ގެމްބިއާގެ ރައީސް އެޑަމާ ބަރޯ، އެގައުމުގެ ނައިބު ރައީސްގެ މަގާމަށް އަންހެން ކަނބަލަކު އައްޔަނު ކުރައްވައިފިއެވެ.
ގެމްބިއާ މިނިވަންވި ފަހުން ރައްޔިތުން އިންތިޚާބުކޮށްގެން ހޮވި ފުރަތަމަ ސަރުކާރު މިހާރު ވެރިކަމަށް އައިސްފައިވާ އިރު، އެ ސަރުކާރުގެ ރައީސް އެޑަމާ ބަރޯ، އެމަނިކުފާނުގެ ނައިބު ރައީސަކަށް އައްޔަނުކުރައްވާފައިވަނީ ފާތުމަތާ ތަމްބަޖަންގްއެވެ.
ފާތުމަތާ ތަމްބަންޖަންގަކީ 1990 ގެ އަހަރުތަކުގައި، ކުރީގެ ރައީސް ޔަހްޔާ ޖަމޭހްގެ ސަރުކާރުގައި ހެލްތު އެންޑް ސޯޝަލް ވެލްފެއާއާ ބެހޭ ވަޒީރުކަން މީގެ ކުރިން ކުރެއްވި ބޭކަނބަލެކެވެ. އަދި އެކަމަނާ މިވަގުތު ގެންދަވަނީ ގެމްބިއާގައި، ޔުނައިޓެޑް ނޭޝަންސް ޑިވެލޮޕްމެންޓް ޕްރޮގްރާމް (ޔޫއެންޑީޕީ)ގައި މަސައްކަތް ކުރައްވަމުންނެވެ.
ނައިބު ރައީސާ ފާތުމަތާއަކީ ގެމްބިއާގެ ކުރީގެ ރައީސް ޔަހްޔާ ޖަމޭހްގެ މައްޗަށް ކުރި ހޯދުމަށް އިދިކޮޅަށް ނުކުތް އިއްތިހާދުގެ މޭސްތިރިޔާއެވެ.
ޑިސެމްބަރު މަހު ބޭއްވި އިންތިޚާބުން ޔަހްޔާ ޖަމޭހް ނާކާމިޔާބުވެވަޑައިގެންނެވިކަން ޔަގީންވުމާ އެކު، ޔަހްޔާ ޖަމޭހްގެ ސަރުކާރުގައި އޭނާ ހިންގަވާފައިވާ ޖިނާއީ ކުށްތައް ތަހުގީގުކޮށް، އޭނާގެ މައްޗަށް ދައުވާ ކުރާނެކަމަށް ފާތުމަތާ ވިދާޅުވިއެވެ.
އިންތިޚާބުގެ ނަތީޖާ ގަބޫލު ނުކުރައްވާނެކަމަށް ޔަހްޔާ ޖަމޭހް ވިދާޅުވެ، ކޯޓަށް ވަޑައިގެންނެވި ފާތުމަތާ އެހެން ވިދާޅުވުމުންނެވެ.
އިންތިޚާބުގެ ބަލި ގަބޫލުކުރައްވައި، އަމިއްލައަށް އަރުވާލެވިގެން އިކުއަޓޯރިއަލް ގިނީގައި ކުރީގެ ރައީސް ޖަމޭހް މިހާރު ހުންނެވި އިރު، ގެމްބިއާގެ ރައީސް އެޑަމާ ބަރޯ މިވަގުތު ހުންނެވީ އަވަށްޓެރި ސެނެގޯލްގައެވެ. އެމަނިކުފާނު ރިޔާސީ ހުވާ ވެސް ކުރެއްވީ، ސެނެގޯލްގައި ހުންނަ ގެމްބިއާގެ އެމްބަސީގައި ހުންނަވައެވެ.
ރައީސް ބަރޯ ހަފްތާއެއްގެ ތެރޭގައި ގެމްބިއާއަށް އެނބުރި ވަޑައިގަންނަވާނެ ކަމަށް ބެލެވޭ އިރު، އެމަނިކުފާނުގެ ވަޒީރުންގެ މަޖިލީސްވެސް މި ހަފްތާގެ ތެރޭގައި އައްޔަނު ކުރެވޭނެއެވެ.