މިހާރު ރާއްޖޭގައި ފެތުރެމުންދާ އެޗްވަންއެންވަން ރޯގާއާ ގުޅިގެން ހެލްތް ޕްރޮޓެކްޝަން އޭޖެންސީ (އެޗްޕީއޭ)އަށް ބޭނުންވާ ހުރިހާ ބޭހާއި ވެކްސިންތައް ބަރާބަރަށް ސަޕްލައިކޮށްދެމުންދާ ކަމަށް އެސްޓީއޯއިން ބުނެފިއެވެ.
އެކުންފުނީގެ ބޭސް، އަތޮޅު ތެރެއަށް ހުއްޓުމެއްނެތި ފޮނުވުމުގެ ބޭނުމުގައި ޣިޔާސުއްދީން ސްކޫލުގައި ގާއިމް ކުރި ޑިސްޓްރިބިއުޝަން ސެންޓަރުގައި ނޫސްވެރިންނަށް މައުލޫމާތު ދެއްވަމުން އެސްޓީއޯގެ މެނޭޖިންގ ޑިރެކްޓަރ އަހުމަދު ޝަހީރު ވިދާޅުވީ، އެޗްވަންއެންވަން ރޯގާއާ ގުޅިގެން ބޭހުގެ ޑިމާންޑު ވަރަށް މައްޗަށް ގޮސްފައިވާ ކަމަށެވެ. އަދި ޑިމާންޑާ އެއް ވަރަކަށް އެއާ ފްރެއިޓްކޮށް ބޭސް ގަވާއިދުން ގެންނަމުންދާ ކަމަށްވެސް އޭނާ ވިދާޅުވިއެވެ.
"މިނިސްޓްރީ އޮފް ހެލްތުގެ އެޗްޕީއޭއަށް ބޭނުންވާ ވެކްސިންއާއި މި ރޯގާއަށް ބޭނުންވާ ޚާއްސަ ބޭސްތައްވެސް އަޅުގަނޑުމެން މިދަނީ އެ ބޭނުންފުޅުވާ ޝެޑިއުލަކަށް ބޭނުން އަދަދަކަށް ބަރާބަރަށް ފޯރުކޮށްދެމުން،" ޝަހީރު ވިދާޅުވިއެވެ.
އޭގެ އިތުރުން އޭނާ ވިދާޅުވީ، ހުމާ ރޯގާއިން ރައްކާތެރިވުމަށް ބޭނުންވާ ބޭސް، ޣިޔާސުއްދީން ސްކޫލުގައި ގާއިމް ކުރި ޑިސްޓްރިބިއުޝަން މަރުކަޒު މެދުވެރިކޮށް އަތޮޅުތެރޭގައި ހުރި އެކުންފުނީގެ ފާމަސީތަކަށް މެދުކެނޑުމެއް ނެތި ފޯރުކޮށްދޭނެ ކަމަށެވެ. އަދި އަތޮޅު ތެރޭގައި ހުރި އެސްޓީއޯ ފާމަސީތަކުން ރޯގާއާއި ހުމަށް ބޭނުންވާ ބޭސް ހުސް ނުވާވަރަށް ސަޕްލައި ކުރަމުން ގެންދާނެ ކަމަށްވެސް އޭނާ ވިދާޅުވިއެވެ.
އެކުންފުނިން ބުނި ގޮތުގައި މިހާރު ފެތުރެމުންދާ ރޯގާއާއި ހުމުގެ ސަބަބުން ބޭހުގެ ޑީމާންޑު ވަނީ 30 ޕަސެންޓާއި 40 ޕަސެންޓާ ދެމެދުގެ މިންވަރަކަށް އިތުރުވެފައެވެ. ނަމަވެސް އެކުންފުނިން ދަނީ ޑިމާންޑާ އެއްވަރަށް ބޭސް ސަޕްލައިކޮށްދެމުންނެވެ.