މޯލްޑިވްސް އިސްލާމިކް ބޭންކުން ހަތަރު މިލިއަން ރުފިޔާގެ ލޯނެއް ނަގައި، އެ ގަވައިދުން ދައްކަމުން ނުދާތީ ކުރީގެ ބަންޑާރަ ނައިބު އާޒިމާ ޝަކޫރުގެ މައްޗަށް އެ ލޯނު ދައްކަން ސިވިލް ކޯޓުން މިއަދު ހުކުމް ކޮށްފިއެވެ.
މި ހުކުމް އާޒިމާގެ މައްޗަށް ކޮށްފައިވަނީ އޭނާ ބޭންކުގައި ރަހުނު ބަހައްޓައިގެން، ލޯނެއް ނަގައި، އެ ލޯނު ނުދައްކާތީ ބޭންކުން އޭނާއާ ދެކޮޅަށް މައްސަލަ ވެއްދުމުންނެވެ.
އެގޮތުން ހުކުމްގައިވަނީ އާޒިމާގެ ނަމުގައި ހުޅުމާލޭގައި ހުރި ޕްލެޓިނަމް ރެސިޑެންސްގެ އެޕާޓްމަންޓެއް އެމްއައިބީއަށް ރަހުނުކޮށްފައި އޮތްކަން ހާމަވާކަމަށާއި، އެއަށްފަހު 3،186،369.23 ގެ ލޯނެއް ދޫކޮށްފައި އޮތްކަން ހާމަވާކަމަށެވެ.
އަދި އެއްބަސްވުމާ އެއްގޮތަށް އެ ފައިސާ އަދައިކުރަމުން ނުދާކަމަށް ވެސް އެ ހުކުމުގައި ވެއެވެ.
އެއާއެކު ކޯޓުން ހުކުމްކޮށްފައިވަނީ މިއަދުގެ ނިޔަލަށް އަރައިފައިވާ ފައިސާއާއި ޗެރިޓީގެ ގޮތިުގައި ދައްކަންޖެހޭ ޖުމްލަ ހަތަރު މިލިއަން އެއްލައްކަ ފަންސާސް ހާސް ތިންސަތޭކަ ފަންސާސް ރުފިޔާ ތިރީސް ދެލާރިީގެ (4،156،355.32) އިތުރުން، މަހުން މަހަށް އަރައި މަހު ކުއްޔާއި، ޗެރިޓީ ފައިސާ ، މިއަދުން ފެށިގެން ކުރިއަށް އޮތް ހަ މަސް ދުވަހަށް ބަހައި، އެ ފައިސާ ދައްކައި ޚަލާސްކުރުމަށެވެ.
ހަ މަސް ދުވަސް ހަމަވާނީ ޖުލައި ދެވަނަ ދުވަހަށެވެ. މި ހުކުމްކޮށްފައިވަނީ އާޒިމާގެ ޣައިރު ހާޒިރުގައެވެ.
އެއީ މި މައްސަލައިގައި ދައުވާކުރުމުން، ދައުވާ ފޯމާ ހަވާލުވީކަމުގެ ލިޔުން ހުށަހެޅުމަށާއި، ދައުވާގެ ރައްދު ހުށަހަޅަން ދިން ފުރުސަތު މިދިޔަ 29 އޮކްޓޯބަރަށް ހަމަވީއިރު ވެސް ހުށަހަޅައިފައިނުވާތީއެވެ. އެހެންވެ އެމްއައިބީއިން އެދުނީ ޣައިރު ހާޒިރުގައި އެކަމުގައި ހުކުމެއް ކޮށްދިނުމަށެވެ.
އާޒިމާގެ މައްޗަށް ހަތަރު މިލިއަން ރުފިޔާގެ ދަރަންޏެއް ދައްކަން ހުކުމް ކުރިއިރު އޭނާ އަންނަނީ މި މަހު 13ގައި އޮންނަ މާލޭ މޭޔަރުގެ އިންތިޚާބުގައި ވާދަކުރެއްވުމަށް ކެމްޕޭން ކުރައްވަމުންނެވެ. ނަމަވެސް މި ހުކުމްގެ ސަބަބުން އޭނާގެ ކެންޑިޑެސީއަށް އަސަރެއް ނުކުރާނެއެވެ.