ރައްޔިތުންގެ މަޖްލިސް އިނގުރައިދޫ ދާއިރާގެ މެންބަރު އިބްރާހިމް ފަލާޙް، އުމަރު ނަސީރުގެ އަބުރަށް އަރައިގެން ދެއްކެވި ވާހަކަފުޅު، ޕަބްލިކް ސާވިސް މީޑިއާ (ޕީއެސްއެމް)އިން ބްރޯޑްކާސްޓްކޮށްފައި ވާތީ، އެ ކުންފުނި 200،000 ރުފިޔާ އިން ޖޫރިމަނާކޮށްފި އެވެ.
ޕީއެސްއެމް ޖޫރިމަނާ ކުރީ އެ ކޮމިޝަނަށް އުމަރު ނަސީރު ހުށަހެޅުއްވި ޝަކުވާއަކާ ގުޅިގެން، އެ މައްސަލަ ތަހުގީގު ކުރުމަށްފަހުގަ އެވެ. އެ މައްސަލަ ތަހުގީގުކޮށް ނިންމީ ހުށަހެޅިތާ ހަތަރު މަސްފަހުންނެވެ.
އެ މައްސަލަ ތަހުގީގުކޮށް ނިންމުމަށް ފަހު އެ ކޮމިޝަނުން ބުނެފައި ވަނީ އުމަރު އަބުރާ ބެހި ފަލާހު ދެއްކެވި ވާހަކަފުޅު މެދުކަޑާނުލާ އެ އިވެންޓް ޓީވީއެމުން ފޮނުވާފައިވާ ކަމަށް ބުނެ، ހުށަހަޅާފައިވާ މައްސަލައަށް އެ ކުންފުނިން އިއުތިރާފުވެފައިވާ ކަމަށެވެ.
"އިޢުތިރާފްވެފައިވާތީ އާއި، އެކޮންޓެންޓްގެ ދިފާއުގައި ޤާނޫނީ އެއްވެސް ހުއްޖަތެއް އެ މީޑިޔާއަށް ދެއްކިފައި ނުވާތީ، އެ ކޮންޓެންޓަކީ އަބުރު ގާނޫނުގެ 27 ވަނަ މާއްދާ އަދި ހަ ވަނަ ބާބުގައި ބަޔާންކޮށްފައިވާ ޚިޔާލުފާޅުކުރުމުގެ ހަމަތަކާ ޚިލާފުވާ ކޮންޓެންޓެއް ކަމަށް ކަނޑައަޅައި، އަދި މިއީ އެ ޤާނޫނުގައި ހުއްދަ ކުރާ އިންތަކާ ޕީއެސްއެމް ޚިލާފްވާ ފުރަތަމަ ފަހަރުކަމަށް ވާތީ،..." އެ މައްސަލަ ނިންމި ބަޔާނުގައިވެ އެވެ.
ބްރޯޑް ކާސްޓިންގް ކޮމިޝަނުން ޕީއެސްއެމްއަށް އަންގާފައި ވަނީ 30 ދުވަހުގެ ތެރޭގައި އެ ފައިސާ ދެއްކުމަށެވެ.
އުމަރު ނަސީރު ޗެނަލް 13 އަދި ޓީވީއެމްއާ ދެކޮޅަށް ހުށަހެޅުއްވި މައްސަލާގައި ބުނެފައި ވަނީ ޕީޕީއެމްގެ ބައްދަލުވުމެއްގައި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހީމް ފަލާހު ވަނީ އޭނާގެ އަބުރަށް އަރައިގެންފައި ކަމަށާއި އެމަންޒަރު އަޑާއެކު ޓީވީއެމް އާއި ޗެނަލް 13 އިން ރޭ ލައިވްކޮށް ބްރޯޑްކާސްޓް ކޮށްފައިވާ ކަމަށެވެ.
އޭރު ފަލާހު ވާހަކަ ފުޅު ދައްކަވާފައި ވަނީ އުމަރު ހޯމް މިނިސްޓަރުގެ މަގާމުގައި ހުންނެވި އިރު މިނިވަން 50ގެ މަސައްކަތްތަކެއް ކުރުމަށް މަސްލަހަތު އޮތް ކުންފުންޏަކާ ހަވާލު ކުރި ކަމަށް ބުނެ އެވެ.