ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ކުރިއަށް ގެންދާ ފުރަތަމަ ޑިވިޝަން ވޮލީބޯޅަ ލީގުގައި ބައިވެރިވުމުގެ ފުރުސަތު ހުޅުވާލައިފި އެވެ.
އަންނަ މަހު ފަށާ އެ މުބާރާތުގައި ބައިވެރިވުމުގެ ފުރުސަތު ހުޅުވާލާފައި ވަނީ މިދިޔަ އަހަރުގެ ފުރަތަމަ ޑިވިޝަންގެ ގަދަ ހަތަރު ކްލަބަށާއި ދެ ވަނަ ޑިވިޝަންގެ ޗެމްޕިއަން އަދި ރަނަރަޕް ޓީމަށެވެ.
ވީއޭއެމް އިން ބުނީ، އެ ކްލަބުތައް ބައިވެރިވާން އެދޭ ނަމަ ފޯމް ފުރިހަމަ ކުރުމަށް ފަހު މިމަހުގެ 20 ވަނަ ދުވަހުގެ ކުރިން ހުށަހެޅުމަށް އެދޭ ކަމަށެވެ. މުބާރާތުގައި ބައިވެރިވާން އެދޭ ފޯމް، ވީއޭއެމްގެ އޮފީހުން ލިބެން ހުންނާނެ ކަމަށެވެ.
މި އަހަރުގެ ގައުމީ ވޮލީ ލީގު ކުރިއަށް ގެންދިއުމަށް ހަމަޖެހިފައި ވަނީ އަންނަ މަހުގެ އެއް ވަނަ ދުވަހުން ފެށިގެން 20 ވަނަ ދުވަހުގެ ނިޔަލަށް ޒުވާނުންގެ މަރުކަޒު އެތެރޭ ކޯޓުގަ އެވެ.