މިދިޔަ އަހަރުގެ ބެލްޖިއަމްގެ އެންމެ މޮޅު ކުޅުންތެރިޔާގެ އެވޯޑު ޗެލްސީގެ ވިންގާ އެޑެން ހަޒާޑަށް ލިބިއްޖެއެވެ.
ބެލްޖިއަމްގެ އޮފިޝިއަލް ޓްވިޓާ އެކައުންޓުން ޕޯސްޓުކުރި އެންމެ ފަހުގެ ނަތީޖާ ދައްކާ ގޮތުން ހަޒާޑުގެ ފަހަތުން ލިސްޓުގެ ދެވަނަ ލިބެނީ މެންޗެސްޓާ ސިޓީގެ ކެވިން ޑި ބްރޭނާ އަށެވެ. އަދި ތިން ވަނަ ލިބެނީ މެންޗެސްޓާ ޔުނައިޓެޑްގެ ފޯވާޑް ރޮމެލޫ ލުކާކޫ އަށެވެ.
އޮންލައިން ސާވޭއެއް މެދުވެރިކޮށް ވޯޓު ލައިގެން ހޮވި އެ އެވޯޑުގައި ހަޒާޑަށް ލިބިފައިވަނީ 10،280 ވޯޓެވެ. ޑި ބްރޫނާ އަށް 4،710 ވޯޓު ލިބުނުއިރު ލުކާކޫ އަށް ލިބުނީ 3،223 ވޯޓެވެ.
އުމުރުން 26 އަހަރުގެ ހަޒާޑު ވަނީ މިދިޔަ އަހަރު ޗެލްސީއާއެކު އިނގިރޭސި ޕްރިމިއަ ލީގު ކާމިޔާބު ކޮށްފައެވެ. މީގެ އިތުރުން އޭނާ ވަނީ މި އަހަރު ރަޝިއާގައި އޮންނަ ވޯލްޑް ކަޕަށް ބެލްޖިއަމް ކޮލިފައިކޮށްދިނުމުގައި އިސް ދައުރެއް އަދާކޮށްފައެވެ. ބެލްޖިއަމް އަކީ ޖާރުމަނުގެ ފަހަތުން އެންމެ ރަނގަޅު ރެކޯޑަކާއެކު ވޯލްޑް ކަޕަށް ކޮލިފައިވި ޓީމެވެ.
އެ އެވޯޑަށް ވާދަކުރި އެހެން ކުޅުންތެރިންގެ ތެރޭގައި ހަޒާޑުގެ ކޮއްކޮ ތްރޯޖަން ހަޒާޑާއި، ޗެލްސީގެ ގޯލް ކީޕަރު ތިބައު ކޯޓުއާގެ އިތުރުން ނަޕޯލީ އަށް ކުޅެމުން އަންނަ ޑްރީސް މާޓެންސް ހިމެނެއެވެ.