އެންގޯލޯ ކަންޓޭގެ ފަޔަށް ލިބުނު އަނިޔާއަކާ ގުޅިގެން ވޯލްޑް ކަޕް ކޮލިފައިންގައި ފްރާންސް ކުޅޭ ފަހު މެޗުގައި އޭނާއަށް ކުޅެވޭ ގޮތެއް ނުވިއެވެ.
ކޮލިފައިންގައި ފްރާންސް ކުޅޭ ފަހު މެޗުގައި އަންނަ އަންގާރަ ދުވަހު އެ ޓީމު ނުކުންނަން ޖެހޭނީ ބެލާރަސްއާ ދެކޮޅަށެވެ. ޗެލްސީގެ މިޑްފީލްޑަރު ކަންޓޭގެ ފަލަމަސްގަނޑަށް އަނިޔާވެފައި ވަނީ އިއްޔެ ބަލްގޭރިއާއާ ދެކޮޅަށް ކުޅެ 1-0 ލަނޑުން ފްރާންސް މޮޅުވި މެޗުގެ ފުރަތަމަ ހާފުގެ ތެރޭގައެވެ.
ކަންޓޭއަށް ލިބުނު އަނިޔާގެ ތަފްސީލެއް ފްރާންސް ގައުމީ ޓީމުގެ ކޯޗު ޑިޑިއާ ޑެޝޯމްޕްސްއަށް ލިބިފައި ނުވި ނަމަވެސް، ކޮލިފައިންގެ ފަހު މެޗުގައި ކަންޓޭ ބޭނުން ނުކުރަން އޭނާ ވަނީ ނިންމައިފައެވެ.
"ކުރިއަށް އޮތް މެޗުގައި އަހަރެންނަށް އޭނާއެއް ބޭނުމެއް ނުކުރެވޭނެ. އޭނާގެ ފަލަމަސްގަނޑަށް ވަނީ އަނިޔާ ވެފައި،" ކަންޓޭގެ އަނިޔާއާ ގުޅޭ ގޮތުން ޑެޝޯމްޕްސް ބުންޏެވެ.
ބަލްގޭރިއާއާ ދެކޮޅަށް ކުޅުނު މެޗުގައި ކަންޓޭއަށް ލިބުނު އަނިޔާއާ ގުޅިގެން އޭނާ ބޭލުމާއެކު، ފްރާންސްގެ ފަރާތުން އޭނާ ނެތްތަން ފެނިގެން ދިޔައެވެ. ކަންޓޭއަކީ ފްރާންސް ޓީމަށް ވަރަށް މުހިންމު ކުޅުންތެރިއެއް ކަމަށް އެ ޓީމުގެ ކޯޗު ޑެޝޯމްޕްސް ވެސް ގަބޫލުކުރެއެވެ.
"ކަންޓޭއަކީ ޓީމުގައި އިސް ދައުރެއް އަދާކުރާ ކުޅުންތެރިއެއް. އޭނާގެ އަނިޔާއަށް ފަހު، އެ މަގާމަށް އެރުވީ އެޑްރިއެން ރާބިއޮޓް. ފަހަރެއްގައި ކަންޓޭގެ ފެންވަރު އޭނާގެ ކިބައިގައި ނެތީ ކަމަށް ވެދާނެ. މިއީ އެއްވެސް ވަރަކަށް ރާބިއޮޓްއާ ދެކޮޅަށް ބުނާ ދެރަ ބަހެއް ނޫން. އަހަރެމެންނަށް ކަންޓޭގެ އަނިޔާއަށްފަހު އުނދަގޫތަކެއް ކުރިމަތިވީ،" ފްރާންސްގެ ކޯޗު ބުންޏެވެ.
ކަންޓޭއަށް ލިބުނު އަނިޔާއާ ގުޅިގެން އެންމެ ބޮޑު އުނދަގުލަކާ ކުރިމަތިލާން ޖެހޭނީ ޗެލްސީއެވެ. ޗެމްޕިއަންސް ލީގުގައި މިމަހު ޗެލްސީން ރޯމާއާ ދެކޮޅަށް ނުކުންނަން ޖެހޭއިރު، އިނގިރޭސި ޕްރިމިއާ ލީގުގައި ކްރިސްޓަލް ޕެލަސްއާއި ވެޓްފޯޑް އަދި ބޯންމައުތުއާ ދެކޮޅަށް ނުކުންނަން ޖެހޭނެއެވެ. އޭގެ އިތުރުން އިނގިރޭސި ލީގް ކަޕްގެ ގަދަ 16ގައި މިމަހު އެވަޓަންއާ ދެކޮޅަށް ވެސް ޗެލްސީ ނުކުންނަން ޖެހޭނެއެވެ.