އިންތިޚާބީ ރައީސް ޑރ. މުޙައްމަދު މުއިއްޒުގެ އިންތިގާލީ ކޮމެޓީގައި އިސްކޮށް ހުންނަވާ ޑިރެކްޓާ ޖެނެރަލްގެ މަގާމަށް އަބްދުއްރަހީމް ޢަބްދުﷲ ހަމަޖައްސައިފިއެވެ.
މުއިއްޒުގެ ފަރާތުން އިންތިގާލީ ކޮމެޓީގެ ވެރިއަކަށް އަބްދުއްރަހީމް ހަމަޖެއްސުމަށް އޭނާގެ ނަން ސިވިލް ސާވިސް ކޮމިޝަން (ސީއެސްސީ)އަށް ފޮނުވާފައިވާ ކަމަށް މިދިޔަ ހޯމަ ދުވަހު، ޕީޕީއެމް އާއި ޕީއެންސީ ހިމެނޭ ޕްރޮގްރެސިވް ކޯލިޝަނުން ވަނީ ބުނެފައެވެ.
މިއަދު ސީއެސްސީން ވަނީ އިންތިގާލީ ކޮމިޓީގެ ޑިރެކްޓާ ޖެނެރަލްގެ މަގާމަށް އަބްދުއްރަހީމް ހަމަޖައްސައި، ދެ ޕާޓީގެ މެންބަރުންނާ ބައްދަލުކޮށްފައިވާކަން ހާމަކޮށްފައެވެ.
އެ ކޮމެޓީގެ ތަރުޖަމާނު ކަމަށް، ޑރ. މުއިއްޒުގެ ކެމްޕެއިންގައި އުޅުއްވި ޑރ. މުހައްމަދު ޝަހީމް އަލީ ސައީދުގެ އަރިސް ބޭފުޅެއް ކަމަށްވާ މުޙައްމަދު ފިރުޒުލް ޢަބްދުﷲ ޚަލީލް ވަނީ އިއްޔެ އައްޔަންކޮށްފައެވެ.
ޕީއެންސީން ރޭ ބޭއްވި މަޖިލިސް ބައްދަލުވުމެއްގައި އެ ޕާޓީގެ ރައީސް ކަމަށް މުއިއްޒު އަދި ނައިބު ރައީސް ކަމަށް ހުސައިން މުހައްމަދު ލަތީފް ވަނީ އިންތިޚާބު ކޮށްފައެވެ.
މީގެ އިތުރުން، އެ ޕާޓީގެ ރައީސް ކަމުގައި ކުރިން ހުންނެވި އަބްދުއްރަހީމް ވަނީ އެ ޕާޓީގެ ޗެއާޕާސަން ކަމަށް އިންތިޚާބު ކޮށްފައެވެ.
އެ ބަދަލުތައް ގެނައީ ރޭގެ ބައްދަލުވުމުގައި ބައިވެރިވި 40 މެންބަރުންގެ އިއްތިފާގުން ކަމަށް އެ ކޯލިޝަނުން ބުނެފައިވެއެވެ.