ކޯޕަރޭޓް ބޯޑުތަކުގައި އަންހެނުންގެ ހިއްސާ އިތުރުކޮށް، އަންހެނުންގެ ތަރައްގީއަށް މަސައްކަތް ކުރާ ޖަމިއްޔާ ވިމެން އޮން ބޯޑްސް (ވޮބް)ގެ ގދ.އަތޮޅު އައުޓްރީޗު އޭޖެންޓުގެ އޮފީސް، ތިނަދޫގައި ރަސްމީކޮށް ހުޅުވައިފި އެވެ.
މިދިޔަ ހޮނިހިރު ދުވަހު ވޮބްގެ ގދ. އަތޮޅު އޭޖެންޓުގެ އޮފީސް ހުޅުވާފައި ވަނީ ގދ. ތިނަދޫ ސާހިލް ގޭގަ އެވެ. އެ އޮފީސް ރަސްމީކޮށް ހުޅުއްވައިދެއްވީ ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑުގެ ރައީސް މުހައްމަދު ނިޒާރެވެ.
ތިނަދޫގައި ހުންނަ ވޮބްގެ އައުޓްރީޗު އޭޖެންޓަކީ އައިމިނަތު ނަސީމާ އެވެ. "ސަން"އަށް މައުލޫމާތު ދެއްވަމުން، ނަސީމާ ވިދާޅުވީ، ވޮބްގެ އައުޓްރީޗު އޭޖެންޓުގެ ގޮތުގައި، އަންހެނުންނަށް ފަހި ފުރުސަތުތަކެއް ހޯދައިދިނުމަށްޓަކައި، އެމީހުންގެ ފަރާތުން ވާހަކަ ދައްކާނެ ފަރާތެއްގެ ގޮތުގައި ހުންނާނެ ކަމަށެވެ.
ވޮބްގެ ތިނަދޫ އައުޓްރީޗު ސެންޓަރު ހުޅުވުން -- ސަން ފޮޓޯ/މާހިލް މުހައްމަދު
"އަންހެނުންނަށް ފުރުސަތުތައް ހޯދައިދިނުމުގައި މެދުވެރިވާ ފަރާތެއްގެ ގޮތުގައި ހުންނާނަން. އިރާދަކުރެއްވިއްޔާ ވޮބްގެ ކުރިއެރުމަށް ކުރަންޖެހޭ ކަންތަކުގައި އަޅުގަނޑު އޭޖެންޓެއްގެ ގޮތުގައި ރަނގަޅު މަސައްކަތްތަކެއް ކޮށްދޭނަން،" ނަސީމާ ވިދާޅުވި އެވެ.
އެގޮތުން، ދާދި ފަހުން ތިނަދޫގައި މޯލްޑިވްސް އިސްލާމިކް ބޭންކުގެ ގޮތްޕެއް ހުޅުވާފައި ވާ އިރު، އިސްލާމިކް ބޭންކިންގގެ ދާއިރާއިން އަންހެނުންގެ ހިއްސާ އިތުރުކުރުމަށް، އަންހެނުނަށް އާންމުކޮށް ހުޅުވާލައިގެން މަސައްކަތު ބައްދަލުވުމެއް ދާދި އަވަހަށް ބޭއްވުމަށް މަސައްކަތް ކުރައްވަމުން ދާ ކަމަށް ނަސީމާ ވިދާޅުވި އެވެ.
ވޮބްގެ ގދ އަތޮޅު އައުޓްރީޗު އޭޖެންޓު އައިމިނަތު ނަސީމާ -- ސަން ފޮޓޯ/މާހިލް މުހައްމަދު
ވޮބްގެ ގދ އަތޮޅުގެ އައުޓް ރީޗު އޭޖެންޓުގެ ގޮތުގައި ނަސީމާ ދަނީ މިދިޔަ އަހަރުގެ ސެޕްޓެމްބަރު މަހުން ފެށިގެން މަސައްކަތް ކުރަމުންނެވެ.
ވިމެން އޮން ބޯޑްސްގެ ރައީސާ ފާތިމަތު ޝަފީގާ "ސަން" އަށް ވިދާޅުވީ، ވޮބްގެ އަމާޒަކީ ރާއްޖޭގެ ހުރިހާ އަތޮޅެއްގައި ވެސް ވޮބްގެ އައުޓްރީޗު ސެންޓަރުތަކެއް ހުޅުވައި، އެ ޖަމިއްޔާގެ މަސައްކަތް އަތޮޅު ތެރެއަށް ފަތުރާލުން ކަމަށެވެ.
ވޮބްގެ ރައީސާ ފާތިމަތު ޝަފީގާ -- ސަން ފޮޓޯ/މާހިލް މުހައްމަދު
އަދި ވޮބްގެ ފަރާތުން ކެޕޭސިޓީ ޑިވެލޮޕްމެންޓް ޓްރެއިނިންގ ސެންޓަރެއް ވަރަށް އަވަހަށް ހުޅުވާނެ ކަމަށާއި، އެތަން މެދުވެރިކޮށް އަންހެނުންނަށް ހަމަހަމަ ފުރުސަތުތަކެއް ދީ، އެމީހުންނަށް ތަމްރީނު ފޯރުކޮށްދީ، އެންމެ މަތީ މަގާމުތަކުގައި އަންހެނުން އެކަށީގެންވާ މިންވަރަކަށް ފެނިގެން ދިއުމަކީ ވެސް އެ ޖަމިއްޔާގެ އަމާޒެއް ކަމަށް ޝަފީގާ ވިދާޅުވި އެވެ.