ބައިނަލްއަގުވާމީ ނޫސްވެރިންގެ ޖަމިއްޔާ، އިންޓަނޭޝަނަލް ފެޑެރޭޝަން އޮފް ޖާނަލިސްޓް (އައިއެފްއޭ) އާއި ރާއްޖޭގެ ނޫސްވެރިން ކުރިއެރުވުމަށް މަސައްކަތްކުރާ މީޑިއާ ޑިވެލޮޕްމަންޓް ފައުންޑޭޝަން މޯލްޑިވްސް (އެމްޑީއެފްއެމް) ގުޅިގެން ދިވެހި ނޫސްވެރިންނަށް ތަމްރީނު ޕުރޮގުރާމެއް ބޭއްވުމަށް ނިންމައިފި އެވެ.
މި މަހު 27 އިން 28 އަށް ސެންޓްރަލް ހޮޓަލުގައި ބާއްވާ އެ ޓްރެއިނިންގައި ކިޔަވައި ދެއްވަނީ އައިއެފްޖޭގެ ސައުތު އޭޝިއާ ރީޖަންގެ ކޯޑިނޭޓަރު އުޖުވަލް އަޔަޔަރާ އެވެ. ވޯކްޝޮޕްގައި ކިޔަވައިދެނީ މީޑިއާ ރައިޓްސް، މޮނިޓަރިން، އަދި އެޑްވޮކަސީ ކަމަށް އެމްޑީއެފްއެމް އިން ބުންޏެވެ.
އެމްޑީއެފްއެމް އިން ބުނީ އެ ޓުރެއިނިންގައި ރާއްޖޭގެ މަޝްހޫރު ނޫސްތަކުގެ ނޫސްވެރިން ބައިވެރިވާނެ ކަމަށެވެ.
ބައިވެރިވުމަށް މިހާރު ފުރުސަތު ހުޅުވާލާފައިވާ އެޓުރެއިނިންގައި ބައިވެރިވާ ފަރާތްތަކަށް އައިއެފްޖޭގެ ސެޓްފިކެޓެއް ދިނުމަށް ވަނީ ނިންމައިފަ އެވެ. ވޯކްޝޮޕް ހުޅުވައި ދެއްވުމަށް ޑިފެންސް މިނިސްޓަރު އާދަމް ޝަރީފަށް ދައުވަތު ދީފައިވާ ކަމަށް އެމްޑީއެފްއެމް އިން ބުންޏެވެ.