ވެހިރާއްޖޭގައި 2013 އިން 2018 އަށް ވެރިކަންކުރި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމުގެ މަރުހަލާ ނިމުމުގެ ކުރިން ނިންމަން ޖެހޭ ކަމެއް އޮތް ނަމަ، އެކަމެއް އެ ޕާޓީއާ ގުޅިގެން ނިންމަން އިލެކްޝަންސް ކޮމިޝަން (އީސީ) އިން މިއަދު އެދިއްޖެއެވެ.
މިމަހުގެ ދެވަނަ ދުވަހު ބޭއްވި ކުއްލި ބައްދަލުވުމެއްގައި ވަނީ އެޕާޓީގެ ސެނެޓުން ވަނީ ޕީޕީއެމް އުވާލަން ނިންމާފައެވެ.
އީސީން މިއަދު ބުނީ، ޕީޕީއެމްގެ އަސާސީ ގަވައިދުގެ 61 ވަނަ މާއްދާގެ (ނ)ގައިވާ ގޮތުގެ މަތީން އެ ޕާޓީ އުވާލުމަށް ސެނެޓުން ނިންމާފައިވާތީ، ސިޔާސީ ޕާޓީގެ ގާނުނުގައިވާ ގޮތަށް އެޕާޓީ އުވާލުމުގެ މަސައްކަތް ކުރަމުން އަންނަ ކަމަށެވެ.
އެހެންވެ، ޕީޕީއެމްގެ ނަމުގައި އެއްވެސް ސިޔާސީ ހަރަކާތެއް ހިންގުމާއި ޕާޓީ އުވާލުމަށް ޓަކައި ފުރިހަމަ ކުރަންޖެހޭ އިޖުރާއަތްތައް ފުރިހަމަ ކުރުމަށް ކުރަން ޖެހޭ މުއާމަލާތްތައް ފިޔަވައި އިތުު އެހެން ކަމެއް ކުރުމުގެ އިޚްތިޔާރު ލިބިގެން ނުވާ ކަމަށް އީސީން ބުނެފައިވެއެވެ.
ޕާޓީއާ ގުޅިގެން ނިންމަން ޖެހޭ ކަމެއް އޮތްނަމަ، އުވާލުމުގެ މަރުހަލާ ނިމުމުގެ ކުރިން އެ ކަމެއް ކުރިއަށް ގެންދަން އީސީން ވަނީ އެދިފައެވެ.
ޕީޕީއެމް، ޕީއެންސީގެ އެއްވުމެެއްގެ ތެރެއިން -- ސަން ފޮޓޯ/ އިބްރާހީމް ޝަމްވީލް
ޕީޕީއެމް ރަސްމީކޮށް ރަޖިސްޓްރީކުރީ އޮކްޓޫބަރު 27، 2011 ގައެވެ. އެ ޕާޓީއަކީ އެންމެ ކުރު މުއްދަތެއްގައި ވެރިކަމަށް އައި އެއް ޕާޓީއެވެ. މި އަހަރުގެ ސެޕްޓެމްބަރު 19 އާ ހަމައަށް ވެސް އެ ޕާޓީގައި 34،694 މެންބަރުން ތިބި ކަމަށް އިލެކްޝަންސް ކޮމިޝަން (އީސީ)ގެ ވެބްސައިޓުން ދައްކައެވެ.
ޕީއެންސީ އުފެއްދި ނަމަވެސް މި ސަރުކާރު ވެރިކަމަށް އައިއިރު ވެސް އެ ޕާޓީގައި ތިބީ އެންމެ 3،000 އެއްހައި މެންބަރުންނެވެ. ދެ ޕާޓީއެއް ނަމަވެސް، ކޯލިޝަން ހިންގާފައިވަނީ ޖޮއިންޓް ކޯލިޝަނަކުން ދެ ޕާޓީގައި އަބަދު ވެސް އެއް ލީޑަރަކު ހުންނަވައިގެންނެވެ.
ކުރިން އެ ޕާޓީގެ ލީޑަރަކަށް ހުންނެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމެވެ.
ސިޔާސީ ޖަލްސާއެއްގައި ކުރީގެ ރައީސް ޔާމީން: ޕީޕީއެމް އުވާލުމުގެ މަރުހަލާ ނިމުމުގެ ކުރިން ނިންމަން ޖެހޭ ކަންކަން ކުރަން ވަނީ އެދިފައި --
މިދިޔަ ރިޔާސީ އިންތިޚާބުގައި ވެސް ޕީޕީއެމްގެ ޓިކެޓުގައި އެ މަނިކުފާނު ވާދަކުރައްވަން ފޯމު ހުށަހެޅުއްވިއެވެ. އެކަމަކު، އޭރު އެ މަނިކުފާނު ޖަލު ހުކުމެއްގައި ހުންނެވުމުން އިންތިޚާބުގައި ވާދަނުކުރެއްވޭނެ ކަމަށް ސުޕްރީމް ކޯޓުން ހުކުމްކުރީއެވެ.
ސެނެޓުގައި ޕްރައިމަރީއެއް ބާއްވާފައި ޕީއެންސީގެ ޓިކެޓުގައި ކެންޑިޑޭޓަކު ނެރެން ނިންމީ، ޔާމީނަށް ވާދަނުކުރެއްވިދާނެ ހާލަތެއް އަތުވެދާނެތީއެވެ. ރައީސް ޑރ. މުހައްމަދު މުއިއްޒު ޕީއެންސީގެ ޓިކެޓުގައި ވާދަކުރެއްވީ އެހެންވެއެވެ.
އެކަމަކު، އެ މަނިކުފާނަށް އިންތިޚާބު ކާމިޔާބުވެ، ހުވައިކުރެއްވިތާ ހަފުތާއެއް ނުވަނީސް ޔާމީން ވަނީ ޕީޕީއެމުން ވަކިވެ އަމިއްލަފުޅު އާ ޕާޓީއެއް އުފެއްދެވުމުގެ މަސައްކަތް ފައްޓަވާފައެވެ.
އެއީ، ޕީޕަލްސް ނެޝަނަލް ފްރަންޓް (ޕީއެންއެފް)އެވެ. އޭގެ ފަހުން ޕީޕީއެމް/ޕީއެންސީ ކޯލީޝަންގެ ލީޑަރުކަމަށް ރައީސް މުއިއްޒު ވަނީ އިންތިޚާބުކޮށްފައެވެ.
އެ މަނިކުފާނު ޕީޕީއެމްގެ ބަދަލުގައި ހިންގެވީ ޕީއެންސީއެވެ. ސަރުކާރަށް އަހަރުވީއިރު އެ ޕާޓީއަށް 82،000 އަށްވުރެ ގިނަ މެންބަރުން ހަމަކޮށްފައިވާ ކަމަށް އެ ޕާޓީން ބުންޏެވެ.
އެއީ، މިހާތަނަށް ރާއްޖޭގައި އެއް ޕާޓީއަކަށް މެންބަރުން ހަމަކުރި އެންމެ ގިނަ އަދަދެވެ. ކުރިން އެންމެ ބޮޑު ޕާޓީގެ ގޮތުގައި އޮތް އެމްޑީޕީގައި ތިއްބަވަނީ 50،000 އެއްހައި މެންބަރުންނެވެ.