ހުޅުމާލޭގައި ހުރި ޕްލެޓިނަމް ރެސިޑެންސްގެ އެޕާޓްމަންޓެއް ރަހުނުކޮށް، މޯލްޑިވްސް އިސްލާމިކް ބޭންކުން ނަގާފައިވާ ހަތަރު މިލިއަން ރުފިޔާގެ ލޯނަށް ގަވައިދުން ފައިސާ ނުދެއްކުނީ މިދިޔަ ސަރުކާރުން، ކުރީގެ ބަންޑާރަ ނައިބު އާޒިމާ ޝަކޫރުގެ މައްޗަށް ކޮށްފައިވާ ދައުވާއަކާ ގުޅިގެން އަދާ ކުރަމުންދިޔަ ގާނޫނީ ވަކީލުކަމުގެ މަސައްކަތަށް ހުރަސް އެޅުމުން ކަމަށް މިރޭ އޭނާ ވިދާޅުވެއްޖެއެވެ.
އާޒިމާގެ މައްޗަށް ކޮށްފައި ވަނީ އޭނާ ބޭންކުގައި ރަހުނު ބަހައްޓައިގެން، ލޯނެއް ނަގައި، އެ ލޯނު ނުދައްކާތީ ބޭންކުން އޭނާއާ ދެކޮޅަށް މައްސަލަ ވެއްދުމުން އެ ފައިސާ އަދައިކުރަމުން ނުދާކަމަށް ބުނެ ކޮށްފައިވާ ހުކުމެކެވެ.
ހުކުމްގައިވަނީ އާޒިމާގެ ނަމުގައި ހުޅުމާލޭގައި ހުރި ޕްލެޓިނަމް ރެސިޑެންސްގެ އެޕާޓްމަންޓެއް އެމްއައިބީއަށް ރަހުނުކޮށްފައި އޮތްކަން ހާމަވާކަމަށާއި، އެއަށްފަހު 3،186،369.23 ރުފިޔާގެ ލޯނެއް ދޫކޮށްފައި އޮތްކަން ހާމަވާކަމަށެވެ.
އެކަމާ ގުޅިގެން ނެރުއްވި ބަޔާނުގައި އާޒިމާ ވިދާޅުވީ، އާމްދަނީއެއް ލިބެމުންދިޔަ ދުވަހު ގަވާއިދުން ފައިސާ ދައްކާފައިވާނެ ކަމަށެވެ. ނަމަވެސް ރައީސް އިބްރާހީމް މުޙައްމަދު ޞާލިޙުގެ ސަރުކާރުން އޭނާގެ މައްޗަށް ކުރި ދައުވާ ގުޅިގެން އަދާކުރަމުން ދިޔަ ވަޒީފާއަށް ހުރަސް އެޅުނު ކަމަށް އާޒިމާ ވިދާޅުވިއެވެ.
"އެ ދައުވާއާއެކު އަޅުގަނޑު ދަސްކޮށްގެން ހުރި މަސައްކަތްކަމުގައިވާ ގަނޫނީ ވަކީލުކަމުގެ މަސައްކަތްކުރުމަށް ހުރަސްތަކެއް ކުރިމަތިކުރުވި. އަދި ރާއްޖެއިން ބޭރުން ލިބުނު ވަޒީފާގެ ފުރުސަތު ވެސް ވަނީ ބަންދުވެފައި،" އާޒިމާ ވިދާޅުވިއެވެ.
އޭނާ ވިދާޅުވީ އަމިއްލަ މަސައްކަތުން ދިރިއުޅުން ހަމަޖައްސާއިރު ކޮވިޑްގެ ހާލަތުގައި ވަޒީފާއެއް ނެތި އާމްދަނީއެއް ހޯދުމަށް ކުރި ތަފާތު މަސައްކަތްތަކުން ލޯނު ދެއްކުމަށް އެކަށީގެންވާ ކުރިއެރުމެއް ލިބިފައި ނުވާ ކަމަށެވެ.
މިރޭ ޕީޕީއެމް/ ޕީއެންސީގެ ފަރާތުން ސިޓީ ކައުންސިލަށް ވާދަކުރައްވާ ބޭފުޅުން ހެންވޭރުގެ ރައްޔިތުންނަށް ބޭއްވި ކެމްޕެއިން ޖަލްސާގައި އާޒިމާ ވަނީ އޭނާގެ މައްޗަށް ކޮށްފައިވާ ހުކުމަކީ "ޒާތީ މައްސަލައެއް"ގެ ގޮތުގައި ސިފަކުރައްވައިފައެވެ.
އޭނާއަކީ އަމިއްލަ މަސައްކަތުން ދިރިއުޅޭ އެކަނިވެރި މައެއް ކަމަށާއި ވޭތުވެދިޔަ ތިން ސަރުކާރުގައި ވެސް އޭނާ މަސައްކަތްކުރެއްވި އިރު ދައުލަތުން ދޭ މުސާރަ ނޫން އިތުރު އެއްވެސް އެއްޗެއް ނަގާފައި ނޯންނާނެ ކަމަށް އޭނާ ވިދާޅުވިއެވެ.
"ދައުލަތުގެ ވަރަށް ބާރުގަދަ މަގާމުތައް އަދާކުރިން، އެހެން ނަމަވެސް އަޅުގަނޑުގެ އެންމެ މައްސަލައެއް ވެސް އޭސީސީގައި ނޯންނާނެ. އެއްވެސް ޚިޔާނާތުގެ މައްސަލައެއް ނޯންނާނެ. އެ ދުވަހު އަޅުގަނޑު މި ގައުމަށް ވަފާތެރިވީތީ މިއަދު އަޅުގަނޑު މިތާ މިހުރީ،" އާޒިމާ ވިދާޅުވިއެވެ.
އާޒިމާ ވިދާޅުވީ އެ ލޯނު ދެއްކުމަށް އިސްވެ ތާވަލެއް އެކުލަވައިލާ، ލޯނު ރީ-ސްޓްރަކްޗާ ކުރުމަށް މިހާރު ބޭންކަށް ވެސް ހުށަހަޅާފައިވާ ކަމަށެވެ. އަދި މިދިޔަ މަހު ވެސް އެ މަޝްވަރާތައް ބޭންކާއެކު ކުރި ކަމަށް އޭނާ ވިދާޅުވިއެވެ.
"މިހާލަތުގައި މަޝްވަރާ ކުރިއަށް ދަނިކޮށް މި ހުކުމް އައުމުން އަޅުގަނޑުގެ ލޯޔަރުންގެ މަޝްވަރާއާއެކު ހުކުމް ރިވިއު ކުރުމަށާއި އިސްތިއުނާފު ކުރުމަށް ނިންމާ ކޯޓަށް ހުށަހެޅުމުގެ މަސައްކަތް މިދަނީ ކުރަމުން،" އާޒިމާ ވިދާޅުވިއެވެ.
ކޯޓުން އާޒިމާގެ މައްޗަށް ހުކުމްކޮށްފައި ވަނީ މިއަދުގެ ނިޔަލަށް އަރައިފައިވާ ފައިސާއާއި ޗެރިޓީގެ ގޮތުގައި ދައްކަންޖެހޭ ޖުމްލަ 4،156،355.32 ރުފިޔާ، މިއަދުން ފެށިގެން ކުރިއަށް އޮތް ހަ މަސް ދުވަހަށް ބަހައި، އެ ފައިސާ ދައްކައި ޚަލާސްކުރުމަށެވެ.
ހަ މަސް ދުވަސް ހަމަވާނީ ޖުލައި ދެވަނަ ދުވަހަށެވެ. މި ހުކުމްކޮށްފައި ވަނީ އާޒިމާގެ ޣައިރު ހާޒިރުގައެވެ.
އާޒިމާގެ މައްޗަށް ހަތަރު މިލިއަން ރުފިޔާގެ ދަރަންޏެއް ދައްކަން ހުކުމް ކުރިއިރު އޭނާ އަންނަނީ މި މަހު 13ގައި އޮންނަ މާލޭ މޭޔަރުގެ އިންތިޚާބުގައި ވާދަކުރެއްވުމަށް ކެމްޕޭން ކުރައްވަމުންނެވެ.
މި ހުކުމްގެ ސަބަބުން އޭނާގެ ކެންޑިޑެސީއަށް އަސަރެއް ނުކުރާނެއެވެ.
އާޒިމާގެ މައްޗަށް 2019 ވަނަ އަހަރު ދައުލަތުން ވަނީ ދައުލަތުގެ މުއައްސަސާއަކަށް ދޮގު މައުލޫމާތު ދިނުމުގެ ކުށުގެ ދައުވާ އާއި މަނީ ލޯންޑަރިންއަށް މަގުފަހިކޮށްދިނުމުގެ ކުށުގެ ދައުވާކޮށްފައެވެ.
އޭނާގެ މައްޗަށް ދޮގު މައުލޫމާތު ދިނުމުގެ ދައުވާ އުފުލާފައިވަނީ, ކުރީގެ ރައީސް އަބްދުالله ޔާމީން އަބްދުލްގައްޔޫމްގެ މައްޗަށް ކުރި މަނީލޯޑަރިންގެ ދައުވާ އާ ގުޅިގެން، އެންޓި ކޮރަޕްޝަންސް ކޮމިޝަން (އެސިސީ)އަށް ދޮގު މައުލޫމަތު ދިން ކަމަށް ބުނެއެވެ.
މަނީ ލޯންޑްރިންއަށް މަގުފަހިކޮށް ދިނުމުގެ ދައުވާ އާޒިމާގެ މައްޗަށް ދައުލަތުން އުފުލީ އިސްލާމިކް ބޭންކުގައި ހުޅުވާފައިވާ ރައީސް ޔާމީންގެ އެކައުންޓަށް އެސްއޯއެފުން ޖަމާކުރި އެއް މިލިއަން ޑޮލަރު އެސްކްރޯ އެކައުންޓެއްގައި ބަހައްޓަން އޭސީސީއާ އެކު އެއްބަސްވެވަޑައިގަތުމަށްފަހު އެއާ ޚިލާފަށް އަމަލުކުރި ކަމަށް ތުހުމަތު ކުރެވޭ މައްސަލައިގައެވެ.