ކުޑަ އިންޖީނު ދޯންޏެއްގައި ހޮނިހިރު ދުވަހު އެކަނި މަހަށް ނިކުމެ އުޅެނިކޮށް ގެއްލުނު އދ. ދަނގެތި، ޔޫސުފް އިބްރާހީމް (ޔޫސުފްބެ) ހޯދުމަށް އެ ރަށު ރައްޔިތުން ކުރި މަސައްކަތްތައް ހުއްޓާލައިފިއެވެ.
މި ކަމާ ގުޅިގެން "ސަން"އާ ވާހަކަ ދައްކަމުން އެ ރަށު ކައުންސިލް މެންބަރު އަހްމަދު އަބްދުއްސަމަދު ވިދާޅުވީ، ވޭތުވެ ދިޔަ ތިން ދުވަހު ވެސް ޔޫސުފްބެ ހޯދުމަށް ރަށުގެ ރައްޔިތުން ވަރަށް ބުރަ މަސައްކަތެއް ކުރި ކަމަށެވެ.
"އިއްޔެ ތިން ދުވަސް ހަމަވެގެން ހުއްޓައިލާފައި އޮތީ. އެކަމު މިއަދު ވެސް ބަލައިލިން ކޮންމެ ވެސް ވަރަކަށް،" އޭނާ ވިދާޅުވިއެވެ.
ސިފައިންނާ ގުޅިގެން ދަނގެތީ ރައްޔިތުންނާއި ޑައިވް ސެންޓަރުތަކުން ވަނީ ޑައިވް ކޮށްގެން ވެސް ޔޫސުފްބެ ގެއްލުނު ކަމަށް ބުނާ ސަރަހައްދު ބަލާފައެވެ. އަދި، ތިން ދުވަސް ހަމަވުމުން ޑައިވްކޮށްގެން ޔޫސުފްބެ ހޯދުމުގެ މަސައްކަތް ހުއްޓައިލި ނަމަވެސް، މިއަދު ވެސް ދޯންޏާއި ޑިންގީގައި ކޮންމެ ވެސް ވަރަކަށް އެ ސަރަހައްދު ބަލާފައިވެއެވެ.
އަބްދުއްސަމަދު ވިދާޅުވީ، މީހަކު އަޑީގައި އޮންނާނެ އެންމެ ގިނައިރު ކަމަށް ލަފާކުރަނީ 72 ގަޑިއިރު ކަމަށެވެ. އެހެންކަމުން އެ ވަގުތު ހަމަވުމުން ސިފައިން ޑޯނިޔާ މަތިންދާ ބޯޓުން އެ ސަރަހައްދު ބެލިކަމަށް އޭނާ ވިދާޅުވިއެވެ.
"އެ ސަރަހައްދު ވަރަށް ބޮޑަށް ޑޯނިޔާ މަތިންދާ ބޯޓުން ބެލި،" އޭނާ ވިދާޅުވިއެވެ.
އެމްއެންޑީއެފުން ބުނީ، ޔޫސުފްބެ ހޯދުމުގެ މަސައްކަތް އަދި އެމްއެންޑީއެފުން ހުއްޓާލާފައިނުވާ ކަމަށެވެ. އެގޮތުން މިއަދު ވެސް 60 ސްކޮއާ ނޮޓިކަލް މޭލު ބަލާފައިވާ ކަމަށާއި، މިހާތަކަށް ކޯސްޓް ގާޑުން 664 ސްކޮއާ ނޯޓިކަލް މޭލު ބަލާފައިވާ ކަމަށް އެމްއެންޑީއެފުން ބުންޏެވެ. އަދި، މީގެ އިތުރުން ޑޯނިއާ މަތިންދާ ބޯޓުގައި 907 ސްކޮއާ ނޯޓިކަލް މޭލު ބަލާފައިވާ ކަމަށާއި ކޯސްޓްގާޑު ޑައިވަރުން 376،850 ސްކޮއާ މީޓަރު ބަލާފައިވާ ކަމަށް ވެސް އެމްއެންޑީއެފުން ބުންޏެވެ.
ދަނގެތީ މީހުން ސިފަކުރާ ގޮތުގައި ޔޫސުފްބެއަކީ ރަށުގައި ހުރި އެންމެ ވަރުގަދަ ފަރުމަސްވެރިޔާއެވެ. އޭނާ އަކީ ފެށުނީއްސުރެ ވެސް މަސްވެރިކަން ކުރި މީހެއް ކަމަށް އެ ރަށުން "ސަން"އާ ވާހަކަދެއްކި މީހަކު ބުނެފައިވެއެވެ.
އުމުރުން 65 އަހަރަށް ވުރެ މަތިވެފައިވާ ޔޫސުފްބެ ގެއްލުނުކަން ކައުންސިލާއި އާއިލާ އަދި އެ ރަށު މީހުންގެ ސަމާލުކަމަށް އައީ އޭނާ މަަހަށް ދިޔަ ދޯނި ހުސްކޮށް ރަށު ކައިރިން ފެނުމުންނެވެ.
އޭނާ ގެއްލުނުކަން ސިފައިންނަށް ރިޕޯޓުކޮށްފައި ވަނީ ހޮނިހިރު ދުވަހުގެ މެންދުރު 11:42 ހާއިރެވެ. އަދި، ވަގުތުން ވަނީ އޭނާ ހޯދުމުގެ މަަސައްކަތް ފަށާފައެވެ.