އަމިއްލަ ތިން ދަރިންގެ މަންމަ، ނިޝާމާ މުޙައްމަދު، މަރާލި ކަމުގެ ތުހުމަތުގައި ހައްޔަރުކޮށްފައި ހުރި، އަބޫބަކުރު ފައިސަލް ފުލުހުންގެ ގޮޅީގައި ދަން ޖެހުމުގެ ޚަބަރާއެކު އެންމެން ވެސް ކުރީ އެއް ސުވާލެކެވެ. ގޮޅީގައި ދަން ޖެހެވުނީ ކިހިނެއްތޯއެވެ؟
ކުޅުދުންފުށީ ޕޮލިސް ސްޓޭޝަންގެ ގޮޅިއެއްގައި 15 ދުވަހަށް ބަންދު ކޮށްފައި ހުރި ފައިސަލް ރޭ 11:15 ހާއިރު ފެނުނީ ދަންޖެހިފައި ހުއްޓައެވެ. އޭނާގެ ފުރާނަ ސަލާމަތް ކުރުމަށް ފުލުހުން އެ ސްޓޭޝަނާ ވަރަށް ކައިރީގައި ހުންނަ ކުޅުދުއްފުށީ ރީޖަނަލް ހޮސްޕިޓަލަށް އޭނާ ގެންދިޔައެވެ. "ސަން" އަށް އެނގިފައިވާގޮތުގައި ހޮސްޕިޓަލަށް އޭނާ ގެންދިޔަ އިރު އޭނާގެ ވިންދެއް ނެތެވެ. އެ ހޮސްޕިޓަލުން މިއަދު ބުނީ އޭނާގެ ހާލު ވަރަށް ސީރިއަސް ކަމަށާއި ފަރުވާ ދެމުން އަންނަނީ އައިސީޔޫގައި ކަމަށެވެ.
މިފަދަ ހާދިސާތައް ހިނގުމަކީ ރާއްޖޭގައި މިހާރު އެހާ އާއްމު ކަމެއް ނޫނެވެ. ނަމަވެސް މި ހާދިސާއިން ފުލުހުންގެ އިހުމާލު ވަރަށް ބޮޑަށް ފާހަގަ ވެއެވެ. އެކަން ފާހަގަކޮށް ގިނަ ބަޔަކު އަންނަނީ ސޯޝަލް މީޑިއާގައި ވެސް ހިޔާލު ފާޅު ކުރަމުންނެވެ.
ފުލުހުން ޒިންމާ ނަގަން ޖެހޭ
ކުރީގެ ޕްރޮސިކިއުޓާ ޖެނެރަލް މުހުތާޒް މުހުސިން "ސަން" އަށް ވިދާޅުވިގޮތުގައި ޖަލު ބަންދުގައި ހުރި މީހަކު ގޮޅީގައި ދަންޖެހުމަކީ ފުލުހުންގެ ބޮޑު އިހުމާލެއް ކަމަށެވެ. މިކަންކަން ހިނގަނީ ރަނގަޅަށް މޮނީޓާ ނުކުރެވޭތީ ކަމަށް އޭނާ ވިދާޅުވިއެވެ.
"ފުރަތަމަ ކަމަކަށް، ގޮޅީގައި އެކަހަލަ އިންތިޒާމެއް ހުރެގެން ނުވާނެ. ޚާއްސަކޮށް ރަށެއްގެ ކަސްޓޯޑިއަލްގައި އެވަރު ކަމެއް ހިނގައިގެން ނުވާނެ. ޑިއުޓީގައި ތިބެން ވާނީ ފޯނާ ކުޅެން ނުވަތަ ނިދާކަށް ނޫން. ރަނގަޅަށް ބެލެހެއްޓެން ވާނެ،" މުހުތާޒް ވިދާޅުވިއެވެ.
"މިކަމުގެ ފުރިހަމަ ޒިންމާ ފުލުހުން ނަގަން ޖެހޭ"
ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިން-- ސަން ފޮޓޯ/ ފަޔާޒު މޫސާ
ބަންދުގައި ބަހައްޓާ މީހުންނާމެދު އަމަލު ކުރުމަށް ޚާއްސަ އުސޫލުތަކެއް ކަނޑައަޅާފައި ހުރެއެވެ. އެގޮތުން ފުލުހުން ވެސް އަންނަނީ "ކަސްޓޯޑިއަލް މެނޭޖްމަންޓް މެނުއަލް" ނަމަކަށް ކިޔާ އުސޫލަކަށް އަމަލު ކުރަމުންނެވެ. އެ އުސޫލު ބުނާގޮތުން ކުށްވެރިން ބައިތިއްބާ ހުރިހާ ގޮޅިއެއްގައި ސީސީޓީވީ ކެމެރާ ހަރުކޮށް އަބަދުވެސް މޮނީޓާ ކުރަން ޖެހޭނެއެވެ. އަދި މަދުވެގެން ކޮންމެ ގަޑިއިރަކުން އެއް ފަހަރު ޑިއުޓީ އޮފިސަރު ގޮޅިތައް ކައިރިއަށް ގޮސް ބަލަން ޖެހޭނެއެވެ. އަދި ޚާއްސަކޮށް އަމިއްލަ ނަފްސަށް ގެއްލުމެއް ދީފާނެ ކަމަށް ބެލެވޭ މީހެއްނަމަ ޚާއްސަ ސަމާލުކަމެއް ދީގެން މޮނީޓާ ކުރަން ޖެހޭއިރު އެފަދަ ގެއްލުމެއް ދެވޭނެ އެއްވެސް އާލާތެއް ގޮޅީގައި ހުރެގެން ނުވާނެ ކަމަށް އުސޫލުގައި ބުނެއެވެ.
ފުލުހުންގެ އިސް މަގާމުތައް ފުރުއްވުމަށް ފަހު ރިޓަޔާ ކުރައްވާފައިވާ ބޭފުޅަކު ނަން ނުޖަހަން ޝަރުތުކޮށް ވިދާޅުވިގޮތުގައި މިފަދަ ހާދިސާތައް ހިނގަނީ ކުށްވެރިން ބެލެހެއްޓުމުގައި ފަރުވާ ކުޑަ ކުރެވޭތީއެވެ. ރަނގަޅު އުސޫލުތަކެއް ހަދާފައިވީ ނަމަވެސް އެ އުސޫލުތައް ތަންފީޒު ނުކުރެވޭތީ މިފަދަ ކަންކަން ހިނގަނީ ކަމަށް އޭނާ ވިދާޅުވިއެވެ.
"ގޮޅީގައި ހުންނަން ޖެހޭ ސްޓޭންޑަޑެއް ހުންނާނެ. ދަން ޖެހެވޭ ގޮތަށް ހުރުމަކީ ފުލުހުންގެ އިހުމާލެއް،" އޭނާ ވިދާޅުވިއެވެ.
މި މައްސަލަ، ނެޝަނަލް އިންޓަގްރިޓީ ކޮމިޝަން (އެންއައިސީ) އިން އަންނަނީ ތަހުގީގު ކުރަމުންނެވެ. އެކަމާ ގުޅޭގޮތުން އެ ކޮމިޝަންގެ ބަހެއް ހޯދާލުމަށް ގުޅާލުމުން ކޮމިޝަންގެ ރައީސް ގާސިމް އަބްދުލް ކަރީމް ވިދާޅުވީ އެކަން ބަލަމުން އަންނަ ކަމަށާއި މިހާރު މައްސަލަ ގޮސްފައިވާ ހިސާބުން އަދި ނޫހަކަށް މައުލޫމާތު ދެވެން ނެތް ކަމަށެވެ.
ހިއުމަން ރައިޓްސް ކޮމިޝަނަށް ގުޅާލުމުން އެ ކޮމިޝަންގެ ބަހެއް ވެސް ވަނީ ލިބޭގޮތް ނުވެފައެވެ.
ޖަލުގައި އަނިޔާ ކުރުމާއި އިހުމާލުން މަރުވުމަކީ ރާއްޖޭގައި ކުރިން އާއްމު ކަމެކެވެ. ނަމަވެސް އެއީ މިހާރު އާއްމުކޮށް ހިނގާ ކަމެއް ނޫނެވެ. ފައިސަލްގެ މި ހާދިސާއިން އަނެއްކާ ވެސް މި އެނގުނީ ޖަލުތަކުގެ މައްސަލަތަކަށް އަދިވެސް ރަނގަޅު ހައްލެއް ނުލިބޭ ކަމެވެ.
މަސްތުވާތަކެތި ބޭނުން ކުރުމާއި އަނިޔާވެރި އަމަލުތައް ހިންގާ ކަމަށް ތުހުމަތު ކުރެވޭ ފައިސަލް، އޭނާގެ އަންހެނުން ނިޝާމާ މަރާލި ކަމަށް ތުހުމަތު ކުރެވެނީ މިދިޔަ ހޮނިހިރު ދުވަހުއެވެ. އެ މަރަށް ފަހު އޭނާ ވަނީ ފިލައިގެން އެ މީހުން އުޅުނު ރަށް، ނޮޅިވަރަމުން ކުޅުދުއްފުއްޓަށް ގޮސްފައެވެ. ފުލުހުންގެ ބެލުމުގެ ދަށަށް އޭނާ ދިޔައީ އަމިއްލައަށެވެ.
ނިޝާމާގެ މަރާ ގުޅޭގޮތުން މާ ގިނަ ތަފްސީލެއް ކަމާބެހޭ އިދާރާތަކުން މިހާތަނަށް ހާމަކޮށްފައެއް ނުވެއެވެ. ނަމަވެސް އާއިލާއިން ތުހުމަތު ކުރާގޮތުގައި ފައިސަލް، ނިޝާމާއަށް އަނިޔާ ކުރެއެވެ. ނަމަވެސް އޭގެން އެއްވެސް މައްސަލައެއް ކަމާބެހޭ އެއްވެސް އިދާރާއަކަށް ހުށަހަޅާފައެއް ނުވެއެވެ.
ނިޝާމާގެ ހަށިގަނޑު މިހާރު މާލެ ގެނެސްފައިވާއިރު ހަށިގަނޑު އޮތީ މޯޗަރީގައެވެ. ފުލުހުން ވަނީ ނިޝާމާގެ ހަށިގަނޑު ޕޯސްޓްމޯޓަމް ހަދަން ނިންމާފައިވާކަން ހާމަކޮށްފައެވެ. އެހެންނަމަވެސް މި މަރާއި ގުޅޭ އިތުރު ތަފްސީލް ފުލުހުން މީޑިއާއަށް ހާމަކޮށްފައެއް ނުވެއެވެ.
ނިޝާމާއާއި ފައިސަލް އިނދެގެން އުޅޭތާ އަހަރުތަކެއް ވެފައިވާއިރު އެ ކައިވެންޏަށް ތިން ކުދިން ވަނީ ލިބިފައެވެ. އޭގެ ތެރެއިން އެންމެ ބޮޑު ކުއްޖާއަށް ހަތް އަހަރު ފުރިފައިވާއިރު ދެވަނަ ކުއްޖާގެ އުމުރަކީ ހަތަރު އަހަރެއެވެ. އެންމެ ހަގު ކުއްޖާ ބޭބީ ނާސަރީގައި އުޅޭއިރު އެ ކުއްޖާގެ އުމުރަކީ ދެ އަހަރެވެ.