ޕަބްލިކް ސާވިސް މީޑިއާ (ޕީއެސްއެމް)ގެ ޓީވީއެމުން މުޅި ރާއްޖެއަށް ހުޅުވާލައިގެން މިއަހަރު ބޭއްވި އަޔާދީތަކާފުލް "އެންމެ އަލިގަދަ ތަރި"ގެ ގުރުއާން މުބާރާތުގެ އެއް ވަނަ ށ. ފޯކައިދޫ އާދަމް ނަސީމު ހޮވިއްޖެ އެވެ.
ހެޔޮ އެދޭ ފަރާތްތަކުން އޭނާއަށް ހުށަހެޅި ފައިސާތަކާއި އިނާމުތަކުގެ ޖުމްލަ އަގު 1.9 މިލިއަން ރުފިޔާއަށް އަރާފައި ވަނީ ރައީސުލްޖުމްހޫރިއްޔާ އަބްދުﷲ ޔާމީން އޭނާއަށް ދެއްވި އިނާމާއެކުގަ އެވެ. އެންމެ އަލިގަދަ ތަރީގެ މަގާމަށް ހޮވޭ ފަރާތަަށް ޕީއެސްއެމުން ހުށަހަޅާފައި ވަނީ 500،000 ރުފިޔާ އެވެ.
އެންމެ އަލިގަދަ ތަރީގެ އެއް ވަނަ މަގާމު އާދަމް ނަސީމަށް މިރޭ އެރުވީީ ނައިބު ރައީސް އަބްދުﷲ ޖިހާދެވެ.
އެންމެ އަލިގަދަތަރި މުބާރާތުގެ ދެ ވަނައަށް ދިޔައީ ހއ. އުތީމު، އިބްރާހިމް އިމާޒެވެ. އޭނާއަށް ހުށަހަޅާފައިވާ އިނާމުތަކުގެ އަގު 1.3 މިލިއަން ރުފިޔާއަށް އަރައެވެ.
މުބާރާތުގެ ތިން ވަނަ އަށް ހޮވުނީ ސ. މަރަދޫ، އަލްގާރީ އަބްދުﷲ ތޯލިބެވެ. އޭނާއަށް އެކިއެކި ފަރާތްތަކުން ހުށަހަޅާފައިވާ އިނާމުތަކުގެ އަގު ވެސް 1.3 މިލިއަން ރުފިޔާއަށް އަރަ އެވެ.
އެހެން އަހަރުތަކާއި ހިލާފަށް މިފަހަރު އެ މުބާރާތައް މީހުން ހޮވުމަށް ރާއްޖޭގެ ހަތަރު ސަރަހައްދެއްގައި އޮޑިޝަންތައް ބޭއްވި އެވެ. މިއީ އެ ޕްރޮގުރާމް ބާއްވާ ހަތަރު ވަނަ ފަހަރެވެ. މީގެ ކުރިން އެއް ވަނަ އަށް ހޮވޭ ފަރާތަކަށް ދެމުން ދިޔައީ އެއް ލައްކަ ރުފިޔާއެވެ.
ޕަބްލިކް ސާވިސް މީޑިއާ(ޕީއެސްއެމް)އިން މިރޭ ވަނީ އެންމެ އަލިގަދަ ތަރީގެ ޖޫނިއާ އަދި ރައީސުލްޖުމްހޫރިއްޔާގެ ދައުވަތައް ބައިނަލްއަގުވާމީ ގުރުއާން މުބާރާތެއް ބޭއްވުމަށް ނިންމާފައިވާކަން އިއުލާން ކުރައްވާފަ އެވެ.