އެމްޑީޕީއަށް އަލުން ދިޔައީ އެ ޕާޓީއާ އެއްކޮށް، ރާއްޖޭގެ މުސްތަގުބަލަށް މާ ބޮޑަށް މަސައްކަތް ކުރެވޭނެ ކަމަށް ގަބޫލު ކުރާތީ ކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒު ރޭ ވިދާޅުވެއްޖެއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި ޝިފާޒު ވިދާޅުވީ، އެމްޑީޕީއާ ޑިމޮކްރެޓްސްއަށް ވުރެން ވެސް ރައްޔިތުން ހޯދި ގާނުނު އަސާސީން ލިބިދޭ ހައްގުތަކާއި ގާނޫނު ބަޔާން ކުރާ ތަރަހައިގެ ތެރޭގައި ދައުލަތް ހިންގުމަށް މަސައްކަތް ކުރުން މުހިންމު ކަމަށެވެ.
ޑިމޮކްރެޓްސްއާ އެއްވެސް މައްސަލައެއް ޖެހިފައި ނޯންނާނެ ކަމަށާއި ނުވެސް ޖެހޭނެ ކަން ޝިފާޒު ފާހަގަކުރެއްވިއެވެ.
އެގޮތުން، ޑިމޮކްރެޓުން ވެސް މަސައްކަތް ކުރަމުން އަންނަނީ ވަރަށް ރަނގަޅު ހަމަތަކެއްގެ ތެރޭގައި ކަމަށާއި ޕާޓީ ބަދަލު ކުރުމުގައި ގޮތެއް ނިންމަން ޖެހުނީ އަމާޒަށް ވާސިލުވެވޭނީ ޑިމޮކްރެޓްސްއަށް ވުރެ އެމްޑީޕީގައި ހުރެގެން ކަމަށް ވާތީ ކަމަށް ޝިފާޒު ވިދާޅުވިއެވެ.
އަޅުގަނޑު ދެކޭ ގޮތުގައި އެމްޑީޕީގައި ހުރެގެން ކުރެވޭ މަސައްކަތަކުން އަދި ޑިމޮކްރެޓްސްއަށް ވެސް ރާއްޖޭގެ މުސްތަގްބަލަށް ވެސް މިވަގުތު މާ ބޮޑު މަސައްކަތެއް ކުރެވޭނެ ކަމަށް އަޅުގަނޑަށް ގަބޫލުކުރެވުނީ. އޭގެން ހަމަ ގައިމުވެސް ޑިމޮކްރެޓްސްއަކަށް އަދި ޑިމޮކްރެޓްސްގެ މެންބަރުންނަކަށް ވެސް ގެއްލުމެއް ނުވާނެ
ޑިމޮކްރެޓްސްގެ ވެސް ނައިބު ރައީސްކަން ކުރެއްވި ޝިފާޒް ވިދާޅުވީ، ޑިމޮކްރެޓްސްގެ މެންބަރުންނާ އެހާ ގާތްކޮށް އުޅުމަށް ފަހުގައި ޕާޓީ ބަދަލުކުރުމަކީ ވެސް ފަސޭހަ ކަމެއް ނޫން ކަމަށާއި ނަމަވެސް އޭގެ މާނައަކީ އެ ޕާޓީގެ މެންބަރުންނާ ދުރުވީ ނޫން ކަމަށެވެ.
ޝިފާޒް ވިދާޅުވީ، މި ވަގުތަކީ އަމިއްލަ ސިޔާސީ ކުރިމަގަށް ވުރެ ރާއްޖޭގެ ކުރިމަގަށް ވިސްނަން ވީ ވަގުތު ކަމަށާއި ކަންބޮޑުވާ މިންވަރަށް ރާއްޖޭގެ ކަންކަން ދާ ކަމަށެވެ.
އެގޮތުން، އެމްޑީޕީން ގެނައި ހާލަތު މިއަދު މާ ނުރައްކާ ހާލަތަކަށް ބައްދަލުވެއްޖެ ކަމަށާއި ކޮންމެ ކަމަކަށް ރައްޔިތުން ސަލާން ޖަހަން ޖެހޭ ހިސާބަށް މިއަދު ކަންކަން ގޮސްފައިވާ ކަމަށް އޭނާ ވަނީ ވިދާޅުވެފައެވެ.