ސަރުކާރު ހިންގާ ކޯލިޝަންގައި އޮތް ޕީޕީއެމްގެ ސެނެޓު ބައްދަލުވުމެއް މާދަމާ ބާއްވަން ތާވަލުކޮށްފިއެވެ.
"ސަން" އަށް މައުލޫމާތުދެމުން އެ ޕާޓީން ބުނީ މާދަމާ 14:00އަށް ސެނެޓު ބައްދަލުވުމެއް ތާވަލުކޮށްފައިވާ ކަަމަށެވެ. އެ ބައްދަލުވުމާ ގުޅޭ އިތުރު ތަފްސީލެއް ހާމަކޮށްފައެއް ނުވެއެވެ.
ގިނަ ދުވަސްތަކަކަށް ފަހު ޕީޕީއެމްގެ ސެނެޓުގެ ކުއްލި ބައްދަލުވުމެއް އެންމެ ފަހުން ބާއްވާފައި ވަނީ އޮކްޓޯބަރު 17ގައެވެ. އެ ބައްދަލުވުން ބާއްވަން ނިންމުމާ އެކު ޕީޕީއެމް އުވާލަން އުޅޭކަމުގެ އަޑުތައް ފެތުރުނެވެ.
ފާހަގަކޮށްލެވޭ ގޮތުގައި ޕީޕީއެމަށް މެންބަރުން އިތުރުކުރުމުގެ މަސައްކަތް މި ސަރުކާރު އައި ފަހުން ނުކުރާ ކަމަށާއި މިވީ މުއްދަތުގެ ތެރޭގައި 7،416 މެންބަރުން ޕާޓީން ވަކިވެފައިވާ ކަމަށް އެ ޕާޓީން މިއަދު ބުނެފައިވެއެވެ.
މިދިޔަ އަހަރުގެ ނޮވެމްބަރު 17ގައި ޕީޕީއެމް/ޕީއެންސީން ވެރިކަމާ ހަވާލުވީއިރު ޕީއެންސީގައި ތިބީ 3،000 އެއްހައި މެންބަރުންނެވެ. އެކަމަކު، ސަރުކާރަށް އަހަރުވީއިރު އެ ޕާޓީގެ ދަފުތަރުގައި 82،000 އަށްވުރެ ގިނަ މެންބަރުން ތިބި ކަމަށް ޕީއެންސީން ވަނީ ބުނެފައެވެ.
ޕީޕީއެމަށް މެންބަރުން އިތުރުކުރުމުގެ މަސައްކަތްނުކުރި ނަމަވެސް އަދިވެސް ޕީޕީއެމްގައި ތިން ނައިބު ރައީސުން ތިއްބަވައެވެ. ފޮރިން މިނިސްޓަރު އަބްދުﷲ ޚަލީލް މި ފަހުން ޕީޕީއެމްގެ ނައިބު ރައީސްކަމަށް އިންތިޚާބުކުރިއިރު، އެ ޕާޓީގެ ނައިބު ރައީސުންގެ ގޮތުގައި އޭރު ވެސް ޑިފެންސް މިނިސްޓަރު މުހައްމަދު ޣައްސާން މައުމޫނާއި ފިޝަރީޒް މިނިސްޓަރު އަހުމަދު ޝިޔާމް ތިއްބެވިއެވެ.
ޕީޕީއެމް ރަސްމީކޮށް ރަޖިސްޓްރީކުރީ އޮކްޓޫބަރު 27، 2011 ގައެވެ.
ޕީޕީއެމް/ ޕީއެންސީގެ ލީޑަރުކަމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހުންނެވީއިރު އެ މަނިކުފާނު ހިންގެވީ ޕީޕީއެމެވެ.
މިދިޔަ ރިޔާސީ އިންތިޚާބުގައި ވެސް ޕީޕީއެމްގެ ޓިކެޓުގައި ޔާމީން ވާދަކުރައްވަން އުޅުއްވިއެވެ. ނަމަވެސް، އޭރު ޖަލު ހުކުމެއްގައި ހުންނެވުމުން އެ މަނިކުފާނުގެ ކެންޑިޑެސީ ބާތިލުކުރަން ސުޕްރީމް ކޯޓުން ވަނީ ހުކުމްކޮށްފައެވެ. އެހެންވެ، ސެނެޓުގައި ބޭއްވި ޕްރައިމަރީ ކާމިޔާބުކޮށް، ޕީއެންސީގެ ޓިކެޓުގައި ރައީސް މުއިއްޒު ވާދަކުރައްވަން ނިންމެވީއެވެ.
އެކަމަކު، ރައީސް މުއިއްޒު ވެރިކަމަށް ވަޑައިގެންތާ ހަފުތާއެއް ނުވަނީސް ޔާމީން ވަނީ ޕީޕީއެމުން އިސްތިއުފާދެއްވައި އަމިއްލަފުޅު ޕާޓީއެއް އުފައްދަވައިފައެވެ.
އޭގެ ފަހުން ޕީއެންސީގެ ރައީސްކަމަށް ރައީސް މުއިއްޒު ވަނީ އިންތިޚާބުކޮށްފައެވެ. އެ ކޯލިޝަންގެ ލީޑަރަކީ ވެސް އެ މަނިކުފާނެވެ.
ޕީއެންސީއަށް މެމްބަރުން އިތުރުކުރާއިރު ޕީޕީއެމަށް އިހުމާލުވާ ކަމަށް ވިދާޅުވެ، ޔާމީން އަދިވެސް ސަރުކާރު ހިންގާ ކޯލިޝަނަށް ފާޑު ވިދާޅުވެއެވެ. ޕީޕީއެމްގައި ތިބި މެންބަރުން ޕީއެންސީން ވައްދާ ކަމަށް ވެސް އެ މަނިކުފާނު ވަނީ ތުހުމަތުކުރައްވައިފައެވެ.