ބަނދަރަކާ އެކު ސިފަވަރު ތަރައްގީ ކުރުމަށް ސިފައިންގެ ވެލްފެއާ ކޮމްޕެނީ އަށް

ސިފައިންގެ އެކި ކަންކަމުގައި ބޭނުންކުރަމުން އަންނަ ރަށް، ސިފަވަރުގައި ބަނދަރަކާއި އެ އާގުޅޭ އެހެނިހެން ވަސީލަތްތަކާއި ހިދުމަތްތައް ގާއިމްކުރުމަށް ޑިފެންސް މިނިސްޓްރީން އެ ރަށް ސިފައިންގެ ވެލްފެއާ ކޮމްޕެނީ (ސިވެކް) އަށް ހަވާލުކޮށްފި އެވެ.

މިއަދު ސިފައިންގެ ކޯސްޓްގާޑް ބިލްޑިންގުގައި ބޭއްވި ރަސްމިއްޔާތެއްގައި މާލެ އަތޮޅު ސިފަވަރު (އުތުރު ތިލަފަޅު) ސިވެކަށް ހަވާލުކުރުމުގެ އެއްބަސްވުމުގައި ޑިފެންސް މިނިސްޓްރީގެ ފަރާތުން ސޮއިކުރެއްވީ ޑިފެންސް މިނިސްޓްރީގެ ސްޓޭޓް މިނިސްޓަރު މުހައްމަދު ޒުހައިރު އެވެ. ސިވެކްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މޭޖާ އަހުމަދު ޒުބައިރު އެވެ.

ސިފަވަރު ސިފައިންގެ ވެލްފެއާ ކޮމްޕެނީ ސިވެކް އަށް ހަވާލުކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ މުހައްމަދު އަފްރާހް

ޑިފެންސް މިނިސްޓްރީން ބުނީ ސިފަވަރު ތަރައްގީވެގެންދާ އިރު ކޯސްޓްގާޑަށް ދިމާވެފައިވާ ބަނދަރުކުރުމާއި ކޯސްޓްގާޑް އުޅަނދުފަހަރު މަރާމާތުކުރުމުގައި މިހާރު ދިމާވާ މައްސަލަތައް ހައްލުކޮށް ކޯސްޓްގާޑް ބަނދަރުކުރެވޭނެ އެންމެ ޒަމާނީ ބަނދަރަކާއި ކޯސްޓްގާޑް އުޅަނދުތަކަށް ބޭނުންވާ ހުރިހާ ވަސީލަތްތައް ގާއިމްކުރާނެ ކަމަށެވެ.

އެގޮތުން ތެޔޮ ރައްކާކުރާނެ ތަނަކާއި އުޅަނދުފަހަރު އެހެލާ މަރާމާތު ކުރެވޭނެ ވަސީލަތްތަކާއި މެރިޓައިމް ސްކޫލަކާއި ކޯސްޓްގާޑްގެ ސިފައިންނަށް ހިތްހަމަޖެހުމާ އެކު ސިފަވަރުގައި ތިބެވޭނެ އިންތިޒާމުތައް ހަމަޖައްސައިދޭނެ ކަމަށް ޑިފެންސް މިނިސްޓްރީން ބުންޏެވެ.

އެ ރަސްމިއްޔާތުގައި ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމް ވިދާޅުވީ މިހާރު ކޯސްޓްގާޑް އުޅަނދުތައް ބަލަހައްޓަނީ މާލޭގެ ބޭރުގައި އަޅާފައިވާ ބޮއިތަކެއްގައި ކަމަށެވެ. އެގޮތަށް އެ އުޅަނދުތައް ބަލަހައްޓާ އިރު އޭގައި ހުންނަ މޯޓަރުތައް އަބަދު ޖައްސާފައި ބަހައްޓަން ޖެހޭ ކަމަށާއި އޭގެ ސަބަބުން ހިނގާ ހަރަދު، އަހަރަކަށް ބަލާ ނަމަ މިއަދު ހަވާލުކުރި ޕްރޮޖެކްޓްގެ ތިންތަން ހިންގާހާ ރުފިޔާ ސޭވްކުރެވޭނެ ކަމަށް ވިދާޅުވި އެވެ.

އޭގެ އިތުރުން ކޯސްޓްގާޑް އުޅަނދުތަކަކީ ދިވެހިންގެ ސަލާމަތާއި ރައްކާތެރި ކަމަށް މުހިންމު އުޅަނދުތަކެއްކަން ފާހަގަކުރައްވައި ޝިޔާމް ވިދާޅުވީ، އެ އުޅަނދުތައް މެއިންޓަނެންސް ކުރަން މިހާރު ގެންދަންޖެހެނީ ސްރީލަންކާއަށް ކަމަށާއި އެކަމަށް ވެސް، ހަމައެކަނި ދަތުރަށް 45000 ޑޮލަރު ހަރަދުވާ ކަމަށެވެ. އެހެންކަމުން އެ ކަންކަން ރާއްޖޭގައި ކުރެވޭނެ ރަނގަޅު މަގެއް ހޯދަން ޖެހޭ ކަމަށާއި މިއަދު ހަވާލުކުރި ޕްރޮޖެކްޓްގެ ސަބަބުން އެ ކަންކަމަށް ހައްލެއް ލިބޭނެކަމަށް ވިދާޅުވި އެވެ.

ސިފަވަރު ސިފައިންގެ ވެލްފެއާ ކޮމްޕެނީ ސިވެކް އަށް ހަވާލުކުރުމަށް ބޭއްވި ރަސްމިއްޔާތުގެ ތެރެއިން --- ސަން ފޮޓޯ/ މުހައްމަދު އަފްރާހް

ޑިފެންސް މިނިސްޓަރު އާދަމް ޝަރީފް އުމަރު ވިދާޅުވީ، ސިފައިންގެ ހުރިހާ އުޅަނދެއް ބަލަހައްޓާނެ ރަނގަޅު ތަނެއް މިހާރު ބޭނުންވާ ކަމަށެވެ. އަދި ސިފަވަރު ތަރައްގީކުރުމަށް ހިންގާ މަޝްރޫގެ ސަބަބުން ސިފައިންގެ ވެލްފެއާ ކަންކަން އިތުރަށް ހަރުދަނާ ކުރެވި، ރާއްޖޭގެ އިގްތިސާދަށް ވެސް އޭގޭ ފައިދާކުރާނެ ކަމަށް މިނިސްޓަރު ވިދާޅުވި އެވެ.

______________________________

އުތުރު ތިލަފަޅުގެ ނަން "ސިފަވަރު" އަށް ބަދަލުކުރުން

އުތުރު ތިލަފަޅުގެ ނަން "ސިފަވަރު" އަށް ބަދަލުކޮށްފައި ވަނީ، 21 މާޗް 2014ގައި އެރަށުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމެވެ. އެގޮތުން އެ ރަސްމިއްޔާތުގައި ރައީސް ޔާމީން ވަނީ، އެ ރަށުގައި ހަދާފައިވާ "ކަލާސީ ބަނދަރު" އާއި އެ ރަށުގައި އަޅާފައިވާ 100 މީހުންގެ ޖާގައިގެ މިސްކިތް ހުޅުވައިދެއްވައިފައެވެ.

ރައީސް ޔާމީން އޭރު ވިދާޅުވެފައި ވަނީ، ދައުލަތުގެ ބަޖެޓުން ހަރަދު ނުކޮށް، ސިފައިންގެ ވެލްފެއާ ބަޖެޓުން ހަރަދުކޮށްގެން މިފަދަ ބިޔަ މަޝްރޫއެއް ހިންގުމަކީ ބޮޑެތި ގޮންޖެހުންތަކަކާ ކުރިމަތިލާންޖެހޭނެ ކަމެއް ކަމަށެވެ. އެހެން ނަމަވެސް، އެ މަޝްރޫއުގެ މުހިންމު ކަމަށް ބައްލަވައި، އެތަނުގެ ބިން އަވަހަށް ހިއްކައި ނިންމުމަށްޓަކައި ސަރުކާރުން ކޮށްދެވެން ހުރި ހުރިހައި ކަމެއް ކޮށްދެއްވުމަށް ނިންމަވާފައިވާ ކަމަށް ރައީސް ވިދާޅުވިއެވެ.

"ސިވެކް" އާއި އެކު 17 ޖުލައި 2013ގައި ވެވުނު އެއްބަސްވުމެއްގެ ދަށުން އުތުރު ތިލަފަޅުގައި އެއް ހެކްޓަރުގެ ބިން ހިއްކާފައިވަނީ، ސީޕީއެސް މޯލްޑިވެސް އިންނެވެ.

އޭރު ފަސް ފިޔަވައްސަކަށް ކުރިއަށް ގެންދިއުމަށް ރާވާފައިވާ އުތުރު ތިލަފަޅުގެ ފުރަތަމަ ފިޔަވަހީގެ މަސައްކަތް ނިމުނު އިރު އެތަނުގައި ވަނީ، 1.8 ހެކްޓަރުގެ ބިން ހިއްކައި ފުޅާމިނުގައި 121 މީޓަރު، ދިގުމިނުގައި 125 މީޓަރު ހުރި ހަމީޓަރުގެ ފުން ބަނދަރެއް ވެސް ހަދާފައެވެ. އަދި 34 މީޓަރު ފުޅާ ނެރެއް ވެސް އެރަށުގައި ވަނީ، ހަދާފައެވެ.

އެމްއެންޑީއެފުން އޭރު މައުލޫމާތު ދިންގޮތުގައި، ސިފަވަރުގެ މަޝްރޫއު ނިމިގެންދާއިރު، ސިފައިންނާއި ފުލުހުންނަށް، ލިބެންޖެހޭ ބޯހިޔާ ވަހިކަމަށް ވެސް ހައްލެއް ލިބިގެންދާނެ އެވެ. އަދި އެރަށް ބިނާވެގެންދާނީ، އެމްއެންޑީއެފްގެ މިޝަން ހާސިލްކުރުމަށް މަގުފަހިކޮށްދޭ އަދި ސިފައިންގެ ވެލްފެއާ ނިޒާމް ހަރުދަނާކުރުމަށް ދެމެހެއްޓެނިވި ގޮތެއްގައި ފައިދާ ލިބޭނެ ތަނެއްގެ ގޮތުގައި ކަމަށް ބުނެފައިވެއެވެ.