ޕަބްލިކް ސާވިސް މީޑިއާ (ޕީއެސްއެމް)ގެ ޓީވީއެމުން މުޅި ރާއްޖެއަށް ހުޅުވާލައިގެން މިއަހަރު ބޭއްވި "އެންމެ އަލިގަދަ ތަރި"ގެ ގުރުއާން މުބާރާތުގެ އެއް ވަނަ ފ. ނިލަންދޫ، ގްރީންހެވަން މުހައްމަދު އިސްމާއިލް ހޮވިއްޖެ އެވެ.
ރަމަޟާން މަހަށް ހާއްސަކޮށްގެން ޓީވީއެމުން ގެނެސްދިން ޕްރޮގްރާމް ރާއްޖޭގެ އެންމެ އަލިގަދަ ތަރީގެ މަގާމަށް އޭނާ ހޮވުމާ ގުޅިގެން، ޕީއެސްއެމްއެމުން ވަނީ އޭނާއަށް 500،000 ރުފިޔާ ހަދިޔާކޮށްފަ އެވެ.
އެންމެ އަލިގަދަ ތަރީއަކަށް ހޮވުނު އިސްމާއިލަށް ފައިސާގެ އިނާމާއި ޓްރޮފީ ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ފާތުމަތު އިބްރާހިމެވެ.
އެންމެ އަލިގަދަތަރީގެ މަގާމަށް މުހައްމަދު އިސްމާއިލް ހޮވުމުން އެކިއެކި ފަރާތްތަކުން ހުށަހެޅި އަގުބޮޑެތި އިނާމުތަކެއް އޭނާއަށް ވަނީ ލިބިފަ އެވެ.
މިއަހަރުގެ އެންމެ އަލިގަދަ ތަރީގެ މުބާރާތުގެ ދެ ވަނަ ހޯދީ ކ. މާލެ، ގ. ޖޫލިއަޓްގެ، ފާތުމަތު މަލްދާ މުހައްމަދެވެ. ތިން ވަނަ ހޯދީ ރ. ހުޅުދުއްފާރު، ނަސީމީގޭ ނަސްރަތު އިސްމާއިލެވެ.
އެންމެ އަލިގަދަ ތަރީގެ މަގާމު ހޯދުމަށް ގަދަ ތިނެއްގައި ވާދަ ކުރި ތިން ބައިވެރިން-- ފޮޓޯ/ ޕީއެސްއެމް
ދިވެހިރާއްޖޭގެ އެންމެ އަލިގަދަތަރި ހޮވާ ޕްރޮގްރާމަކީ 2013 ވަނަ އަހަރުން ފެށިގެން ޕީއެސްއެމުން ގެނެސްދެމުންދާ ޕްރޮގްރާމެކެވެ. މިދިޔަ އަހަރުގެ އެންމެ އަލިގަދަތަރިއަކަށް ހޮވިފައި ވަނީ ށ. ފޯކައިދޫ އާދަމް ނަސީމު ހޮވިއްޖެ އެވެ.