އިނގިރޭސި ޕްރިމިއަރ ލީގުގެ އެންމެ ފަހުގެ ޗެމްޕިއަން ޗެލްސީއަށް މި ސީޒަންގައި އެ ޓްރޮފީ ދިފާޢުކުރުމަކީ ނާދިރުކަމެއް ކަމަށް، ވާދަވެރި އާސެނަލްގެ ކޯޗު އާސެން ވެންގާ ބުނެފިއެވެ.
ވެންގާ ބުނީ، މިފަހަރުގެ ޓްރާންސްފަރގައި، ޕްރިމިއަރ ލީގުގެ ބޮޑެތި ކްލަބުތަކުން ސްކޮޑް ވަރަށް ބޮޑަށް ވަރުގަދަކޮށްފައި ވާކަމަށެވެ. އެހެންކަމުން މި ސީޒަނަކީ އެންޓޯނިއޯ ކޮންޓޭގެ ޓީމަށް ވަރަށް އުނދަގޫ ސީޒަނަކަށް ވާނޭކަމަށެވެ.
ސީޒަން ހުޅުވުމުގެ ގޮތުން، ބާއްވާ އެފްއޭ ކޮމިއުނިޓީ ޝީލްޑް މެޗުގައި މިއަދު ޗެލްސީއާ ދެކޮޅަށް އާސެނަލް ކުޅޭ މެޗުގެ ކުރީން މީޑިއާއާ ވާހަކަދައްކަމުން ވެންގާ ބުނީ، ޗެލްސީން މިފަހަރުގެ ލީގުގައި ރަނގަޅު "ފައިޓެއް" ދިންކަމުގައި ވީ ނަމަވެސް ލީގު ކާމިޔާބުކުރަން ބޭނުންވާ ވަރަށް ޕޮއިންޓް ހޯދިދާނޭ ކަމަށް ގަބޫލު ނުކުރާ ކަމަށެވެ.
"ބައެއް ކްލަބުތައް މިވަނީ ވަރަށް ބޮޑަށް ވަރުގަދަކޮށްފައި، އެހެންކަމުން އެ ކްލަބުތަކުން ޗެލްސީ އަތުން ޕޮއިންޓު ދަމައިގަންނާވެ،" ވެންގާ ބުންޏެވެ.
މިދިޔަ ސީޒަންގެ އެފްއޭ ކަޕް ޗެމްޕިއަންސް އާސެނަލާއި ޕްރިމިއަރ ލީގު ޗެމްޕިއަން ޗެލްސީ ވާދަކުރާ އެފްއޭ ކޮމިއުނިޓީ ޝީލްޑް މެޗު އޮންނާނީ، މިއަދު ހަވީރު ރާއްޖޭގަޑިން 18:30ގައެވެ. މެޗު ކުޅޭނީ ވެމްބްލީ ސްޓޭޑިއަމްގައެވެ.