އިދިކޮޅު ޕީޕަލްސް ނެޝަނަލް ކޮންގްރެސް (ޕީއެންސީ)ގެ ރައީސް ކަމަށް އިންތިޚާބީ ރައީސް ޑރ. މުހައްމަދު މުއިއްޒު އަދި، އެ ޕާޓީގެ ނައިބު ރައީސް ކަމަށް އިންތިޚާބީ ނައިބު ރައީސް ހުސައިން މުހައްމަދު ލަތީފް (ސެމްބެ) އިންތިޚާބު ކޮށްފިއެވެ.
ޕީއެންސީއާއި އެއް ލީޑާޝިޕަކުން ހިންގާ ޕީޕީއެމުން މިރޭ ކުރި ޓުވީޓެއްގައި ބުނީ ޕީއެންސީން މިރޭ ބޭއްވި މަޖިލިސް ބައްދަލުވުމެއްގައި އެ ޕާޓީގެ ރައީސް ކަމަށް ޑރ. މުއިއްޒު އަދި ނައިބު ރައީސް ކަމަށް ހުސައިން މުހައްމަދު ލަތީފް އިންތިޚާބު ކޮށްފައިވާ ކަމަށެވެ. މީގެ އިތުރުން، އެ ޕާޓީގެ ރައީސް ކަމުގައި ހުންނެވި އަބްދުއްރަހީމް އަބްދުﷲ ވަނީ އެ ޕާޓީގެ ޗެއާޕާސަން ކަމަށް އިންތިޚާބު ކޮށްފައެވެ.
އެ ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، މިރޭ ބޭއްވި އެ ޕާޓީގެ މަޖިލިސް ބައްދަލުވުމުގައި ބައިވެރިވި 40 މެންބަރުން ވެސް ވަނީ އެ ބަދަލުތައް ގެންނަން ވޯޓު ދެއްވައިފައި ކަމަށެވެ.
އެ ބައްދަލުވުމުގައި ވަނީ ޕީއެންސީގެ އަސާސީ ގަވާއިދަށް ވެސް ބަދަލު ގެނެސްފައެވެ. ހީނާ ވިދާޅުވީ، އަސާސީ ގަވާއިދަށް ގެނެވުނު ބަދަލަކީ ޕީޕީއެމްގެ އަސާސީ ގަވާއިދާ އެއްގޮތް ކުރުމުގެ ގޮތުން ގެނައި ބަދަލެއް ކަމަށެވެ. އެކަމަކު، އެއީ ކޮން ބަދަލެއްކަން އެ ޕާޓީން ހާމަކޮށްފައެއް ނުވެއެވެ.
ޕީއެންސީ ފުރަތަމަ އުފެއްދީ ޕީޕީއެމްގެ ފުރަތަމަ ސަރުކާރުގައި އުފެދުނު ހިޔާލުތަފާތުވުންތަކަށް ފަހު، އެ ޕާޓީގެ ޒަޢީމް، ކުރީގެ ރައީސް މައުމޫން އަބްދުލްގައްޔޫމާއި އޭރުގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމާ ދެމެދު އުފެދުނު ހިޔާލު ތަފާތުވުންތަކަށް ފަހު، ޔާމީނަށް ޕީޕީއެމް ގެއްލުމުގެ ބިރު އޮތުމުންނެވެ.
އޭގެ ފަހުން، ވ. އާރަށް ކުއްޔަށް ދޫކުރުމުގެ މުއާމަލަތާ ގުޅިގެން ޔާމީންގެ މައްޗަށް އުފުލި ދެ ދައުވާ ވެސް ސާބިތުވާ ކަމަށް ކަނޑައަޅައި މިދިޔަ ޑިސެމްބަރު 25 ގައި ވަނީ 11 އަހަރުގެ ޖަލު ހުކުމެއް އިއްވައިފައެވެ. އެ ހުކުމުގެ ސަބަބުން އެ މަނިކުފާނަށް ރިޔާސީ އިންތިޚާބުގައި ވާދަނުކުރެއްވިދާނެ ކަމަށް ސުޕްރީމް ކޯޓުގެ ހަތް ފަނޑިޔާރުންގެ އިއްތިފާގުން ހުކުމް ކުރީއެވެ.
ޕީއެންސީގެ ޓިކެޓުގައި މުއިއްޒާއި ސެމްބެ އިންތިޚާބަށް ނުކުންނެވީ އެހެންވެއެވެ. ޔާމީނަށް ވާދަ ނުކުރެއްވިދާނެ ހާލަތެއްގައި އިންތިޚާބުގައި ވާދަކުރަން ނިންމައި، ޕީއެންސީގެ ސެނެޓުގައި ބޭއްވި ޕްރައިމަރީ މުއިއްޒު ކާމިޔާބު ކުރެއްވީ ޕީއެންސީގެ ޕީޖީ ލީޑަރު އާދަމް ޝަރީފް އުމަރާ ވާދަކޮށްގެނެވެ.
މިދިޔަ ހޮނިހިރު ދުވަހު އޮތް ރިޔާސީ އިންތިޚާބު މުއިއްޒު ކާމިޔާބު ކުރެއްވީ، 54 އިންސައްތަ ވޯޓާ އެކުގައެވެ. ދެވަނަ ބުރުގައި ދެން ވާދަކުރެއްވި އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ޞާލިޙަށް ލިބިވަޑައިގަތީ 46 އިންސައްތަ ވޯޓެވެ.