އަންހެނުން މަރާލިކަމުގެ ތުހުމަތުކޮށް ފުލުހުންގެ ބެލުމުގެ ދަށުގައި ހުއްޓާ ދަންޖެހުނު އދ. ފެންފުށި ރޯޒީ ވިލާ، އަބޫބަކުރު ފައިސަލްގެ ހާލު ކްރިޓިކަލްކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފިއެވެ.
ކުޅުދުއްފުށީ ރީޖަނަލް ހޮސްޕޓަލުގެ މީޑިއާ އޮފިޝަލަކު "ސަން"އަށް ވިދާޅުވީ ފައިސަލް އަށް މިވަގުތު ފަރުވާ ދެމުންދަނީ އައިސީޔޫގައި ކަމަށެވެ.
އިތުބާރު ހިފޭ މަސްދަރުތަކުން "ސަން"އަށް މައުލޫމާތު ދިން ގޮތުގައި ދަންޖެހިފައި ހުއްޓާ ފެނިގެން އޭނާ ކުޅުދުއްފުށީ ރީޖަނަލް ހޮސްޕިޓަލަށް ގެންދިޔަ އިރު އޭނާގެ ވިންދެއް ނެތެވެ. އޭނާއަށް އީއާރުގައި ވަގުތުން ފަރުވާދީ ޕަލްސް ވަނީ ރިވައިވް ކޮށްފައެވެ. ޕަލްސް ރިވައިވް ކުރުމަށްފަހު ފަރުވާދެމުން ދަނީ އައިސީޔޫގައެވެ.
ދަންޖެހިފައި ހުއްޓާ ފެނިގެން ކުޅުދުއްފުށީ ރީޖަނަލް ހޮސްޕިޓަލަށް ފައިސަލް ގެންގޮސްފައި ވަނީ، ރޭ 11:40 ހާއިރެވެ.
މިކަމާ ގުޅޭގޮތުން ފުލުހުންގެ މީޑިއާ އޮފިޝަލް ރޭ ވިދާޅުވީ، ނިޝާމާގެ މަރުގެ މައްސަލައިގައި ހައްޔަރުކޮށްފައިވާ ފައިސަލް، ބަންދުކޮށްފައި ހުރި ތަނުގައި ދަންޖެހެން މަސައްކަތް ކުރަނިކޮށް ރޭ 23:15 ހާއިރު ފުލުހުންނަށް ފެނިފައިވާ ކަމަށެވެ.
އޭނާ ދަންޖެހުނީ ކުޅުދުއްފުށީ ޕޮލިސް ސްޓޭޝަންގެ ގޮޅިތެރޭގައެެވެ.
މިމަހުގެ 10 ވަނަ ދުވަހު ނިޝާމާ މަރުވެފައި އޮއްވައި ފެނުނީ އޭނާ ދިރިއުޅެމުންދިޔަ ގޭގެ ކޮޓަރި ތެރެއިންނެވެ. ނިޝާމާ މަރާލި ކަމަށް ފައިސަލްގެ މައްޗަށް ތުހުމަތު ކުރެވޭއިރު، އޭނާ މަސައްކަތް ކުރަނީ، ނޮޅިވަރަމް ފެނަކަ ބްރާންޗްގެ ޓެކްނީޝަނެއްގެ ވަޒީފާގައެވެ. ނިޝާމާގެ މަރަށް ފަހު އޭނާ ވަނީ ފިލައިގެން ކުޅުދުއްފުއްޓަށް ގޮސްފައެވެ. އޭނާ ހައްޔަރުކުރީ ކުޅުދުއްފުށީ ޕޮލިސް ސްޓޭޝަނަށް އަމިއްލައަށް ދިޔުމުންނެވެ.
ފައިސަލްއަކީ މަސްތުވާތަކެތި ބޭނުންކުރާ މީހެއްކަމަށް އިތުބާރުހިފޭ މަސްދަރަކުން "ސަން"ވަނީ ކަށަވަރުކޮށްދީފައެވެ.
އަދި މަސްތުވާތަކެތި ބޭނުންކުރާ ކަމަށް ތުހުމަތު ކުރެވޭ ފައިސަލްގެ ފަރާތުން އޭނާގެ ކުޑަ ތިން ކުދިންގެ މަންމަ، ނިޝާމާއަށް މީގެ އަހަރުތަކެއް ކުރިންސުރެއް އަނިޔާ ލިބެމުންދާކަމަށް ނިޝާމާގެ އާއިލާ މެމްބަރަކު "ސަން"އާ ވާހަކަދައްކަމުން ބުނެފައިވެއެވެ.
ނިޝާމާއާއި ފައިސަލް އިނދެގެން އުޅޭތާ އަހަރުތަކެއް ވެފައިވާއިރު އެ ކައިވެންޏަށް ތިން ކުދިން ވަނީ ލިބިފައެވެ. އޭގެ ތެރެއިން އެންމެ ބޮޑު ކުއްޖާއަށް ހަތް އަހަރު ފުރިފައިވާއިރު ދެވަނަ ކުއްޖާގެ އުމުރަކީ ހަތަރު އަހަރެއެވެ. އެންމެ ހަގު ކުއްޖާ ބޭބީ ނާސަރީގައި އުޅޭއިރު އެ ކުއްޖާގެ އުމުރަކީ ދެ އަހަރެވެ.
ނިޝާމާގެ ހަށިގަނޑު މިހާރު މާލެ ގެނެސްފައިވާއިރު ހަށިގަނޑު އޮތީ މޯޗަރީގައެވެ. ފުލުހުން ވަނީ ނިޝާމާގެ ހަށިގަނޑު ޕޯސްޓްމޯޓަމް ހަދަން ނިންމާފައިވާކަން ހާމަކޮށްފައެވެ. އެހެންނަމަވެސް މި މަރާއި ގުޅޭ އިތުރު ތަފްސީލް ފުލުހުން މީޑިއާއަށް ހާމަކޮށްފައެއް ނުވެއެވެ.