ވިމެން އޮން ބޯޑްސްގެ ލ. އަތޮޅުގެ އައުޓްރީޗު އޭޖެންޓު ހަމަޖައްސައިފި

ވިމެން އޮން ބޯޑްސްގެ ލ. އަތޮޅު އައުޓްރީޗު އޭޖެންޓު ފާތިމަތު ޒައީމާ --

ކޯޕަރޭޓް ބޯޑުތަކުގައި އަންހެނުންގެ ހިއްސާ އިތުރުކޮށް، އަންހެނުންގެ ތަރައްގީއަށް މަސައްކަތް ކުރާ ޖަމިއްޔާ ވިމެން އޮން ބޯޑްސް (ވޮބް)ގެ ލ. އަތޮޅަށް ޚާއްސަ އައުޓްރީޗު އޭޖެންޓެއް ހަމަޖައްސައިފި އެވެ.

ވިމެން އޮން ބޯޑްސްގެ ފަރާތުން ލ. އަތޮޅަށް ކަނޑައެޅި އައުޓްރީޗު އޭޖެންޓަކީ އެ އަތޮޅު ފޮނަދޫ، ފާތިމަތު ޒައީމާ އެވެ.

ވިމެން އޮން ބޯޑްސްއިން ބުނާ ގޮތުގައި، ލ. އަތޮޅުގައި އެ ޖަމިއްޔާއިން ހިންގުމަށް ރާވާފައިވާ އެޓޯލް ސާވޭ ޕްރޮޖެކްޓާއި އަންހެނުންގެ ތަރައްގީއަށް އަމާޒުކޮށްގެން ބޭއްވުމަށް ހަމަޖައްސާފައިވާ ޕްރޮގްރާމުތައް ހިންގާނީ އައުޓްރީޗު އޭޖެންޓާ ގުޅިގެންނެވެ.

މީގެ އިތުރުން އައުޓްރީޗު އޭޖެންޓު މެދުވެރިކޮށް، ވިމެން އޮން ބޯޑްސް ޖަމިއްޔާގެ މެމްބަޝިޕް އިތުރަށް ފުޅާ ކުރުމުގެ މަސައްކަތާއި، ޖަމިއްޔާއާ ބެހޭ މައުލޫމާތު ފެތުރުމުގެ މަސައްކަތް ވެސް ކުރިޔަށް ދާނެ ކަމަށް ވިމެން އޮން ބޯޑްސްއިން ބުނެ އެވެ.

ވިމެން އޮން ބޯޑްސްއިން ދަނީ މުޅި ރާއްޖޭގެ ހުރިހާ އަތޮޅުތެއްގައި ވެސް އެ ޖަމިއްޔާގެ އައުޓްރީޗު އޭޖެންޓެއް ހަމަޖައްސަމުންނެވެ.

އެގޮތުން، އައްޑޫ ސިޓީއާއި ގދ. އަތޮޅުގެ އިތުރުން އިތުރު ތިން އަތޮޅެއްގައި އައުޓްރީޗު އޭޖެންޓުން އެ ޖަމިއްޔާއިން ހަމަޖައްސާފައި ވެ އެވެ.

ވިމެން އޮން ބޯޑްސްގެ ރައީސާ ފާތިމަތު ޝަފީގާ "ސަން" އަށް ވިދާޅުވީ، އެ ޖަމިއްޔާގެ އަމާޒަކީ ރާއްޖޭގެ ހުރިހާ އަތޮޅެއްގައި ވެސް ވޮބްގެ އައުޓްރީޗު ސެންޓަރުތަކެއް ހުޅުވައި، އެ ޖަމިއްޔާގެ މަސައްކަތް އަތޮޅު ތެރެއަށް ފަތުރާލުން ކަމަށެވެ.

comment ކޮމެންޓް