ކުޑަ އިންޖީނު ދޯންޏެއްގައި އެކަނި މަހަށް ނިކުމެ އުޅެނިކޮށް، އދ. ދަނގެތި، ޔޫސުފް އިބްރާހީމް (ޔޫސުފްބެ) ގެއްލުނުތާ ހަފުތާއެއްވީއިރު ހޯދަން ކުރި މަސައްކަތަށް އެއްވެސް ކުރިއެރުމެއް ލިބިފައި ނުވާ ކަމަށް ސިފައިން މިއަދު ބުނެފިއެވެ.
ދަނގެތީ މީހުން ބުނާގޮތުގައި ޔޫސުފްބެއަކީ އެ ރަށުގައި ހުރި އެންމެ ވަރުގަދަ ފަރުމަސްވެރިޔާއެވެ. އޭނާ އަކީ ފެށުނީއްސުރެ ވެސް މަސްވެރިކަން ކުރި މީހެއް ކަމަށް އެ ރަށު މީހުން ބުނެއެވެ.
އުމުރުން 65 އަހަރަށް ވުރެ މަތިވެފައިވާ ޔޫސުފްބެ ގެއްލުނުކަން ކައުންސިލާއި އާއިލާ އަދި އެ ރަށު މީހުންގެ ސަމާލުކަމަށް އައީ އޭނާ މަަހަށް ދިޔަ ދޯނި ހުސްކޮށް ރަށު ކައިރިން ފެނުމުންނެވެ.
އޭނާ ގެއްލުނުކަން ސިފައިންނަށް ރިޕޯޓުކޮށްފައި ވަނީ ހޮނިހިރު ދުވަހުގެ މެންދުރު 11:42 ހާއިރެވެ. އަދި، ވަގުތުން ވަނީ އޭނާ ހޯދުމުގެ މަަސައްކަތް ފަށާފައެވެ.
އެގޮތުން ޔޫސުފްބެ ހޯދަން ކަނޑު މަގުން 664 ސްކެއާ ނޯޓިކަލް މައިލްސް ބަލާފައިވާއިރު ވައިގެ މަގުން 907 ސްކެއާ ނޯޓިކަލް މައިލްސް އަދި ޑައިވްކޮށްގެން 376،850 ސްކެއާ މީޓާސް ބަލާފައިވާ ކަމަށް އެމްއެންޑީއެފްއިން ބުނެއެވެ.
"މިހާތަނަށް ޔޫސުފްބެ ފެނިފައެއް ނުވޭ. އެކަމަކު އޮޕަރޭޝަން ހުއްޓާނުލައި އަޅުގަނޑުމެން އެބަ ކުރިއަށް ގެންދަން،" އެމްއެންޑީއެފްގެ މީޑިއާ އޮފިޝަލް ވިދާޅުވިއެވެ.
މި ސާޗިން އޮޕަރޭޝަނަށް ދަނގެތީ ރައްޔިތުންނާއި އެ ރަށް ކައިރި ރިސޯޓްތަކުން ބޮޑު އެއްބާރުލުމެއް ލިބޭ ކަމަށް އެމްއެންޑީއެފްއިން ބުނެއެވެ.
ދަނގެތީ ރައްޔިތުން މީގެ ތިން ދުވަސް ކުރިން ވަނީ ޔޫސުފްބެ ހޯދަން ކުރަމުން އައި މަސައްކަތްތައް ކުޑަކޮށް މަޑުޖައްސާލާފައެވެ.
ކަނޑުމަތީގެ ހާދިސާތަކުގައި މީހުން ގެއްލުމަކީ ރާއްޖޭގައި ދޭތެރެއަކުން ހިނގާ ކަމެކެވެ. މިފަދަ ހާދިސާތަކުގައި ގެއްލުނު ބައެއް މީހުން މިހާތަނަށް ނުފެނިވެސް ވެއްޖެއެވެ.