީޑަޝިޕުން ދެކެއެވެ. އިމްރާންޚާންގެ އިތުރުން އޭނާގެ ވެރިކަމުގައި ޚާރިޖީ ވަޒީރުކަމުގައި ހުންނެވި ޝާހު މަހްމޫދު ގުރައިޝީގެ މައްޗަށްވެސް 10 އަހަރުގެ ޖަލު ހުކުމް ކުރިއެވެ.
އިމްރާންޚާންގެ މައްޗަށް 10 އަހަރުގެ ހުކުމެއްކުރީ އޭނާގެ ވެރިކަމުގައި ދައުލަތުގެ ސިއްރު ލިޔުންތަކެއް ލީކުކުރި ކަމަށް ބުނެ ހުށަހަޅާފައިވާ މައްސަލައެއްގައެވެ. މީގެއިތުރުންވެސް އެތައް މައްސަލަތަކެއްގެ ދައުވާ އިމްރާންޚާންގެ މައްޗަށް ދައުލަތުންވަނީ އުފުލާފައެވެ.
މީގެތެރޭގައި އޭނާ ބޭރު ގައުމުތަކަށް ކުރެއްވި ދަތުރުފުޅުތަކުގައި ހަދިޔާގެ ގޮތުގައި ލިބުނު ތަކެތި ރައްދު ކުރަންއޮންނަ އިދާރާއާ ކަމަށްވާ "ތުޝައްޚާނާ" އާ ހަވާލުނުކޮށް އެތަކެތި ބޭނުންކުރެއްވި ކަމުގެ ދައުވާވެސް ހިމެނެއެވެ. މީގެތެރެއިން އެއްދައުވާ ސާބިތުވާކަމަށް ބުނެ ތިން އަހަރުގެ ޖަލު ހުކުމެއް މީގެކުރިންވެސް އިމްރާންޚާންގެ މައްޗަށްވަނީ އިއްވާފައެވެ. މިއާއެކު އޭނާ ހުންނެވީވެސް ޖަލުގައެވެ.
އިމްރާންޚާންގެ ގާނޫނީ ޓީމު ބުނާގޮތުން ހަދިޔާގެ ގޮތުގައި ލިބިވަޑައިގަތް ތަކެތި އިމްރާންޚާން "ތުޝައްޚާނާ" އާ ހަވާލުކުރެއްވިއެވެ. ނަމަވެސް ފަހުން އޭގެތެރެއިން ބައެއް ތަކެތި އަގު ދީފައި ބައްލަވައި ގަތުމަށްފަހު ބޭނުންކުރެއްވިއެވެ. އެއީ "ތުޝައްޚާނާ"ގެ ގަވައިދު އެގޮތަށް އޮންނާތީއެވެ. ނަމަވެސް ދައުލަތުގެ ވަކީލުން މިކަމަށް އިންކާރު ކުރެއެވެ. އެހެންކަމުން މިއީ އޮޅުންބޮޅުން ބޮޑު މައްސަލައެކެވެ.
އިމްރާންޚާން ތުހުމަތު ކުރައްވާ ގޮތުގައި މިހުރިހާ ދައުވާތަކަކީވެސް ޕާކިސްތާނުގެ ސިޔާސީ ކަންކަން ކޮންޓްރޯލްކުރާ އަސްކަރިއްޔާއިން އޭނާއާ ދެކޮޅަށް ރާވައިގެން ކުރާ ދައުވާ ތަކެކެވެ. ބޭނުމަކީ ސިޔާސީ މަސްރަހުން އޭނާ ބޭރުކުރުމެވެ.
ޕާކިސްތާނުގައި ރައްޔިތުންގެ ތާއީދު އެންމެ ބޮޑީ އިމްރާންޚާން އަށާއި އޭނާގެ ޕާޓީއަށްކަން ޚިޔާލު ހޯދުމުގެ ސާވޭތަކުން ހާމަވެއެވެ. ކޯޓުންވަނީ އިމްރާންޚާންގެ ޕާޓީގެ ލޯގޯ ބޭނުންކޮށްގެން އިންތިޚާބުގައި ވާދަކުރުން އެޕާޓީގެ ކެންޑިޑޭޓުންނަށް މަނާކޮށްފައެވެ.
ދިހަ އަހަރުގެ ޖަލު ހުކުމް އިމްރާންޚާންގެ މައްޗަށް އިއްވާފައި މިވަނީ ޕާކިސްތާނުގެ އާންމު އިންތިޚާބަށް ދެ ހަފުތާއަށް ވެފައި ވަނިކޮށެވެ. މީގެކުރިން ކޮށްފައިވާ ހުކުމާއެކު އިމްރާންޚާންއަށް ވަނީ މާކުރިންވެސް އިންތިޚާބަށް ކުރިމަތިނުލެވޭގޮތް ވެފައެވެ. އެހެންކަމުން މިއީ އިމްރާންޚާން އާ ދެކޮޅަށް ސިފައިން ކުޅޭ ކުޅިގަނޑެއްކަމަށް އޭނާގެ ޕާޓީންނާއި އޭނާގެ ސަޕޯޓަރުން ދެކެއެވެ.
ޕާކިސްތާނުގެ ސިފައިންގެ މުއައްސަސާއަކީ ސިޔާސީ ކަންކަމުގެ ތެރެއަށް އަތްބޭނުމުގެ ދިގު ތާރީޚެއް އޮންނަ މުއައްސަސާއެކެވެ. ސީދާގޮތެއްގައި ސިފައިން ބަޣާވާތްކޮށް އިންގިލާބު ގެނަސް ބޮޑުވަޒީރު މަގާމުން ދުރުކޮށް ވެރިކަމަށް އަތްގަދަ ކުރުމުގެ އަމަލުތައްވެސް އެކިދައުރުގައި ސިފައިން ހިންގާފައިވެއެވެ. މީގެއިތުރުން ޕާކިސްތާނުގެ އިންތިޚާބީ ސަރުކާރުތައް ވައްޓާލުމުގައި ނުސީދާގޮތެއްގައި ފަރުދާގެ އަނެއް ފަރާތުގައި ތިބެގެންވެސް ސިފައިން ބޮޑުދައުރެއް އަދާކުރާކަމީ ޕާކިސްތާނުގެ ސިޔާސީ މަސްރަހުގެ ހިތި ހަގީގަތެކެވެ.
ސިފައިންނާއި ބޮޑުވަޒީރުންނާ ޖެހޭގޮތްވަނީ ސިފައިން އެދޭގޮތަށް ކަންކަން ކުރަން ބޮޑުވަޒީރު ދެކޮޅު ހައްދަވާތީއެވެ. ޕާކިސްތާނުގެ ސިފައިންނަކީ ގައުމުގެ އިގްތިސާދާ ނުބައްދަލު ތަނަވަސްކަމުގައި އުޅޭ ބައެކެވެ. ޚާއްސަކޮށް ސިފައިންގެ އިސް ފަރާތްތަކެވެ.
ޕާކިސްތާނުގައި ވެރިކަމުގެ ގާނޫނީ ބާރުތައް އޮންނަނީ ބޮޑުވަޒީރާއި އޭނާގެ ކެބިނެޓްގެ އަތުގައެވެ. ނަމަވެސް ހުރިހާ މުއައްސަސާއަކަށް ސިފައިންގެ ނުސީދާބާރާއި ނުފޫޒު އޮވެއެވެ.
އިމްޜާން ޚާންވަނީ އޭނާއަށާއި އޭނާގެ ޕާޓީއަށް ކުރިމަތިކުރާ ހުރަސްތަކަށް ވޯޓުން ރައްދު ދިނުމަށް އޭނާގެ ސަޕޯޓަރުންނަށް ގޮވާލައްވާފައެވެ. ބިރުދައްކައިގެން އޭނާ ސިޔާސީ މައިދާނުން ބޭރުކޮށް ނުލެވޭނެކަމަށްވެސް އިމްރާންޚާން ވިދާޅުވިއެވެ.