މާލެއާއި ހުޅުމާލޭގައި މިފަހަރުގެ ފިޠުރު ޢީދު ވަރަށް ކުލަގަދަކޮށް ފާހަގަކުރަން ޔޫތު މިނިސްޓްރީން ތައްޔާރުވެއްޖެއެވެ.
ޔޫތު މިނިސްޓްރީގެ ޑެޕިއުޓީ މިނިސްޓަރު ނާއިފް ޝައުކަތު ސަންއަށް ވިދާޅުވީ، އެ މިނިސްޓްރީން އިސްނަގައިގެން މާލެ، ވިލިމާލެ، އަދި ހުޅުމާލޭ ޒުވާނުންނާއި ހުޅުމާލޭ ޑިވެލޮޕްމަންޓް ކޯޕަރޭޝަން (އެޗްޑީސީ)އާ ގުޅިގެން މިފަހަރުގެ ފިޠުރު ޢީދު މާލެއާއި ހުޅުމާލޭގައި ވަރަށް ކުލަގަދަކޮށް ފާހަގަކުރުމަށް ތައްޔާރުވެފައި ވާ ކަމަށެވެ.
އެގޮތުން ޢީދު ދުވަހުގެ ފުރަތަމަ ދުވަހު 4:30 އިން 6:00 އަށް މާލޭގައި ޢީދު ކުޅިވަރުތައް ކުރިއަށް ގެންދިއުމަށް ހަމަޖެހިފައި ވާއިރު، ހުޅުމާލޭގައި ޢީދު ކުޅިވަރުތައް ކުރިއަށް ގެންދާނީ ވަޅުޢީދު ދުވަހު ކަމަށްވެސް އޭނާ ވިދާޅުވިއެވެ.
"ކުޅިވަރުތަކުގެ ތެރޭގައި ބޮޑުމަސް ނެރުން، މާލި، ކޯޑި ކެނޑުން، ބޮޑުބެރު، ދަނޑިޖެހުން އަދި ބަނޑީޔާވެސް ހިމެނޭ،" ނާއިފް ވިދާޅުވިއެވެ.
އޭނާ ވިދާޅުވީ، މިނިސްޓްރީން އިސްނަގައިގެން މިފަހަރުގެ ޢީދު ކުޅިވަރުތައް މާލޭގައި ފާހަގަކުރާން ނިންމީ، ރާއްޖޭގައި ކުރިން ފެންނަމުން ދިޔަ ޢީދުކުޅިވަރުތައް މިހާރު އުވެމުންދާތީ އެފަދަ ކަންކަން އާލާކޮށް ދިރުވައި، އާންމުންނާއި ކުޑަކުދިންނަށް ޢީދުގެ އުފާ ފުރިހަމައަށް ހޯދައިދިނުމަށް ކަމަށެވެ.
މޫސުން ގޯސް ނޫންނަމަ، މާދަމާ ހަވީރު 4:30ގައި ޒުވާނުންގެ މަރުކަޒު ސަރަހައްދުން ކުޅިވަރުތައް ފަށައިގެން ފަސް ސަރަހައްދެއްގައި މަޑުކުރަން ހަމަޖެހިފައި ވާކަމަށް އޭނާ ވިދާޅުވިއެވެ. އެގޮތުން މަޖީދީ މަގުން ނަލަހިޔާ ކައިރީގައާއި، އޮލިމްޕަސް ކައިރި، ސޯސަންމަގުން ވީޓީވީ ކައިރި، އަދި ޖުމްހޫރީ މައިދާނާއި، ފަރީދީމަގުން ނޮވެލްޓީ ކައިރީ މަޑުކުރުމަށްފަހު ކުޅިވަރުތައް ނިންމައިލާނީ ޒުވާނުންގެ މަރުކަޒު ކައިރިން ކަމަށް ނާއިފް ވިދާޅުވިއެވެ.