އިސްލާމީ ޖުމްހޫރިއްޔަތެއްގެ ގޮތުގައި ރަސްމީކޮށް އޮތް ގެމްބިއާގެ ރަސްމީ ނަމުން އިސްލާމީ ކަނޑާލައި، އެގައުމުގެ ރަސްމީ ނަން "ގެމްބިއާގެ ޖުމްހޫރިއްޔާ" ނުވަތަ ރިޕަބްލިކް އޮފް ދަ ގެމްބިއާއަށް ބަދަލުކުރަން އެގައުމުގެ އާ ރައީސް އަޑަމާ ބަރޯ ނިންމަވައިފިއެވެ.
ގެމްބިއާގެ ކުރީގެ ރައީސް ޔަހްޔާ ޖަމޭހްގެ ސަރުކާރުގައި، ރިޕަބްލިކް އޮފް ގެމްބިއާގެ ނަން "އިސްލާމިކް ރިޕަބްލިކް އޮފް ގެމްބިއާ"އަށް ބަދަލުކުރީ 2015 ވަނަ އަހަރުގެ ޑިސެމްބަރު މަހުއެވެ. ރައީސް ޖަމޭހް އޭރު އެފަދައިން ގެމްބިއާގެ ނަން ބަދަލުކުރެއްވީ، ގެމްބިއާގެ އަބާދީގެ މެޖޯރިޓީއަކީ މުސްލިމުންނަށް ވުމުން ކަމަށާއި، އެގައުމުގެ ދީނީ ވަހުދަތު ހިމާޔަތް ކުރެއްވުމަށްޓަކައެވެ.
އެހެން ނަމަވެސް ރައީސް ޖަމޭހްގެ ގެންނެވި އެ ބަދަލަކީ އެގައުމުގެ ގާނޫނު އަސާސީއާ ޚިލާފު ބަދަލެއް ކަމަށް އޭރުގެ އިދިކޮޅު ފަރާތްތަކުން ބުނަމުން ދިޔައެވެ. ސަބަބަކީ، ގެމްބިއާގެ ގާނޫނު އަސާސީގައިވާ ގޮތުން، ގެމްބިއާއަކީ ޢިލްމާނީ (ސެކިއުލާ) ދައުލަތަކަށް ވާތީއެވެ.
ޖަމޭހްއާ އިދިކޮޅު ފަރާތްތަކުން ބުނީ، އެފަދަ ބަދަލެއް ގެންނަން ޖެހޭނީ ރައްޔިތުންގެ ޚިޔާލު ހޯދުމުގެ ވޯޓެއް ނެގުމަށްފަހު ކަމަށެވެ.
ގެމްބިއާގެ އޭރުގެ ރައީސް ޔަހްޔާ ޖަމޭހް ރިޔާސީ އިންތިޚާބުން ބަލިކުރައްވައި، ގެމްބިއާގެ ރިޔާސަތަށް ވަޑައިގެންނެވި އަޑަމާ ބަރޯ އިއްޔެ ކުރެއްވި ޓްވީޓެއްގައި ވިދާޅުވީ، ގެމްބިއާގެ ރަސްމީ ނަމުން "އިސްލާމީ" ކަނޑާލައި، ކުރިންވެސް އޮތް ގޮތަށް "ގެމްބިއާގެ ޖުމްހޫރިއްޔާ" ނުވަތަ "ރިޕަބްލިކް އޮފް ދަ ގެމްބިއާ"އަށް ބަދަލުކޮށްފައިވާ ކަމަށެވެ.
Gambia's official name will no longer be 'The Islamic Republic'. It will hold the name of — The Republic of The Gambia. #Gambia pic.twitter.com/OqbFsIypzI
— Adama Barrow (@adama_barrow) January 29, 2017
ރައީސް ބަރޯ ގެމްބިއާގެ ރިޔާސަތަށް އިންތިޚާބުވެފައިވާ އިރު، ގެމްބިއާގެ ނައިބު ރައީސެއްގެ ގޮތުގައި އެމަނިކުފާނު އައްޔަނު ކުރައްވާފައިވަނީ އަންހެން ބޭފުޅެކެވެ.