ރާއްޖޭގެ އެންމެ އުތުރުގައި އޮންނަ އިހަވަންދިއްޕޮޅު އަތޮޅުގައި ތަރައްގީ ކުރުމަށް އިއުލާންކޮށްފައިވާ އައިހެވަން މަޝްރޫއުގެ އަމަލީ މަސައްކަތް ފެށުމަށް ބޭނުންވާ އިންވެސްޓްމެންޓްތައް ހޯދުމުގެ މަސައްކަތް ދާދި އަވަހަށް ފަށާނެ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ރައްޔިތުންގެ މަޖިލީސް މި އަހަރަށް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ޔާމީން ވިދާޅުވީ އައިހެވަން މަޝްރޫއުގެ ތަފްސީލު ޕްލޭންތައް މިއަހަރުގެ އޭޕްރިލް މަހުގެ ކުރިން ނިމޭނެ ކަމަށެވެ.
"މިއާ އެކު، މަޝްރޫޢުގެ ޢަމަލީ މަސައްކަތް ފެށުމަށް ބޭނުންވާ ބޭރުގެ އިންވެސްޓްމަންޓްތައް ހޯދުމުގެ މަސައްކަތް ކުރެވިގެންދާނެ،" ރައީސް ވިދާޅުވި އެވެ.
އައިހެވަންގެ ފީސިބިލިޓީ ސްޓަޑީ ހަދާފައިވާ އިރު، އެތަނުގެ މާސްޓާ ޕްލޭން ހެދުމުގެ މަސައްކަތް ކުރުމަށް ވަނީ ބޭރުގެ ފަރާތަކާ ހަވާލުކޮށްފަ އެވެ. މިދިޔަ އަހަރުގެ ނޮވެމްބަރު މަހުގެ ތެރޭގައި، އެ މަސައްކަތް ދިވެހި ސަރުކާރުން ހަވާލުކޮށްފައި ވަނީ ސިންގަޕޫރުގެ ސުރްބާނާ ޖުރޯންގް ކޮންސަލްޓަންސީ ކުންފުންޏާ އެވެ. އެ ކުންފުންޏަކީ އިންޑިއާގެ އަންދްރާ ޕަރެދޭޝްގެ އާ ވެރިރަށް އަމަރާވަތީ ސިޓީގެ މާސްޓާ ޕްލޭން ވެސް ހަދަނީ ސުރްބާނާ ޖުރޯންގްއިންނެވެ.
އައިހެވަންގެ މާސްޓާ ޕްލޭން ހެދުމަށް ސުރްބާނާ ޖުރޯންގްއާ ހަވާލުކޮށްފައި ވަނީ 15 މަސް ދުވަހުގެ މުއްދަތެއްގެ ތެރޭގައި ނިންމުމަށެވެ.
އައިހެވަން މަޝްރޫއާ ބެހޭގޮތުން ދާދި ފަހުން އިންޑިއާގެ ނޫހަކަށް ދެއްވި ބަސްދީގަތުމެއްގައި، ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވީ އިންޑިއާ އާއި އެހެން ގައުމެއްގެ އެއްވެސް އިންވެސްޓަރެއްގެ ޕްރޮޕޯޒަލެއް އައިހެވަންއަށް މިހާތަނަށް ލިބިފައި ނުވާ ކަމަށެވެ.
"މިހާތަނަށް ނުލިބޭ ޕްރޮޕޯޒަލެއް. އެކަމަކު އަޅުގަނޑު ގަބޫލުކުރަނީ އިންޑިއާގެ ބައެއް ވިޔަފާރިތަކުން ދަނީ މި މަޝްރޫއު ދިރާސާކުރަމުން،"
އިހަވަންދިއްޕޮޅު އަތޮޅު އޮންނަނީ ދުނިޔޭގެ އިރުމައްޗާއި ހުޅަނގު ގުޅުވައިދޭ، އިންޓަނޭޝަނަލް މެރިޓައިމް ޓްރޭޑް ރޫޓުގަ އެވެ. އެއީ އިރުމަތީ އޭޝިއާއާއި ޗައިނާއާ، މެދުއިރުމަތި އަދި ވިލާތު ގުޅުވައިދޭ މަގެވެ.
އައިހެވަންގެ މަޝްރޫއުގައި ހިމެނޭ ކޮމްޕޯނެންޓްތަކުގެ ތެރޭގައި ޓްރާންސްޝިޕްމެންޓް ބަނދަރަކާއި، އެކްސްޕޯޓް ޕްރޮސެސިންގް ޒޯނެއް ހިމެނޭ ބައިނަލްއަގުވާމީ ވައިގެ މައި ބަނދަރަކާއި ޑޮކްޔާޑަކާއި ބަންކަރިންގް ޚިދުމަތާއި، ކްރޫޒް ހަބަކާއި ޔޮޓު މެރީނާއެއްގެ އިތުރުން ފަތުރުވެރިކަން ތަރައްގީކުރުން ހިމެނެ އެވެ. އަދި ހަމަ އެއާ އެކު މީހުން ދިރިއުޅުމަށާއި ރާއްޖެއާއި ބޭރުގެ ވިޔަފާރިތައް އައިސް ރާއްޖޭގައި އޮފީސް ގާއިމުކުރުމުގެ ފުރުސަތު ވެސް މި މަޝްރޫއުގެ ތެރޭގައި ލިބިގެން ދާނެ އެވެ.