މިދިޔަ ނޮވެމްބަރު މަހު ޕީޕީއެމުން ވަކިކުރަން ނިންމާފައިވާ ކުރީގެ ސައިންސް މިނިސްޓަރު މަލީހް ޖަމާލް، އެ ޕާޓީގެ ޕްރައިމަރީގައި މިއަދު ވޯޓުލައްވައިފިއެވެ.
މަލީހު "ސަން"އަށް ވިދާޅުވީ އޭނާ ޕީޕީއެމުން ވަކިކުރަން ނިންމި ނަމަވެސް އޭނާގެ ނަން ދަފުތަރުގައި އޮތް ކަމަށެވެ.
މަލީހު ވިދާޅުވީ އޭނާ ޕީޕީއެމް، ޕީއެންސީގެ ޕްރައިމަރީގައި ވޯޓު ދެއްވީ އެ ކޯލިޝަންގެ ކުރީގެ ލީޑަރު އަބްދުﷲ ޔާމީން އަބްދުލްގައްޔޫމްގެ ކެންޑިޑޭޓަކަށް ކަމަށެވެ. އެ ދެ ޕާޓީގައި ވެސް އެ މަނިކުފާނަށް ތާއިދުކުރާ މެންބަރުންނާއި ޕްރައިމަރީގައި ވާދަކުރާ ކެންޑިޑޭޓުން ތިބި ނަމަވެސް އެ މީހުންގެ ނަންތައް ދަފުތަރުން އުނި ކުރަމުން އަންނަ ކަމަށް އޭނާ ތުހުމަތު ކުރެއްވިއެވެ.
މަލީހު ތުހުމަތު ކުރެއްވި ގޮތުގައި އެކަމުގައި އިސްކޮށް އުޅުއްވަނީ ރައީސް ޑރ. މުޙައްމަދު މުއިއްޒުގެ ޚާއްޞަ އެޑްވައިޒަރު އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އެވެ.
"[އެގޮތަށް] ބޮޑެތި ގަޑުބަޑުތަކެއް އެ ބޭފުޅުން ހިންގި، މިއަދު ވޯޓު ފޮށިތައް ކައިރީގައިވެސް އެ މައްސަލަ ދިމާވި،" ބައެއް ވޯޓު ފޮށިތައް ކައިރީގައި ހިނގި ހަމަނުޖެހުންތަކަށް އިޝާރާތް ކުރައްވައި އޭނާ ވިދާޅުވިއެވެ.
މީގެ އިތުރުން މަލީހު ވަނީ، އިދިކޮޅު އެމްޑީޕީގެ ވަރަށް ގިނަ މީހުން ޕީޕީއެމް، ޕީއެންސީ ޕްރައިމަރީގައި ބައިވެރިވެ ވޯޓު ލާން ގޮސް ތިބި މަންޒަރު ފެނުނު ކަމަށް ތުހުމަތުކުރައްވާފައެވެ.
"އެއީ ރައީސް ޔާމީނަށް ތާއިދުކުރައްވާ ކެންޑިޑޭޓުން ކަޓުވާލުމަށް [ދިން ފުރުސަތުތައް] އެހެންވީމަ މި ޕްރައިމަރީ ނިމިގެންދާއިރު އަޅުގަނޑުމެންނަށް ފެނިގެންދާނީ އެމްޑީޕީ ފިކުރުގެ ވަރަށް ގިނަ ކެންޑިޑޭޓުންތަކެއް ޕީޕީއެމް ޕީއެންސިން ކެންޑިޑޭޓުންގެ ގޮތުގައި ހޮވިގެންދާތަން،" މަލީހު ވިދާޅުވިއެވެ.
މަލީހު ޕީޕީއެމުން ވަކިކުރަން އެ ޕާޓީގެ ސުލޫކީ ކޮމިޓީން މިދިޔަ ނޮވެމްބަރު މަހުގެ ތެރޭގައި ނިންމީ އޭނާ ޕީޕީއެމްގެ ނަން ބަދުނާމުކުރުމުގެ މަސައްކަތްކުރާކަމަށާއި ޕާޓީ ބައިބައިކުރުމުގެ މަސައްކަތް ކުރައްވަމުން އަންނަކަމަށް ޕާޓީގެ ލީޑާޝިޕަށް ފާހަގަކުރެވިފައިވާކަމަށް ބުނެއެވެ.
އޭނާ ވަކިކުރީ، ޕީޕީއެމްގައި ޔާމީން އެކުލަވާލެއްވި ސްޓިއަރިން ކޮމިޓީގައި އިސްކޮށް ހުންނަވައި ނޫސްވެރުންގެ ބައްދަލުވުމެއް ބޭއްވެވި ފަހުންނެވެ.
އެއީ ރައީސް ޑރ. މުޙައްމަދު މުއިއްޒު ވެރިކަމުގެ ހުވާ ކުރެއްވިތާ ހަފުތާއެއް ވެސް ނުވަނީސް ކޯލިޝަންގައި ބައިބައިވުން އުފެދި، ޔާމީނަށް ތާއިދު ކުރާ ފެކްޝަނެއް އުފެދުނު ފަހުންނެވެ.
އޭގެ ފަހުން ޔާމީން ކޯލިޝަނުން ވަކިވެވަޑައިގެން އާ ޕާޓީއެއް އުފެއްދެވުމުގެ މަސައްކަތް ފައްޓަވާފައެވެ. އެ ޕާޓީ އުފެއްދުމުގައި އެންމެ އިސްކޮށް އުޅުއްވާ އެއް ބޭފުޅަކީ މަލީހެވެ.